Իշխանություններն են մեզ աջակցել, ոչ թե մենք իրենց

Տեւական ընդմիջումից հետո երեկ կրկին ասպարեզում հայտնվեց վերածնված ՀՀՇ-ն իր ղեկավար կազմով: Նրանց այցը Ղարաբաղ, ընդունելությունը ԼՂ նախագահ Բակո Սահակյանի կողմից լուսաբանվեցին մամուլում, լուսանկարներ հայտնվեցին լրահոսում: Կուսակցության նախորդ «հայտնությունը», հիշեցնենք, անցած տարի էր՝ Բաղրամյան 26-ում Սերժ Սարգսյանի հետ հանդիպման ժամանակ, երբ Սահմանադրությանն աջակցող ուժերը հյուրընկալվում էին նախագահականում, արժանանում Սերժ Սարգսյանի ընդունելությանը։ Դրան անմիջապես հաջորդեց ՀՀՇ հիմնադիր կազմի փոփոխությունը՝ Կարապետ Ռուբինյանը հայտարարեց կուսակցությունը լքելու մասին, Հովհաննես Իգիթյանը նախկինի պես ակտիվ հարցազրույցներ չի տալիս: Միայն չորսից Ալիկ Արզումանյանն է շարունակում ՀՀՇ մնալ եւ անգամ լիբերալների միավորման անհրաժեշտության կոչեր է հնչեցնում։ Չորրորդ հիմնադիրն էլ՝ ՀՀՇ վարչության անդամ Արարատ Զուրաբյանը, մի քանի ամիս ԱՄՆ-ում էր: Օրերս է վերադարձել եւ միանգամից մեկնել Արցախ։ Երեկ մեզ հետ զրույցում նա ասաց, թե ՀՀՇ վարչությունը որոշել էր Սուրբ Զատիկի տոնը Ղարաբաղում անցկացնել, դիրքեր այցելել, լինել հայ զինվորի, սահմանապահի կողքին:

- Հանդիպել եք նաեւ Բակո Սահակյանի հետ, ձե՞ր նախաձեռնությամբ էր:

- Ճիշտն ասած, որ հայտնեցին, որ գնում ենք Արցախ, ու ցանկություն հայտնեցինք դիրքերում լինել ու կոնկրետ տեսնել մեր դիրքերում գտնվող զինվորներին, մեզ առաջարկեցին նաեւ հանդիպում ունենալ նրա հետ, ընդունեցինք հրավերը եւ հանդիպեցինք Արցախի ղեկավարության հետ:

- Պարոն Զուրաբյան, ներքաղաքական բուռն շրջան է, Ընտրական օրենսգրքի նախագիծն է ներկայացվել հանրության դատին, ընդդիմադիր ուժերը վերադասավորվում են խորհրդարանական ընտրություններին ընդառաջ, ի՞նչ է անում եւ ո՞ւր է ՀՀՇ-ն, ինչպիսի՞ն է ձեր կարծիքն ԸՕ նախագծի վերաբերյալ, որը կարեւոր ճանապարհ է դեպի ընտրություններ:

- Ճիշտն ասած՝ բացակայության պատճառով ես լիարժեք ու ամբողջական չեմ տիրապետում, բայց, բնականաբար, փորձելու ենք, որպեսզի մի քանի՝ մեզ համար առանցքային կետեր լինեն նոր ԸՕ-ում։ Խոսքը նույնականացման քարտերով քվեարկության, ընտրատեղամասերում տեսախցիկների առկայության մասին է, պետք է արդիական մեթոդաբանություն կիրառվի, որպեսզի հնարավորինս կանխվեն խախտումները, որոնք արձանագրվել են նախորդ բոլոր ընտրությունների ընթացքում: Պետք է փորձենք համոզել, մեր տեսակետը պնդել, որպեսզի իշխանության ներկայացուցիչները նույնպես գան նման համոզման, մասնավորապես, որ առանց տեսախցիկների առկայության ընտրություններ անցկացնելն ինչ-որ առումով նոնսենս է, մասնավորապես՝ Հայաստանում, որտեղ ընտրությունների արդյունքների վերաբերյալ մշտապես տարաձայնություններ են լինում, օբյեկտիվ տարաձայնություններ, քանի որ ընտրությունների ընթացքում տեղի են ունենում խախտումներ, կրկնաքվեարկություն: Չգիտեմ, թե դա մեզ որքանով կհաջողվի, ու ինչ արդյունքի կհասնենք, բայց գործընթացից անմասն չենք մնալու եւ փորձելու ենք առավելագույնս հասնել մեր առաջարկների ընդունմանը, որոնց թվում քվեարկողների ցուցակների հրապարակման եւ այլնի վերաբերյալ է:

