Արցախի ընդդիմադիրներն օրինախախտումներով զբաղվելու ժամանակ չունեն

ԼՂՀ խորհրդարանական ընտրություններում ՀՅԴ ցուցակը գլխավորող փոխվարչապետ Արթուր Աղաբեկյանը, ըստ քաղաքագետ Անդրիաս Ղուկասյանի, առաջադրվել է՝ խախտելով Սահմանադրության այն կետը, ըստ որի, թեկնածուն պետք է 5 տարի մշտապես բնակված լինի ԼՂՀ-ում եւ ունենա ԼՂՀ քաղաքացիություն: Ըստ ղարաբաղցիների, հենց այս կետն է խանգարել, որ ԼՂՀ ՊԲ նախկին հրամանատար Սամվել Բաբայանն առաջադրվի: Իսկ նա պետք է գլխավորեր ընդդիմադիր «Ազգային վերածնունդ» կուսակցության ցուցակը: Անդրիաս Ղուկասյանը մեզ տված հարցազրույցում կարծիք էր հայտնել, որ ընդդիմադիր կուսակցությունները պետք է միավորվեն եւ դատի տան մրցակցին, ով միջազգային հանրության ուշադրության ներքո գտնվող Արցախում առաջադրվում է օրենքի կոպիտ խախտմամբ:

Ի դեպ, ՀՀ նախագահի նախկին թեկնածու Անդրիաս Ղուկասյանի աջակցությամբ ստեղծված «Խաղաղություն եւ զարգացում» կուսակցությունը եւս մասնակցում է ընտրություններին: Դաշնակցական Արմեն Ռուստամյանը, պատասխանելով վերջինիս, փորձել էր փաստարկել, թե Աղաբեկյանն առաջնորդվել է օրենսդրությամբ եւ որեւէ խախտում չի արել: Սակայն ընդդիմախոսները համաձայն չէին նրա փաստարկների հետ եւ ասում էին՝ արցախյան կուսակցությունների շարքում կգտնվեն մեկ-երկուսը, որ դատի կտան Աղաբեկյանին, այդպիսով ցույց տալով իրենց անկախությունն իշխանությունից: Հավանական էր համարվում, որ դատարան կդիմի «Ազգային վերածնունդը»: Երեկ կուսակցության ղեկավար Հայկ Խանումյանից հետաքրքրվեցինք, թե ինչ մտադրություն ունեն: «Աղաբեկյանի նկատմամբ մենք որեւէ քայլեր չենք ձեռնարկում, «Խաղաղություն եւ զարգացումն» էր նախաձեռնել, ընտրական հանձնաժողովը թող որոշի, մենք կուսակցությունների գործով չենք զբաղվում»:

Եվ խորհուրդ տվեց «Խաղաղություն եւ զարգացում» կուսակցությունից հարցնել՝ նման մտադրություն ունե՞ն, թե՞ ոչ: Երբ հետաքրքրվեցինք, թե արդյոք Սամվել Բաբայանը հենց այդ պատճառո՞վ չի հրաժարվել առաջադրումից, Խանումյանն ասաց. «Բաբայանը չէր էլ առաջադրվելու, նա նման նախաձեռնություն չէր ցուցաբերել, խնդիր չէր տեսնում: Բաբայանը կուսակցության աջակցողի ֆորմատով է, եւ ինքը թեկնածու չի եղել, ոչ էլ ցանկացել է, իսկ եթե Աղաբեկյանը ցանկացել է օրենքի խախտումով կամ սխալ մեկնաբանմամբ, թողնում եմ Աղաբեկյանի խղճի վրա: Մենք բոլորին էլ դիտում ենք մրցակից եւ հավասար հարգանքով ենք վերաբերվում, այսինքն՝ Դաշնակցությունն Արցախում ֆավորիտը չի: Մենք գտնում ենք, որ Աղաբեկյանի առաջադրմամբ խնդիր կա, որը դաշնակցականները պարզաբանել են, բայց այս պահին ժամանակ չունենք, ինչպես նաեւ տրամադրվածություն՝ այդ հարցով զբաղվելու, քարոզչությամբ ենք զբաղված»: Խանումյանը, սակայն, նշեց, որ կային մեծամասնական ընտրակարգով առաջադրվող թեկնածուներ, որոնք հրաժարվել են հենց 5 տարվա մշտական բնակություն չունենալու պատճառով, եւ տվյալ դեպքում սա իրենց զբաղվելու հարցն էր: