«Ուզում են «Առինջ մոլ» գնան, ուզում են՝ «Բաքու մոլ», ես չեմ սննկանա»

ՀՀԿ-ն, ինչպես տեղեկացրել ենք, սահմանադրական փոփոխությունների քարոզչության դահլիճային «անշառ» տարբերակն է որդեգրելու, որպեսզի չբախվի տհաճ իրավիճակների:

Արդեն իսկ տեղեկություններ կան, որ քարոզչությանը լծվելու հանձնարարություն է տրվելու նաեւ իշխանության հովանու ներքո գործող խմբակ-միավորումներին, հայրենակցական միություններին՝ «Նիգ- Ապարան», «Ջավախք» եւ այլն, որոնք առաջիկայում պետք է միջոցառումներով ցնցեն երկիրն ու ցույց տան, թե ինչքան ուրախ ու երջանիկ է դառնալու կյանքը հանրաքվեից հետո: Սակայն «Արցախ» հայրենակցական միությունը, որքան էլ զարմանալի է, չի պատրաստվում ակտիվ քարոզչություն իրականացնել հօգուտ «այո»-ի։ Ինչո՞ւ։ Զրուցեցինք միության ղեկավար, «Փեթակ» առեւտրի կենտրոնի սեփականատեր Վարուժան Գրիգորյանի հետ, որը 2010 թվականից նաեւ ՀՀ նախագահի աշխատակազմի գործերի կառավարիչն է: Ի դեպ, ըստ Գրիգորյանի, իրենց միությունն ավելի քան 84 հազար անդամ ունի:

- Պարոն Գրիգորյան, տեղեկություններ կան, որ հայրենակցական միություններին ու հասարակական տարբեր կազմակերպություններին, որոնք համաձայն են իշխանությունների գործելաոճին, նույնպես հրահանգվել է ակտիվ քարոզչություն իրականացնել հօգուտ «այո»-ի, հանդիպել մարդկանց, ակտիվացնել յուրայիններին: «Արցախ» հայրենակցական միությունը մասնակցելո՞ւ է այդ գործընթացին:

- Ես ի պաշտոնե քաղծառայող եմ, եւ օրենքով էլ է արգելված քարոզչություն իրականացնել:

- Իսկ միությո՞ւնն էլ չի մասնակցելու, թեպետ հանրաքվեի կենտրոնական շտաբի պետը եւ նրա տեղակալները պետական պաշտոնյաներ են, բայց դա չի խանգարում երեկոյան ժամերին, ինչպես իրենք են ասում, քարոզարշավ իրականացնել:

- Կառույցն ունի տարածքային ղեկավարություններ, բայց կարծում եմ, որ իրենց քաղաքացիական իրավունքն է… ես, համենայնդեպս, եւ օրենքով է արգելվում ընտրարշավին իմ մասնակցելը, եւ ես էլ այդ ընտրարշավներում ընդհանրապես չկամ: Ես, որպես քաղաքացի, իմ պարտականություններն անելու եմ եւ հաճախեմ հանրաքվեի:

- «Արցախ» հայրենակցական միությունն ակտիվ լինելո՞ւ է, մասնակցելո՞ւ է քարոզարշավին, թե՞ ոչ:

- Կարծում եմ, որ ոչ: Հասարակական կազմակերպությունները, կարծում եմ… Ես, ճիշտն ասած, տեղյակ էլ չեմ, որ ասում են՝ ակտիվ մասնակցություն պիտի ունենանք եւ այլն, բայց սա հո կուսակցությո՞ւն չէ, հասարակական կազմակերպություն է: Բացի դրանից, սա ոչ թե անձի, այլ գաղափարի ընտրություն է: Ցանկացած քաղաքացի ինքը պետք է որոշի՝ մասնակցում է, չի մասնակցում:

- Իշխանության կամ, ինչպես դուք եք սիրում ասել, պետության կողքին կանգնած կազմակերպությունները նման իրավիճակներում մշտապես աշխատում են «պետության շահի» համար: Հատկապես հիմա առավել քան կարեւոր է ցանկացած ձայնը, որովհետեւ ՀՀ քաղաքացիների մեծ մասն անտարբեր է Սահմանադրության փոփոխության հանդեպ, եւ գրեթե անհաղթահարելի խնդիր է դարձել մոտ կես միլիոն ձայն հավաքելը: Դուք, որ մշտապես իշխանությունների կողքին եք եղել, թերեւս լուրջ պատճառ պետք է ունենաք պասիվ մնալու համար:

