Ռայոններում է՛լ չուլկի ու կոշիկ, էլ շոր չի մնացել, բոլորը Սերգոյի խորհրդով վառել ու տկլոր են մնացել

Վա՜յ Սերգո, Սերգո: Էրեգ գյուղնախարարությունից մի SMS ստացա ու մտքովս հազար ու մի բան անցավ: Վերջը տեսա, որ հասարակական բան են գրել՝ ձգագոտիներդ կապեք, ցրտահարություն է սպասվում: Տեսա, որ դեռ մի երկու օր կա մինչև ցրտահարություն, ասացի՝ դուրս գամ ու հասկանամ, թե ինչ է կատարվում Սահմանադրական դատարանում և այլուր, քանի եղանակները տաք են: Բոլոր հանրահավաքներին ներկա լինելուց հետո հանրահավաքային տրամադրությամբ ընկա կարկուտի տակ ու զայրացա՝ Սերգո, Սերգո, չէի՞ր կարող մի հատ sms էլ անեիր ու ասեիր, որ անսպասելի կարկուտ է գալու:  Լավ է, որ Աստված կարկուտն ասենք ձմերուկի չափ չի ստեղծել, թե չէ այդ օրը շատ գլուխներ էին վտանգվելու: Ինչևէ, կարկտահարված մտա տուն ու ինչպես ծիրանի ծաղիկներն էին փռվել, ես էլ կարկտահարված փռվեցի ու քնեցի: Առավոտ որ վեր կացա, առաջինը սոտվուս նայեցի՝  sms  չունե՞մ Սերգոյից: Չկար ու չկար: Բա լավ, մեր վիճակն ի՞նչ է լինելու,- սկսեցի անհանգստանալ ու բնազդաբար պատուհանից դուրս նայեցի: Տեսա, որ ձյուն է եկել ու մանրից էլ լավ գալիս է: Այստեղ արդեն միտինգային տրամադրությունս զարթնեց՝ Սերգո բա դա անելու բա՞ն է, որ անում ես, ձյուն էր գալիս, գոնե մի հատ sms ուղարկեիր: Էս կարո՞ղ է ուրիշներին ուղարկել, ինձ չի ուղարկել,- մտածեցի ու ինտերնետ մտա: Հա՜ էլի: Հաղորդում են, որ նախարարը սրոչնի Արմավիրից սկսած բոլոր ռայոններն է գնում՝ անձամբ դիտելու, թե ձյունն ինչպես է գալիս: Ռայոններում է՛լ չուլկի ու կոշիկ, էլ շոր չի մնացել, բոլորը Սերգոյի խորհրդով վառել ու տկլոր են մնացել: Հիմա էդ վիճակում նախարարին են սպասում: Հին, պապեկան մեթոդ է, կրակ են անում ու ինչ ունեն, չունեն մեջը գցում: Այս պահին նախարարին ու մյուս պաշտոնյաներին են սպասում:

ՀԱՍՄԻԿ ԲԱԲԱՋԱՆՅԱՆ