Մի օր կմարի անպայման, բայց գոնե այս սուր պահը անցնի, նոր ցրվենք

Ակտիվիստ Անի Նավասարդյանը վերջին իրադարձությունների ֆոնին հայտնվել էր կիզակետում: Խորենացի փողոցում քաղաքացիների և ոստիկանների միջև տեղի ոնեցած բախման մեղավորին շատերը համարեցին Անիին. Ասում էին, թե նա է հրահրել, սակայն աղջիկը հաջորդ օրը վերադարձավ հանրահավաքի վայր: Նա բազմաթիվ ակցիաների և նախաձեռնությունների է մասնակցել, այժմ էլ կանգնած է «Սասնա Ծռեր»-ի տղաների կողքին և մասնակցում է բոլոր ակցիաներին: Անիի հետ զրուցեցինք իրեն բերման ենթարկելու, ընթացող հանրահավաքների և այլ թեմաների շուրջ:

 -Երեկ հանրահավաքի ժամանակ լուրեր տարածվեցին, թե երկու տղա Ձեզ հետապնդում են, դա համապատասխանո՞ւմ է իրականությանը:

Ինձ ուղղակի մի կին մոտեցավ, ասաց, որ իմ ելույթի ժամանակ իր ետևում կանգնած երկու տղա սպառնալից տոնով ասել են` քեզ հլը հետո կտեսնենք:

-Զգուշացումից հետո ինչ-որ բան եղա՞վ:

Դրանից հետո ինչ-որ բան, ոչ, չի եղել:

-Երեկ գիշերը Ազատության հրապարակից 27 անձանց բերման էին ենթարկել: Դուք նրանց թվո՞ւմ էիք:

-Այո, ինձ էլ էին բերման ենթարկել: Կենտրոնի բաժին էին տարել: Տանելուց ոչ մի բան չեն ասել, ուղղակի տարան 180.1 հոդվածի 11 կետի համաձայն (ժողովներ, հանրահավաքներ, երթեր և ցույցեր անցկացնելու կարգը խախտել): Հենց բաժնում մեզ նստացրին մի քանի ժամ, մինչև որևէ մեկը իրենց գրողներից գա` գրի, որովհետև իրենք անգրագետ են, հազարից մեկն ա իրենց մեջ, որ կարողանում է գրել:

-Բաժնում Ձեզ հետ ինչպե՞ս են վարվել:

Ոչ մի բան մեզ հետ չեն արել: Հինգ հոգով կանգնած էինք, եկան, տարան` առանց ինչ որ բան ասելու: Որ բաժնում էինք, անընդհատ մարդիկ էին բերում:

-Բավականին ակտիվ քաղաքացի եք, գրեթե ամեն նախաձեռնությանը մասնակցում եք, այս ընթացքում Ձեզ սպառնալիքներ կամ թեկուզ խնդրանք, որ դադարեցնեք Ձեր գործունեությունը, եղե՞լ է:

Խնդրանքի տեքով իմ ընկերներից են եղել, երեկ, օրինակ, բաժանմունքում մի երկու ոստիկան փորձեցին գալ, բա թե քո վրա քրեական գործ ա եղել, ես էլ ասացի` ի՞նչ, սպառնում եք ինձ, եթե շարունակեք խոսել, փաստաբանիս կհրավիրեմ այստեղ, այդպես,թողեցին գնացին: 23:30 արդեն բաժանմունքում էինք, գիշերը 2:30 բաց են թողել մեզ:

-Հարթակն այսօր կարծես յուրաքանչյուրի տեղն է դարձել, ով ցանկանում է` ելույթ է ունենում, ի՞նչ եք կարծում` լիդերներ հարկավոր չեն այդտեղ` ավելի կազմակերպված, ընդգրկող հանրահավաքներ և երթեր կազմակերպելու համար:

Ես իմ անունից կոչեր արել եմ բազմիցս, որ մասնագետները գան և միանան գործին, որպեսզի այդ հարթակը քաղաքական որակ ստանա, հիմա քաղաքացիական է, մարդիկ են, ոչ մասնագետներ, սիրողական ելույթներ են ունենում ոգեշնչող, բայց ոչ մի քաղաքական պրոցես այդ հարթակում չի ընթանում: Ես երեկ ասացի, որ իմ կարծիքով, չգիտեմ ես ճիշտ եմ, թե չէ, պետք ա ամեն օր հավաքվել, որովհետև ոչ մարդու իրավունքների ծառայությունները, ոչ փաստաբանները իրենք ոչինչ չեն կարող անել, եթե իշխանությունների վրա ճնշում չլինի, իսկ ճնշումը միայն ժողովուրդը կարող է ապահովել:

-Եթե համեմատենք նախորդ հանրահավաքների հետ` գնալով մասնակիցների թիվը նվազում է, կա՞րող է շարժումը ինչ-որ մի օր մարել` առանց արդյունքի հասնելու:

Մի օր կմարի անպայման, մի օր էլ ուրիշ բան հետո կծնվի, անընդհատ ոչինչ չի կարող մնալ, դա չի հարցը, հարցն էն ա, որ գոնե այս սուր պահը հանգստանա, որովհետև տղաներին նոր-նոր են ինչ-որ բան անում` ծեծում են իրենց, փաստաբաններին չեն թողնում իրենց մոտ, գոնե էդ տեղավորելու պահը մի հատ նորմալ փուլի գա, նոր ցրվենք:

-Անի, ճի՞շտ է, որ դուք երգչուհի Ռիփի քույրիկն ենք:

Այո, ճիշտ է

-Կարծես թե դուք տարբեր եք, ինչպե՞ս է վերաբերում Ձեր գործունեությանը, շոու բիզնեսը այս օրերին կտրված է իրականությունից:

Ինքը ուրիշ ձև ա, ես ուրիշ: Իսկ շոու բիզնեսը միշտ ա պասիվ, շոու բիզնեսը ոչ մի բան իրենից չի ներկայացնում: