Կրքերը շարունակում են բորբոքվել

Երեւանի պետական համալսարանի ուսխորհրդի շուրջ կրքերը շարունակվում են: Նշենք, որ ԵՊՀ ուսանողներն այս օրերին ստորագրություններ են հավաքում ուսխորհուրդը լուծարելու համար։ ԵՊՀ ուսխորհուրդը՝ Ցոլակ Հակոբյանի գլխավորությամբ, բավական ազդեցիկ կառույց է համալսարանում ու զգալի ազդեցություն կարող է ունենալ ռեկտորի ընտրության արդյունքների վրա: Ստորագրահավաքը, ըստ որոշ աղբյուրների, նախաձեռնել է ԵՊՀ գլխավոր ինժեներ Արմեն Հարությունյանը, որը ռեկտոր Արամ  Սիմոնյանի դեռեւս ոչ պաշտոնական նախընտրական շտաբի պետն է լինելու:



Վերջինս «Գառնի» հանքային ջրի առաքիչից հասել է մինչեւ տնտեսական գծով պրոռեկտորի հաստիքի: Նա ուսանողներին ստիպում է ստորագրել սպիտակ թղթերի վրա ու չի ասում ինչ նպատակով, հետո դրանց վրա լրացնում են ԵՊՀ ուսխորհրդի լուծարման տեքստը: Ընդվզողներին սաստում է, որ նրանց կհեռացնի համալսարանից: Ոմանց անգամ ծեծի է ենթարկել: Մի քանի օր առաջ նրա կողմից ծեծի է ենթարկվել ծնողազուրկ ուսանողներից մեկը, ով գիշերային պահակ է աշխատում համալսարանում: Այն ուսանողները, որոնք դժգոհ են այս գործընթացներից,  դեռեւս վաղ են համարում խոսել ու տեսակետ հայտնել: Սակայն առաջիկայում նրանք մանրամասն կխոսեն ԵՊՀ-ում խմորվող իրադարձությունների մասին: