Համացանցի համահիմնադիր Լուի Պուզենը հանդիպել է ՏՀՏ համայնքի հետ

Երեկ «Open-Root» կազմակերպության գլխավոր տնօրեն, համացանցի համահիմնադիր Լուի Պուզենն այցելել է ՎիվաՍել-ՄՏՍ-ի գլխամասային գրասենյակ: Պուզենը յոթերորդն է ՏՏ ոլորտում համաշխարհային ներդրման համար ՀՀ նախագահի մրցանակին արժանացածների շարքում: 

Ներկաների համար նախատեսված ինտերնետի ստեղծման մասին կարճ դասախոսությունից առաջ տեղի ունեցավ Լուի Պուզենի համատեղ մամուլի ասուլիսը ՎիվաՍել-ՄՏՍ ընկերության գլխավոր տնօրեն Ռալֆ Յիրիկյանի, ՏՏ ոլորտում համաշխարհային ներդրման համար ՀՀ նախագահի մրցանակաբաշխության գործադիր խորհրդի նախագահ Հովիկ Մուսայելյանի եւ «Վիասֆեր ինթերնեյշնլ» ընկերության նախագահ Թոնի Մորոյանի հետ:

Լուի Պուզենը Հայաստան է ժամանել ՏՏ ոլորտում համաշխարհային ներդրման համար ՀՀ նախագահի՝ իրեն շնորհված հեղինակավոր մրցանակն ստանալու համար: Մրցանակաբաշխության արարողությունը տեղի է ունենալու նոյեմբերի 8-ին՝ ՀՀ նախագահի նստավայրում: ՏՏ ոլորտում համաշխարհային ներդրման համար ՀՀ նախագահի ամենամյա մրցանակը հիմնվել է 2009թ.՝ ՀՀ նախագահի հրամանագրով, եւ շնորհվում է ՏՏ ոլորտում բացառիկ ներդրումներ կատարած հեղինակավոր անհատների, որոնց ներդրումները ՏՏ ոլորտում բերել կամ բերում են հեղափոխական կամ համանման բնույթ ունեցող զարգացումների, որոնք դրականորեն են անդրադարձել կամ ներուժ ունեն դրականորեն անդրադառնալու պատմության ընթացքի վրա:

ՏՏ ոլորտում համաշխարհային ներդրման համար ՀՀ նախագահի մրցանակի նախորդ մրցանակակիրներն են «Ինտել» կորպորացիայի տնօրենների խորհրդի նախկին նախագահ Քրեյգ Բարրեթը (2010թ.), «Էփլ Քոմփյութերս» կորպորացիայի համահիմնադիր Սթիվ Վոզնյակը (2011թ.), «Սինապտիկս» ընկերության պատվավոր նախագահ Ֆեդերիկո Ֆաջինը (2012թ.), Կիսահաղորդչային արդյունաբերության մասնագետների միության եւ «Թեքնո վիժն» ընկերության նախագահ Ցուգիո Մակիմոտոն (2013թ.) եւ «Cisco» ընկերության զարգացման գծով նախագահ Մարիո Մացոլան (2014թ.), «Կասպերսկի լաբորատորիայի» գործադիր տնօրեն Եվգենի Կասպերսկին (2015թ.):

«Լուի Պուզենի, ինչպեսեւ մեծանուն մյուս մրցանակակիրների այցելությունները Հայաստան, ՏՀՏ ոլորտի ներկայացուցիչների եւ ուսանողների հետ նրանց հանդիպում-դասախոսությունների նշանակությունն անգնահատելի է: Այս հանդիպումները չափազանց արժեքավոր են միջազգային ասպարեզում մեր երկրի վարկանիշը բարձրացնելու, ոլորտի վերաբերյալ նորարարական գաղափարներ ներկայացնելու տեսանկյունից, ինչպես նաեւ խթանում են մասնագետների ու սկսնակների ստեղծագործական միտքն ու կամքը՝ հասնելու անձնական եւ մասնագիտական որակների կատարելության ու համարձակորեն ձգտելու նոր բարձունքների»,-ասել է ՎիվաՍել-ՄՏՍ-ի գլխավոր տնօրեն Ռալֆ Յիրիկյանը:

«Քչերն էին հավատում, որ նման մրցանակաբաշխություն կարելի է կազմակերպել Հայաստանում, եւ որ համաշխարհային ՏՀՏ ոլորտի մեծերն ամեն տարի կժամանեն Հայաստան՝ ստանալու այս մրցանակը։ Անցել է 7 տարի, եւ թերահավատներ այլեւս չկան։ Մրցանակաբաշխությունը հաջողել է, եւ ամեն տարի մենք հնարավորություն ունենք հյուրընկալելու լեգենդար անձանց, որոնք բարձրացնում են մեր երկրի վարկանիշը եւ ճանաչելիությունն ամբողջ աշխարհում»,-ասել է մրցանակաբաշխության գործադիր խորհրդի նախագահ Հովիկ Մուսայելյանը:

«Մենք շատ ուրախ ենք, որ 2016 թվականի մրցանակակիր է ճանաչվել Լուի Պուզենը, եւ որ նա կարողացել է ժամանել Հայաստան՝ մրցանակն ստանալու։ Լուի Պուզենի գործունեությունը նվիրված էր նոր տեխնոլոգիայի ստեղծմանը եւ կիրառմանը, տեխնոլոգիա, որն օգտագործվել է TCP/IP պրոտոկոլների ձեւավորման մեջ։ Դա այն է, ինչի վրա կառուցվել է ինտերնետը։ Նրան ճանաչում են որպես համացանցի նախահայրերից մեկը: Այսպիսով, մենք շարունակում ենք բարձր պահել ՀՀ նախագահի՝ ՏՏ ոլորտում համաշխարհային ներդրման համար մրցանակի բարձր նշաձողը»,- ասել է «Վիասֆեր ինթերնեյշնլ» ընկերության նախագահ Թոնի Մորոյանը։

ՏՏ ոլորտում ՀՀ նախագահի մրցանակը կարեւոր է Հայաստանում տեղեկատվական տեխնոլոգիաների ոլորտի զարգացման հնարավորությունների ստեղծման, ինչպես նաեւ Հայաստանն աշխարհի ՏՏ քարտեզի վրա՝ որպես բարձր տեխնոլոգիաների ոլորտում զարգացման զգալի ներուժ ունեցող երկիր, ներկայացնելու տեսանկյունից: ՎիվաՍել-ՄՏՍ-ը վստահ է, որ հայ երիտասարդությունն ունի անհրաժեշտ որակներ եւ ինքնակատարելագործման ներուժ, որի լիարժեք բացահայտման համար անհրաժեշտ է աջակցություն: ՏՏ ոլորտում համաշխարհային ներդրման համար ՀՀ նախագահի մրցանակը կարեւոր է նաեւ հայ երիտասարդների ուշադրությունը ՏՏ համայնքի վրա հրավիրելու առումով: Մրցանակաբաշխության իրականացմանն աջակցությունն ընկերության կողմից իրականացվող սոցիալական ներդրումների մաս է կազմում՝ Հայաստանում տեղեկատվական եւ հեռահաղորդակցության տեխնոլոգիաների ոլորտի զարգացմանը նպաստելու առաքելության շրջանակում:

Յոթերորդ տարին անընդմեջ ՎիվաՍել-ՄՏՍ-ն ստանձնում է մրցանակաբաշխության հովանավորությունը: Ծրագրի իրականացման համար ընկերությունը մինչ օրս 144.2 միլիոն դրամ է հատկացրել: