Առնվազն այն 3.2 տոկոսը, որ մենք պետական բյուջեի հիմքում դրել ենք, դա կապահովվի․ նախարար

Առնվազն այն 3.2 տոկոսը, որ մենք պետական բյուջեի հիմքում դրել ենք, դա կապահովվի․ նախարար

«Այս տարվա հունվարին արձանագրել ենք 35 տոկոս արտահանման աճ նախորդ տարվա հունվարի համեմատ, միաժամանակ նաև կա արդյունաբերության 12 տոկոսանոց աճ, որը շատ ոգևորիչ է։ Այսինքն՝ այն ուղղությունները, որ հայտարարում էինք և այն նախադրյալները, որ ստեղծում էինք, հիմա արդեն թվերով այդ ցուցանիշներն արտահայտում ենք»,-այսօր կառավարության նիստից հետո լրագրողների հետ զրույցում ասաց ՀՀ տնտեսական զարգացման և ներդրումների նախարար Սուրեն Կարայանը։



Hraparak.am-ի հարցին, թե այդ ցուցանիշները տարվա վերջում ՀՆԱ-ի աճի վրա ի՞նչ ազդեցություն կունենան, Կարայանն ասաց․ «Բնականաբար՝ դրական, բայց դեռ տարին նոր է սկսել, և կարող եմ ասել, որ մեր կանխատեսումները կայանում են նրանում, որ արդյունաբերության աճ մենք նաև տարվա վերջում առնվազն 6-7 տոկոս ձեզ հետ միասին կարձանագրենք։ Ես ուզում եմ խոսել այն թվերի մասին, որը մենք առնվազն կարձանագրենք, և միջինում առնվազն 20-30 տոկոս արտահանման աճ մենք տարեկան կտրվածքով կունենանք»։



Մեր մյուս հարցին, թե ընդհանուր տնտեսական աճի վերաբերյալ կանխատեսում կա՞ արդեն, Կարայանն ասաց, որ դեռ վաղ է  նման կանխատեսում անելը, բայց և խոստացավ․ «Առնվազն այն 3.2 տոկոսը, որ մենք պետական բյուջեի հիմքում դրել ենք, դա կապահովվի, բայց տնտեսական աճի վրա ազդեցության գործոնները շատ են, այդ թվում՝ գյուղատնտեսության ոլորտը, շինարարության ոլորտը, իսկ գյուղատնտեսության ոլորտը, ինչպես գիտեք, նաև կախված է բնակլիմայական պայմաններից ևս»։



Վահե ՄԱԿԱՐՅԱՆ