Ես գաղափարական մարդ եմ, մանկությանս երազանքը չի եղել պատգամավոր լինեմ
Պանամայի օֆշորային սկանդալի կիզակետում հայտնված ու այդ պատճառով ԴԱՀԿ պետի պաշտոնից հեռացած գեներալ Միհրան Պողոսյանի շրջապատում, ըստ լուրերի, անհանգստություն է տիրում։ Հզոր հովանավորի ազդեցության թուլացումից հետո շատերն իրենց անպաշտպան են զգում։ Միհրան Պողոսյանը բոլոր ընտրությունների ժամանակ եղել է Քանաքեռ-Զեյթուն ընտրատարածքում ՀՀԿ-ի համար ձայներ բերողը: Նրա ջանքերով ԱԺ պատգամավոր դարձավ Արթուր Ստեփանյանը՝ «Քեթրին» ընկերության տնօրենը։ Թե ինչ է անելու նա առաջիկա ընտրություններին, արդյոք նոր, ավելի «հզոր» տանի՞ք է որոնելու, որպեսզի կրկին անցնի խորհրդարան, թե՞ իր հովանավորի հետ փորձելու է վերականգնել նախկին կարգավիճակը, փորձեցինք պարզել պատգամավորից։
- Պարոն Ստեփանյան, Դուք քիչ առաջ կողմ քվեարկեցիք Ընտրական օրենսգրքին, որով անցում է կատարվում ամբողջովին համամասնական ընտրակարգին։ Դուք խորհրդարան եք անցել մեծամասնական ընտրակարգով, կասե՞ք, թե ինչու կողմ եղաք դրա վերացմանը։
- Ես իմ կարծիքը քվեարկությունով ցույց տվեցի։
- Փաստորեն, Դուք արդարացված չե՞ք համարում Ձեր՝ որպես մեծամասնականով ընտրված պատգամավորի ներկայությունը խորհրդարանում։
- Արդարացված եմ համարում, բայց հետագա զարգացման համար ճիշտ ուղղությունը դա է։
- Հավանաբար, մեծամասնականով ընտրված պատգամավորներդ չկարողացաք անցած տարիներին ապացուցել, որ մեծամասնականը, Ձեր բնորոշմամբ, «ճիշտ» ուղղություն է, ու դրա համար որոշեցին անցում կատարել համամասնականի։
- Իմ ընտրողներից հարցրեք, ինձ թվում է՝ ես ապացուցել եմ, ընտրողներս գոհ կլինեն, բայց երկրի զարգացման համար ես գտնում եմ, որ ավելի ճիշտը համամասնականն է։
- Ինչո՞վ է ճիշտ, ո՞րն է այդ ընտրակարգի առավելությունը, ըստ Ձեզ։
- Կուսակցությունները պետք է ուժեղանան, ոչ թե անհատները։
- Ընդունո՞ւմ եք, որ մեծամասնականով ընտրված պատգամավորները ոչ այնքան քաղաքական դեմքեր են, որքան հեղինակություններ։
- Ոչ, չեմ ընդունում։
- Դուք Ձեզ համարո՞ւմ եք քաղաքական դեմք, գաղափարական անձ։
- Այո, այո, միանշանակ, բա ինչի՞ համար եմ գտնվում ՀՀԿ-ում, եթե գաղափարական չպիտի լինեմ, մանկությանս երազանքը չի եղել պատգամավոր լինեմ, որ էդպես մտնեի մի կուսակցություն ու գայի-դառնայի պատգամավոր։
- Բայց Դուք այնքան էլ եռանդով չեք աշխատում պատգամավորի կարգավիճակում, պասիվ պատգամավոր եք։
- Ո՞վ ասեց, ես ակտիվ մասնակցություն ունեմ մեր հանձնաժողովների հետ կապված, բոլոր հանձնաժողովների նիստերին ակտիվ մասնակցություն եմ ունեցել։
- Իսկ օրենսդրական նախաձեռնություններ հեղինակե՞լ եք կամ համահեղինակ դարձել։
- Այո։
- Որո՞նք են դրանք ու քանի՞սն են։
- Վեց, թե յոթ նախաձեռնության եմ մասնակցել։
- Նոր Ընտրական օրենսգիրքը հնարավորություն է տալու, այսպես կոչված, ռեյտինգային քվեարկության, հնարավո՞ր է նորից առաջադրվեք, ընդգրկվեք տարածքային ցուցակներում, մանավանդ որ դա մեծամասնականից քիչ է տարբերվում։
- Չգիտեմ, դեռ չեմ որոշել։
- Դուք առավելապես հայտնի եք որպես ԴԱՀԿ նախկին պետ Միհրան Պողոսյանի «մարդը», կարծում եք նրա հետ կատարվածից հետո շանս կունենա՞ք կրկին առաջադրվելու։
- Նախ ասեմ, որ Միհրան Պողոսյանն իմ ընկերն է, իմ հովանավորը չէ, ես էլ հովանավորյալ չեմ ոչ մեկից, նա իմ մանկության ընկերն է։
- Լավ, թող լինի ընկերը, բայց նա նպաստեց, չէ՞, որ պատգամավոր դառնաք...
- Ինչո՞վ է նպաստել։
- Ճանապարհ է հարթել, այդ համայնքում ինքը մեծ ազդեցություն ուներ, եւ Դուք հաղթեցիք ընտրություններում։
- Ընտրություններին հաղթում են ճանապարհ հարթելո՞վ։
- Եթե նա չլիներ, կհայտնվեի՞ք խորհրդարանում։
- Միանշանակ։ Եթե ընտրողները ցույց տվեցին, որ իրենց քվեն, ձայնն ինձ են տվել, ի՞նչ կապ ունի Միհրան Պողոսյանը։
- Այսինքն փաստը, որ Միհրան Պողոսյանի դիրքերը թուլացել են, Ձեր վրա չի՞ կարող անդրադառնալ։
- Իսկ ո՞վ է ասում, ի՜նչ դիրքեր, մարդն աշխատանքի էր գնում, հիմա չի գնում, ի՞նչ դիրքեր։
- Իսկ ինչո՞ւ չի գնում, պատճառներ կան, չէ՞, լուրջ սկանդալի կիզակետում է հայտնվել։
- Ոչ մի պատճառ էլ չկա, Դուք չե՞ք կարդում լրատվականները։
- Այդ դեպքում ինչո՞ւ լքեց պաշտոնը։
- Ինքն այդ մասին շատ հիմնավոր ասել է։
- Ասում են՝ հիմա, երբ նրա համար անկումային ժամանակներ են, համայնքում նոր ազդեցիկներ են փորձում իրավիճակը տնօրինել։
- Ի՜նչ անկում, ի՜նչ ազդեցիկներ։ Մենք երբեք էլ այդ «ազդեցիկներից» չենք եղել։
- Ձեր կարծիքով՝ ինչպե՞ս կդասավորվի Միհրան Պողոսյանի քաղաքական ճակատագիրը, նրան պատասխանատվության կենթարկե՞ն, թե՞...
- Ցանկացած ոք, ցանկացած քաղաքացի եթե արել է ինչ-որ բան, որ պետք է պատասխանատվություն կրի, ուրեմն պետք է կրի։ Իսկ նա չի արել։ Ցտեսություն։
Լուսինե ՇԱՀՎԵՐԴՅԱՆ
Կարծիքներ