Մանվել Գրիգորյանից տուժածները դրական ակնկալիք ունեն դատարանից
Մանվել Գրիգորյանի մահից հետո դատարանը տեւական ժամանակ գործը չէր քննում։ Այժմ կրկին կանդրադառնա նրա վերաբերյալ գործով շորթման դրվագին: Խոսքն Էջմիածնի Սպանդարյան-Բաղրամյան հատման կետում գտնվող բենզալցակայանի մասին է, որն Էջմիածնի բնակիչ, արդեն հանգուցյալ Պետրոս Թորոսյանը, իր կամքին հակառակ, փոխանցել է Գրիգորյանին:
Վերջինիս մեղադրանքի այս դրվագն առնչվում է 2004 թվականին տեղի ունեցած դեպքին, երբ այդ ժամանակ պաշտպանության փոխնախարարի պաշտոնը զբաղեցրած Մանվել Գրիգորյանը կազմակերպել էր Պետրոս Թորոսյանի կառուցած եւ նրան պատկանող առանձնապես խոշոր չափերով գույքի, այն է՝ բենզալցակայանի շորթումը: Ընդ որում, հանցագործությունը կատարել էր Պետրոս Թորոսյանին եւ նրա ընտանիքին ահաբեկելով՝ այդ նպատակի համար որպես գործիք օգտագործելով սեփական կամակատարներին:
Լցակայանն այս պահին «Էջմիածնի մաքրություն» ՍՊԸ-ի հաշվեկշռում է, որի 100 տոկոս բաժնետերն ու միակ սեփականատերը Մանվել Գրիգորյանի այրին է՝ Նազիկ Ամիրյանը: Դատարանն այժմ ապացույցների հետազոտման փուլում է: Մանվել Գրիգորյանի վերաբերյալ մայր գործով 130 վկա կա, շորթման դրվագին առնչվում են վերջին 9-10 վկաները: «Նիստերը տեղի են ունենում ամեն երեքշաբթի, յուրաքանչյուր նիստին լսում են 10 վկայի: Ապրիլի 13-ի դրությամբ հերթը 50-60-րդ վկաներինն է: Այս տեմպերով որ գնա, մեր հերթն էլ շուտով կհասնի»,- ասաց տուժողի ներկայացուցիչ Գագիկ Մելիքյանը:
Մելիքյանն ու Պետրոս Թորոսյանի որդին՝ Հայկ Թորոսյանը, վստահ են՝ շուրջ 2 տարի ձգձգվող «բենզալցակայանի» գործը շահելու են: Համոզված են՝ դատարանի որոշման վրա ազդեցություն չի ունենա նույնիսկ Նազիկ Ամիրյանի քաղաքական նորամուտը, ինչի մասին տիկինն արդեն հայտարարել է: «Մեր ապացուցողական բազան այնքան հիմնավոր ու ամուր է, որ դատը շահելու ենք՝ անկախ ամեն ինչից: Գործում բազմաթիվ փաստաթղթեր կան, որոնցով հաստատվում է, որ գույքը Մանվել Գրիգորյանին է փոխանցվել Պետրոս Թորոսյանի կամքին հակառակ եւ առանց փոխհատուցման: Քրեական գործի շրջանակներում մենք քաղաքացիական հայց ենք ներկայացրել եւ կարծում ենք՝ դատարանը կբավարարի ու այդ մասով հանցագործությունը կհամարի բացահայտված: Վստահ եմ՝ դատարանը գույքը կվերադարձնի դրա իրական տիրոջը՝ հանգուցյալ Պետրոս Թորոսյանի ընտանիքին»,- ասաց փաստաբան Մելիքյանը:
Սպառնալիքների ազդեցությամբ լցակայանը կորցրած Թորոսյանները հավատում են արդարադատությանը: Պետրոս Թորոսյանի որդին վստահ է՝ դատարանը չի կարող հօգուտ բռնարարի որոշում կայացնել: «Որոշումը դաստիարակչական ապտակի ազդեցություն պետք է ունենա առաջին հերթին Մանվել Գրիգորյանի զավակների վրա: Նրանք պետք է հասկանան, որ իրենց ծնողի օրինակով չի կարելի ապրել, չի կարելի աչք դնել ուրիշների ստեղծածի վրա, որովհետեւ այդ աչքը մի օր դուրս կգա…»,- ասում է Հայկ Թորոսյանը։
Կարծիքներ