- Իսկ եթե չկարողանաք համոզել, ի՞նչ եք անելու:

- Կուսակցությունը կքննարկի եւ, բնականաբար, կարտահայտի դիրքորոշումը, մեր կուսակցության մեջ որոշումները կոլեգիալ են ընդունվում, հետեւաբար, կուսակցության անունից չեմ կարող հանդես գալ եւ ասել՝ եթե այսպես լինի, մենք այսպես կանենք: Մենք մաքսիմալիստ չենք, երբեք չենք եղել այդպիսին, կփորձենք առավելագույն արդյունքի հասնել, եթե տեսնենք, որ որակական կարեւորություն ունեցող հարցերում հաջողության ենք հասնում, կողջունենք այդ, եթե ոչ, ապա կհայտնենք, որ մեզ համար ընդունելի չէ:

- Իսկ ՀՀՇ-ի համար, օրինակ, ռեյտինգային քվեարկությունը խնդրահարույց դրույթ չէ՞, որը, ի թիվս այլ թերությունների, հակասության մեջ է նոր Սահմանադրության հետ, որին աջակցություն հայտնեց նաեւ ՀՀՇ-ն՝ հիմնավորումով, որ անցում է կատարվելու խորհրդարանական համակարգի, ու որակյալ կառավարում ենք ունենալու: Մինչդեռ այս ընտրակարգը մեծամասնականի բաղադրիչ է պարունակում եւ բացառում է ամբողջական համամասնական ընտրակարգը:

- Այդ հարցին ես կարող եմ պատասխանել մի քանի օր հետո, որովհետեւ դեռ մանրամասն չեմ ուսումնասիրել այն տարբերակը, որն առաջարկվում է:

- Ի դեպ, սահմանադրական փոփոխություններին աջակցությունն ինչպե՞ս անդրադարձավ ձեր կուսակցության իմիջի վրա, եւ ի՞նչ տվեց այն մեր երկրին, որովհետեւ մինչեւ ընդունումը հայտարարում էին, թե բոլորովին նոր Հայաստան ենք ունենալու:

- Իմիջի վերաբերյալ պետք է ասեմ, որ, ի տարբերություն շատ շատերի, մենք մշտապես երկրորդական ենք համարել, քանի որ գտնում ենք, որ մեր սկզբունքներն ու մոտեցումներն ավելի կարեւոր են, քան ինչ որ ծառայում է կամ չի ծառայում իմիջին: Սահմանադրական փոփոխությունների արդյունքում մենք մի բան ենք ունենալու՝ պառլամենտական հանրապետություն, որը ցանկալի է եղել Հայաստանի քաղաքական ներկապնակը ներկայացնող գրեթե բոլոր քաղաքական ուժերի համար, որոնք իրենց ծրագրերում նման կետ են ունեցել: Այն, որ մենք այսօր դա ունենք, կարծում եմ՝ մեծ ձեռքբերում է:

- Կիսո՞ւմ եք Ձեր կուսակցի տեսակետը, որ 2017-ի խորհրդարանական ընտրություններին պետք է լիբերալ ուժերի միավորումով մասնակցել, թե՞ կարծում եք, որ պետք է միայնակ գնալ:

- Միանշանակ՝ կիսում եմ, որովհետեւ կարծում եմ, որ այսօր ընտրություններին քաղաքական որեւէ ուժ առանձին մասնակցել եւ լուրջ արդյունք արձանագրել չի կարող, մինչդեռ քաղաքական միավորումների դեպքում դա հնարավոր է:

- Կարծում եք ոչինչ չի՞ խանգարի, որպեսզի լիբերալները միավորվեն, օրինակ՝ ո՞ր ուժերի հետ եք դաշինքը պատկերացնում:

- Դեռեւս վաղ է այդ մասին խոսել, քննարկումներ են ընթանում տարբեր քաղաքական ուժերի հետ, եւ կարծում եմ՝ այս հարցին հնարավոր կլինի պատասխանել որոշ ժամանակ հետո:

- «Ազատ դեմոկրատներ» կուսակցությունից, օրինակ, հայտարարություններ են հնչել, որ իրենք դեմ չեն համագործակցությանը, բայց ընտրություններին գնալու են իրենց կուսակցության ցուցակով: ՀՀՇ-ականները պատրա՞ստ են տեղ գտնել այդ ցուցակում:

- Ոչ, երբեք, ՀՀՇ-ն չի կարող որեւէ մեկ կուսակցության ցուցակում ներգրավվել, ՀՀՇ-ն կարող է դաշինք կազմել մեկ կամ մի քանի քաղաքական ուժերի հետ:

- Բայց մինչ ընտրություններին հասնելը սեղանին ԸՕ նախագիծն է: Չե՞ք կարծում, որ ընդդիմադիր ուժերը պետք է միավորվեն նաեւ այս հարցում, որպեսզի զիջումների մղեն իշխանություններին: Օրինակ, ՀԱԿ-ը 4+4+4 ձեւաչափով քննարկում է առաջարկում, հնարավո՞ր է ՀՀՇ-ն դառնա մասնակիցներից կամ աջակիցներից մեկը:

- Ճիշտն ասած՝ միգուցե բացակա եմ եղել, բաց է մնացել մոտս, բայց այդ գործընթացի վերաբերյալ որեւէ տեղեկատվություն չունեմ:

- Իսկ նորմա՞լ եք համարում, որ կուսակցությունը, որի ղեկավար կազմի ներկայացուցիչները տարվա մեծ մասը բացակայում են երկրից, քաղաքական գործընթացներին անտեղյակ են, պետք է քաղաքական մեծ հավակնություններ ունենան:

- Ի՞նչ նկատի ունեք, որ ասում եք տարվա մեծ մասը: Եթե երկու ամիսը տարվա մեծ մասն է, համարենք այդպես: Կարծում եմ, որ մարդիկ կարող են ունենալ անձնական ու անհատական գործեր, որի պատճառով կարող են երկու ամիս բացակայել երկրից:

- Ձեր շարքերում միասնություն չի նկատվում, սահմանադրական փոփոխություններից հետո Կարապետ Ռուբինյանը հեռացավ, պարոն Իգիթյանն այլեւս ասպարեզում չէ…

- Ոչ միայն Կարապետ Ռուբինյանը, այլեւ այլ անձինք... այսօր, օրինակ, ՀԱԿ կուսակցություն կա, որոնք դուրս են եկել ՀՀՇ-ից:

- Խոսքը ներկայի մասին է, Դուք կարծում եք, որ ունե՞ք բավարար ռեսուրս, որպեսզի կարողանաք հայտ ներկայացնել ընտրական գործընթացներին:

- Մենք բավականաչափ լուրջ պոտենցիալ ունենք ցանկացած ընտրությունների մասնակցելու եւ լուրջ արդյունքներ արձանագրելու, հավատացած եղեք, ընտրությունների ընթացքում դրանում կհամոզվեք:

- Օրինակ՝ Դաշնակցությունը սահմանադրական բարեփոխումներից հետո կատարեց վերջնական ընտրություն եւ անցավ իշխանության կողմը՝ թերեւս հասկանալով, որ ընդդիմադիր դաշտում այլեւս անելիք չունի, քանզի վարկանիշի անկումն ակնհայտ է իշխանությանն աջակցության արդյունքում, ձեր շարքերը նույնպես նոսրանում են, մինչդեռ դուք շարունակում եք...

- Դա Ձեր գնահատականն է:

- Ձեր վարկանիշը չի՞ տուժել Սերժ Սարգսյանին աջակցելու արդյունքում:

- Կներեք, բայց իշխանություններն են մեզ աջակցել, մենք տարիներ շարունակ պնդել ենք, որ Հայաստանում պետք է լինի պառլամենտական կառավարում, իշխանությունները մերժել են դա: Հիմա մենք հասել ենք հաջողության։ Թե ով է ում աջակցել՝ Դուք գնահատեք: