Ծառուկյանին ուղղված մեղադրանքները քաղաքական էին

Սերժ Սարգսյանի հայտարարությունը՝ Գագիկ Ծառուկյանի անվան շուրջ տարիներ շարունակ օդում կախված քրեական հանցագործությունների ու չվճարված հարկերի մասին, մեկնաբանվեց որպես համապատասխան մարմինների հանցավոր անգործություն: Սակայն արդարադատության նախարար Հովհաննես Մանուկյանը երեկ մեր հարցին ի պատասխան ասաց, թե դա ընդամենը քաղաքական հայտարարություն է: «Նախագահի, որեւէ քաղաքական գործչի, նախարարի, նույնիսկ այն քաղաքական գործչի, որը ներկայացված չէ իշխանության որեւէ թեւում, հայտարարությունն էությամբ քաղաքական է, եւ երբեմն դա կարող է լինել զուտ քաղաքական, որն իրավական հարցադրում իր մեջ չպարունակի, կամ այդ հարցադրումը պարտադիր չէ, որ իրավական հետեւանքներ ունենա, դա ընդամենը հարցադրում է:

Հանրապետության նախագահը, եթե հիշում եք, չասեց՝ եղել են այդպիսի փաստեր»,-արդարացրեց Մանուկյանը: Բայց նախագահը մատնանշեց, որ տարիներ շարունակ օդում կախված են մնում հանցագործությունների մասին լուրերը: Այսինքն, տարիներ շարունակ լսել են, ու դրանց նկատմամբ համապատասխան գործողություններ չեն իրականացվել: «Ասեց՝ լուրեր, տեղեկություններ, խոսակցություններ, չասեց, որ կան փաստեր, կամ ես իմ ձեռքի մեջ ունեմ փաստեր, որովհետեւ իրավունքի մեջ իրավաբանները հստակ տարբերում են փաստերն ու տեղեկությունները»: Այդ դեպքում ինչո՞ւ են ընթացք տրվել շրջանառվող լուրերի տեսքով մամուլի շատ հրապարակումների: «Թե կոնկրետ հարցերով ու կոնկրետ հայտարարությունների վերաբերյալ ինչու չեն հարուցվել կամ հարուցվել ու ինչ ճակատագիր են ունեցել, այս պահին հասցեատերը ես չեմ»,-ասաց արդարադատության համակարգի պատասխանատուն: