Ես ենթադրում եմ, որ իրեն այնքան են այդ մասին հարցնում, որ ինքը վերջապես ներվայնացել, ասել է․ Ստեփան Մարգարյան
![Ես ենթադրում եմ, որ իրեն այնքան են այդ մասին հարցնում, որ ինքը վերջապես ներվայնացել, ասել է․ Ստեփան Մարգարյան](https://hraparak.am/uploads/images/ed17026c00a61153409736a8061e730b.jpg)
ԱԺ պատգամավոր, «Համախմբում» կուսակցության անդամ Ստեփան Մարգարյանն այսօր հրավիրված ասուլիսում անդրադարձավ իրենց հետ բանակցած ու հետո ապագա դաշինքից դուրս եկած Վիկտոր Դալլաքյանի հայտարարություններին։ Վերջինս մասնավորապես ասել էր, որ Օհանյանի և Օսկանյանի կողմից ձևավորվող դաշինքի վրա, որին երեկ միացավ նաև «Ժառանգությունը», իրականում Սամվել Բաբայանի ազդեցությունը կա, և որ ինքը «Համախմբման» լոբբինգով է զբաղվում։
«Անկեղծ ասած՝ ինձ համար տարօրինակ է, թե ինչու է Սամվել Բաբայանի անունը հայտարարվում դաշինքների և ցուցակների կազմման համար, որի վերաբերյալ որևէ հայտարարություն չի եղել ոչ մեր կողմից, ոչ Սամվել բաբայանի կողմից։ Մեր կողմից եղել է բանակցող խումբ տարբեր կուսակցությունների, ՀԿ-ների հետ քննարկելու դաշինք կազմելու հարցը, և Սամվել Բաբայանի անունն այնտեղ չի եղել։ Հիմա Սամվել Բաբայանը կարող է ունենալ անձնական վերաբերմունք այս կամ այն կուսակցության կամ քաղաքական գործչի նկատմամբ, որը «դա իր իրավունքն է»-ի պատասխան՝ ասաց Ստեփան Մարգարյանը։
Դիտարկմանը, թե Բաբայանը Tert.am-ին տված հարցազրույցում այս ամսով ասել էր՝ «լավ եմ անում», Մարգարյանն այսպես մեկնաբանեց․ «Ես ենթադրում եմ, որ իրեն այնքան են այդ մասին հարցնում, որ ինքը վերջապես ներվայնացել, ասել է»։
Hraparak.am-ի հարցին, թե իրենք խնդիր ունե՞ն խուսափելու Սամվել Բաբայանի անունը իրենց հետ ասոցացնելուց կամ դաշինքում որևէ կերպ ներառելուց, Ստեփան Մարգարյանն ասաց․ «Ես ասում եմ՝ փաստը։ Իսկ ինչ վերաբերում է բուն բովանդակությանը, Սամվել Բաբայանը հսկայական ավանդ ունի Հայաստանում,Ղարաբաղում, պաշտպանության բնագավառում և քաղաքականության մեջ, և ես կարծում եմ, որ պատիվ կլիներ, եթե նա լիներ մեր ցուցակում։ Բայց ինքն անձամբ հայտարարում է, որ չի ուզում»։
Վահե ՄԱԿԱՐՅԱՆ
Կարծիքներ