Տոնի բուն խորհուրդն է՝ ելնել ընդառաջ Հիսուս Քրիստոսին. Տեր Մատաթիա քահանա Գասպարյան
Հայ Առաքելական Եկեղեցին ամեն տարի փետրվարի 14-ին՝ նշում է Տյառնընդառաջը։ Տրնդեզ, Տեառնընդառաջ, Տանդառեջ, Տնդալեշ, Տառինջ-տառինջ, Դառդառանջ, Դոռոնջ, Մելետ և բազմաթիվ այլ անուններով հայտնի տոնը հայ ժողովուրդը նշում է հազարամյակներ շարունակ։ Տոնի քրիստոնեական խորհրդի և կազմակերպվող միջոցառումների մասին «Հրապարակը» զրուցել է Երևանի Սուրբ Գրիգոր Լուսավորիչ Մայր Եկեղեցու հոգևոր սպասավոր Տեր Մատաթիա քահանա Գասպարյանի հետ:
«Քրիստոսի Սուրբ Ծննդյան օրվանից 40 օր հետո, Հայ Առաքելական Մայր Եկեղեցին փետրվարի 14-ին նշում է քառասուն օրական մանուկ Հիսուսին տաճարին ընծայաբերելու տոնը՝ Տյառնընդառաջը կամ ժողովրդի մեջ լայն տարածում գտած` Տրնդեզը։ Տյառնընդառաջի տոնը Տիրոջն ընդառաջ գնալու հրավեր է բոլորին։ Մենք ամենքս պիտի անսանք Տիրոջ խոստմանն ու կանչին: Այն նոր սկիզբ է արժևորելու մեր քրիստոնեական ընթացքը և կենսակերպը: Ն.Ս.Օ.Տ.Տ. Գարեգին Բ Ամենայն Հայոց կաթողիկոսի տնօրինությամբ, արդեն մի քանի տարի է, ինչ Տյառնընդառաջի Պատարագից հետո Հայոց եկեղեցիներում տեղի է ունենում նորապսակների օրհնության կարգ, որից հետո նորապակները եկեղեցու բակի կրակից տանում են միջոցառումն արդեն իրենց բակերում և տանը շարունակելու համար»,- ասաց Տեր Մատաթիան:
Եկեղեցու հոգևոր սպասավոր՝ Տեր Մատաթիան, ավելացրեց նաև, որ տոնի բուն հոգևոր խորհրդից բացի այն համեմվել է ազգային ավանդական ընթացքով, երգ ու պարով միմյանց հանդեպ շնորհավորհանքներով, մաղթանքներ հղելով:
«Ես կարծում եմ, որ այս պահին, որ կարող ենք հայերս տոնի մեջ իրար մաղթանք հղել, ճիշտ է, որ մաղթենք խաղաղ ընթացք միմյանց, առողջություն և ամենակարևորը ելնենք ընդառաջ տիրոջը՝ Հիսուս Քրիստոսին, որը հենց տոնի բուն խուրհուրդն է: Լինենք այն Սիմեոն ծերունին, որը փափագում էր տեսնել տիրոջը, շոշափեր, և տեսավ ու շոշափեց: Մենք էլ փափագենք տեսնել տիրոջը և մասնակցելով պատարագին՝ հաղորդվենք այդ խորհրդի հետ, Քրիստոսի մարմինն ու արյունը ընդունելով մեր մեջ»,- զրույցի վերջում ասաց Տեր Մատաթիա քահանան:
Կարծիքներ