ՀՀԿ-ականը կուսակցությունից դուրս է եկել, որ առաջադրվի ՀՅԴ-ի ցուցակով

Լուսինե Շահվերդյան 17 Փետրվար 2017 | 07:30 0

Խորհրդարանական ընտրություններում Շիրակի մարզի Արթիկ քաղաքում յուրօրինակ իրավիճակ է ստեղծվել։ ՀՀԿ-ական քաղաքապետ Մխիթար Վարագյանի եղբայրը՝ ՀՀԿ-ական Խաչատուր Վարագյանը, ՀՀԿ-ից դուրս գալու դիմում է ներկայացրել ու Շիրակի մարզում առաջադրվելու է ՀՅԴ ռեյտինգային ցուցակով:

Խաչատուր Վարագյանն Արթիկի քաղաքապետ է եղել նախկինում, իսկ այժմ զբաղեցնում է Արթիկի գազի գրասենյակի պետի պաշտոնը: Որոշ տեղեկություններով՝ այս պաշտոնում նրան փոխարինելու է որդին: 2012 թվականին քաղաքապետի ընտրություններում Խաչատուր Վարագյանը պարտվեց Արսեն Աբրահամյանին, նախկին պատգամավոր, գործող քաղաքապետ Մխիթար Վարագյանն էլ նույն թվականին ԱԺ ընտրություններում պարտվեց ԲՀԿ-ական Մուշեղ Պետոյանին։

Վարագյանները ժամանակավորապես ընդհատակ անցան ու հայտնվեցին մեկ էլ 2016-ի աշնանը։ Մխիթար Վարագյանը, չունենալով հարազատ կուսակցության լիարժեք աջակցությունը, քաղաքապետի ընտրություններում հաղթեց ՀՀԿ-ի կողմից առաջադրված նախկին ԲՀԿ-ական Մուշեղ Պետոյանին։ Վարագյանների եւ Պետոյանների հարատեւ թշնամական հարաբերությունների մասին մարզում բոլորը գիտեն։ Եղբայրները Պետոյանների ազդեցությունն ամբողջովին չեզոքացնելու նպատակով ցանկացել են, որ տարածքի պատգամավորն էլ «իրենցից» լինի, սակայն ՀՀԿ-ի համար, մեր տեղեկություններով, ընդունելի չի եղել այդ մոտեցումը, եւ հակակշիռը պահելու համար Շիրակի մարզում առաջադրել են Պետոյանի թեկնածությունը՝ ՀՀԿ ռեյտինգային ցուցակում։

Ի դեպ, տեղեկություններ կան, որ առաջիկա օրերին Խաչատուր Վարագյանը նշանակվելու է Շիրակի փոխմարզպետ, ՀՅԴ-ական Հովսեփ Սիմոնյանի տեղակալի կարգավիճակում Վարագյանը կկարողանա նաեւ վարչական լծակների գործադրմամբ ձայներ բերել։ Խաչատուր Վարագյանը չհաստատեց, սակայն, փոխմարզպետ նշանակելու մասին լուրը։ «Ձեզանից եմ լսում»,- ասաց նա՝ մի կերպ պատասխանելով մեր մի քանի հարցերին։

- ՀՀԿ-ում ինչպե՞ս են ընդունել Ձեր որոշումը։

- Չգիտեմ, ես դիմում եմ գրել՝ հեռացել։

- Իսկ ինչո՞ւ ՀՅԴ-ի հետ։

- Իրենցից եմ առաջարկ ստացել եւ ընդունել եմ։

- ՀՀԿ-ում դե՞մ էին, որ առաջադրվեիք այդ կուսակցության ցուցակով։

- ՀՀԿ-ից առաջարկ չեմ ստացել, ես ՀՅԴ-ից եմ առաջարկ ստացել։

- Մանդատի համար, փաստորեն, ճամբարափոխ եք եղել, չե՞ք վախենում, որ մարդիկ Ձեզ չեն վստահի։

- Ոչ մի մարդ ոչ մի սահմանափակում չի ունենում, էդ իմ ձայնի իրավունքն է, իմ որոշումը։

- Իսկ Ձեզ համար այդքան սկզբունքային էր մանդատ ստանա՞լը, թե՞ Մուշեղ Պետոյանի դեմ պայքարելը։

- Ես ոչ մեկի անունը լսել չեմ ուզում, դա իմ որոշումն է, ու ես կարծում եմ, որ ոչ մեկն էս երկրում իմ իրավունքները չի կարող սահմանափակել։

- Իսկ ինչպե՞ս եք պատկերացնում Արթիկում պայքարը, Ձեր եղբայրը՝ ՀՀԿ-ական, Դուք` դաշնակցական, չե՞ք խանգարի իրար։

- Ոչ, մենք մեկս մյուսին չենք խանգարելու, սա իմ անձնական որոշումն է, ես եմ որոշել։