- Բայց սա անձի ընտրություն չէ, որ ես գնամ ասեմ՝ այս իշխանավորին ձայն տանք, սա գաղափարի ընտրություն է: Ամեն մարդ ինքը պետք է որոշի՝ ճի՞շտ է, որ փոփոխությունը կատարվի, եւ գա պառլամենտական համակարգը: Դրա համար կազմակերպությունը թողնված է զուտ անձնական որոշումների… թող ամեն մեկն ինքը որոշի. եթե ընդունում է, թող գնա «այո» ասի, եթե չի ընդունում, թող չգնա: Հիմա ես ասեցի ենթադրենք, բայց իմ ասելն ի՞նչ կփոխի: Եվ հետո՝ կարծեմ ՀԿ-ներին օրենքն արգելում է քարոզչություն իրականացնել:

- Սահմանադրության դեմ հանդես եկող ընդդիմադիր «Ոչ»-ի ճակատի ներկայացուցիչները պնդում են, որ այս փոփոխությունները մեկ մարդու համար են արվում, որպեսզի երկարաձգեն Սերժ Սարգսյանի իշխանությունը:

- Ճիշտ չէ, Սերժ Սարգսյանի վերարտադրության ամենահեշտ ճանապարհը նախագահական կառավարման ձեւն է: Խորհրդարանական ընտրություններին կմասնակցի, հետո մեծամասնություն կվերցնի, կգնա վարչապետ եւ երկիրը կգա-կղեկավարի: Դրա համար եմ ասում՝ սա ոչ թե անձի, այլ գաղափարի ընտրություն է:

- Գործող Սահմանադրության, նախագահական կառավարման համակարգի դեպքում երկրի ղեկավարը նախագահն է, ոչ թե վարչապետը:

- Եթե վերարտադրության խնդիր է, ապա կրկնում եմ՝ իմ ասածը լավագույն ճանապարհն է: Կարծում եմ նաեւ, որ ընդդիմությունը ժամանակից շուտ հայտարարություններ է անում, իշխանությունն այն կուսակցության, այն ուժի ձեռքը կլինի, որը որ փոփոխված Սահմանադրության արդյունքում կունենա մեծամասնություն, բայց դա չի նշանակում, թե կա հնարավորություն, որ բոլոր քաղաքական ուժերը մասնակցեն երկրի ղեկավարման գործընթացին:

- Ձեզ համար ընդունելի՞ են այս փոփոխությունները, եւ դրանք ի՞նչ են տալու հասարակ ժողովրդին:

- Իմ համար, իհարկե, ընդունելի են, Հայաստանի քաղաքացիներին նախ տալու է այն, որ միակենտրոն ղեկավարությունից ձերբազատվելու են, ու բոլոր հարցերը կքննարկվեն խորհրդարանում: Խորհրդարանին շատ մեծ հնարավորություն է տրվում, հատկապես ընդդիմադիրներին, որպեսզի բոլոր համապետական հարցերի անմիջական քննարկման մասնակիցը դառնան:

- Իսկ դրանից ՀՀ քաղաքացու կյանքը լավանալո՞ւ է:

- Քաղաքացու կյանքը… ես կարծում եմ, որ այս ընտրությունները… ես ոչ մի տող չեմ կարդացել, որ քաղաքացու կյանքը կլավանա կամ կվատանա, սա գաղափարի, հետագա կառավարման ընտրություն է, որ եթե ցանկացած հարց որքան բաց քննարկվի, կունենանք դրական որոշում:

- Ի դեպ, տեղեկություններ կան, որ Ձեզ պատկանող «Փեթակ» առեւտրի կենտրոնից վաճառականները հեռանում են. որքա՞ն մարդ է գնացել, եւ ո՞ւր են գնում:

- Ճիշտն ասած՝ ես էլ եմ լսել նման խոսակցություններ, բայց դրանք իրականությանը չեն համապատասխանում: Գուցե պրովոկացիոն բաներ են անում, մեկ լսում եմ՝ իբր «Փեթակը» վաճառել եմ, մեկ՝ իբր նոր շենք եմ սարքում. դրանք անհեթեթ խոսակցություններ են:

- Խոսակցություններ կան, որ «Փեթակից» մարդկանց կազմակերպված ձեւով տանում են Ծառուկյանի «Առինջ մոլ»:

- Նախ պետք է ասեմ, որ 5 տարուց ավել ես այդ գործերով չեմ զբաղվում, ընտանիքի սեփականությունն է: Բայց ինչ է՝ վախում ես սովա՞ծ մնա մեր ընտանիքը։ Կգնան, թող գնան, էլի, ժողովուրդ են:

- Բայց պատճառն ի՞նչն է:

- Ես չգիտեմ, ուզում են «Առինջ մոլ» գնան, ուզում են «Բաքու մոլ» գնան: Ես չեմ սննկանա, հանգիստ եղեք:

- Իսկ գուցե այդ պատճառո՞վ եք անտարբեր իշխանությունների նախաձեռնած սահմանադրական փոփոխությունների նկատմամբ:

- Այսինքն՝ ո՞նց եմ անտարբեր… դե, ես նորից պիտի կրկնեմ, որ իմ պաշտոնը թույլ չի տալիս մասնակցել, իսկ միությունը քաղաքացիական դիրքորոշում կհայտնի: