Վերաքննիչի բակն այսօր մարդաշատ էր. ֆոտոշարք

Վերաքննիչ քրեական դատարանի բակն այսօր մարդաշատ էր. Միայնակ Գայլի եղբոր՝ Արարատ Խանդոյանի նկատմամբ կալանքի որոշման բողոքի քննության դատական նիստը պետք է տեղի ունենար: Բակում մոտ 50-60 մարդ էին հավաքվել՝ սատարելու Խանդոյան եղբայրներին: Նրանք եկել էին «Կեցցեն Սասնա Ծռերը», «Ազատություն քաղբանտարկյալ Արարատ Խանդոյանին», «Կորչի հակահայ ռեժիմը» մակագրությամբ պաստառներով: Այնտեղ էր նաև Խանդոյանների մայրը՝ Ռիմա մայրիկը: Նրան մոտենում, համբուրում ու շնորհակալություն էին հայտնում այդպիսի տղաներ ունենալու և դաստիարակելու համար:  Հավաքվածներին շրջապատել էին մոտ մեկ տասնյակ ոստիկաններ, թեև որևէ լուրջ բախում տեղի չունեցավ:

Նշենք, որ ՀՀ քննչական կոմիտեում քննվող քրեական գործի շրջանակներում Արարատ Խանդոյանին մեղադրանք է առաջադրվել ՀՀ քրեական օրենսգրքի 225-րդ հոդվածի 2-րդ մասով՝ զանգվածային անկարգությունների ժամանակ դրանց մասնակցի կողմից բռնություն գործադրելը, ջարդ կամ հրկիզում իրականացնելը, գույք ոչնչացնելը կամ վնասելը, հրազեն, պայթուցիկ նյութեր կամ պայթուցիկ սարքեր գործադրելը կամ իշխանության ներկայացուցչին զինված դիմադրելը։ Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը՝ դատավոր Մարինե Մելքոնյանի նախագահությամբ, որոշում է կայացրել Արարատ Խանդոյանին կալանավորելու մասին: Այսօր կալանքի որոշման վերաբերյալ բողոքի քննությունը հետաձգվեց, քանի որ  Արարատ Խանդոյանին քրեակատարողական հիմնարկից դատարան չէին բերել տեխնիկական խնդիրների պատճառաբանությամբ,: Դատական նիստը կկայանա օգոստոսի 12-ին: