Իրանի ԱԳՆ խոսնակն ԱԺ արտահերթ «այս ընտրություններում հաղթողներին» հաջողություն է մաղթել
Իրանի ԱԳ նախարարության խոսնակը շնորհավորել է Հայաստանում արտահերթ խորհրդարանական ընտրությունների հաջող անցկացումը` հույս հայտնելով, որ երկու երկրների միջև բարեկամական հարաբերություններն էլ ավելի կզարգանան:
Գրել է իրանական «Մեհր» լրատվական գործակալությունը։
Իրանի արտաքին գործերի նախարարության խոսնակ Սաիդ Խաթիբզադեն շնորհավորել է երկուստեք թեկնածուներին ու Հայաստանի ժողովրդին երկրում Ազգային ժողովի արտահերթ ընտրությունների հաջող անցկացման վերաբերյալ։
Իրանի ԱԳՆ խոսնակը հաջողություն է մաղթել «այս ընտրություններում հաղթողներին»` հույս հայտնելով, որ «ներքին կայունության հաստատումն ու տարածաշրջանում խաղաղության միավորումը կառաջնորդեն Հայաստանի առաջընթացը»:
Ընդգծելով հարեւան երկրների կարևորությունն Իրանի Իսլամական Հանրապետության արտաքին քաղաքականության մեջ՝ Խաթիբզադեն կարևորություն է տվել «Հայաստանի հետ հարաբերությունների զարգացմանը»:
Նա համոզմունք է հայտնել, որ «նոր խորհրդարանի ու կառավարության ձևավորմամբ երկու երկրների միջև բարեկամական հարաբերություններն էլ ավելի կզարգանան և կխորանան»:
Ուշագրավ է, որ Իրանի ԱԳՆ խոսնակը որևէ առանձին քաղաքական ուժի անուն չի նշել՝ գուցե հաշվի առնելով, որ «Հայաստան» դաշինքը պատրաստվում է դիմել Սահմանադրական դատարան։
Կենտրոնական ընտրական հանձնաժողովի պաշտոնական տվյալների համաձայն՝ Ազգային ժողով են անցել «Քաղաքացիական պայմանագիր» կուսակցությունը (53.92% ), «Հայաստան» (21.04%) և «Պատիվ ունեմ» (5.23%) դաշինքները։
Կարծիքներ