Ինչո՞ւ ԲԴԽ անդամներից չորսը չհեռացան

Նիկոլ Փաշինյանի՝ դատավորներին վեթթինգի ենթարկելու հայտարարությունից հետո Բարձրագույն դատական խորհրդի անդամները մեկը մյուսի հետեւից հրաժարականի դիմում ներկայացրին՝ Գագիկ Հարությունյան, Գեւորգ Դանիելյան, Սերգեյ Մեղրյան, Արմեն Խաչատրյան, Արմեն Բեկթաշյան  կազմով։

 Իհարկե՝ ոչ պաշտոնապես, բայց հրաժարականների հիմնական պատճառ էր նշվում այն, որ իշխանությունները ԲԴԽ անդամներին հասկացրել են, որ դատավորների վեթթինգի գործընթացը պետք է իրականացնի կա´մ Բարձրագույն դատական խորհուրդը, կա´մ այլ հանձնաժողով։ Իսկ մինչ այդ ասվել է, թե լավ կլինի՝ ԲԴԽ անդամները հրաժարական տան եւ գնան:

Եվ հիմա արդեն հետաքրքիր է, թե ինչու նախկին կազմի անդամների մի մասը գնաց, մի մասը մնաց։
Վերհիշենք մնացողների կազմը․ Սերգեյ Չիչոյան, Անի Մխիթարյան, Հայկ Հովհաննիսյան եւ Լիպարիտ Մելիքջանյան։ Գոնե 2-ի՝ ՀՀ քաղաքացիական վերաքննիչ դատարանի դատավոր Անի Մխիթարյանի եւ իրավաբան-գիտնական Հայկ Հովհաննիսյանի պարագայում, ինչպես փոխանցեց աղբյուրը, պատճառն ակնհայտ է՝ Մխիթարյանն ԱԺ «Իմ քայլը» խմբակցության ղեկավար Լիլիթ Մակունցի ընկերուհին է, իսկ Հովհաննիսյանն այն դատավորն էր, որը չէր համաձայնել ԲԴԽ այն որակման հետ, թե Փաշինյանի՝ դատարանների շենքերը շրջափակելու կոչը դատարանների աշխատանքի խոչընդոտում է:

Այս նյութն առանց ԲԴԽ-ականների մեկնաբանության է, քանի որ թե՛ Անի Մխիթարյանը, թե՛ Հովհաննիսյանը, տեղեկանալով, որ զանգահարողը լրագրող է, հեռախոսն անջատեցին ու այլեւս չպատասխանեցին։ Լիպարիտ Մելիքջանյանն ընդհանրապես չպատասխանեց զանգերին։

Միակ բացառությունը «մնացածներից» Սերգեյ Չիչոյանն էր։ Հարցին, թե ինչու նախկին կազմից մի մասը գնաց, իրենք մնացին, ասաց․ «Ես ուրիշի փոխարեն կարո՞ղ եմ պատասխանել՝ ինչու գնացին կամ մնացին»։
Իր պարագայի մասին Չիչոյանն ասաց․ «Որովհետեւ գտնում էի, որ գնալու խնդիր չունեմ։ Կարող եմ աշխատել, օգուտ տալ պետությանը»։

Գնալու խնդիրը, այնուամենայնիվ, ո՞րն է։ Սերգեյ Չիչոյանը չի կարող ասել։ Նրանց պարտադրում էին գնալ, ձեզ՝ ո՞չ․ հարցին ԲԴԽ նախագահի ԺՊ-ն ասաց, որ որեւէ մեկին պարտադրելու մասին տեղեկություն չունի։
Հարց երրորդ․ գնացողներն իրենց տեղո՞ւմ չէին։ «Իհարկե, տեղում էին»,- ասաց Չիչոյանը։
Հարց չորրորդ․ Չիչոյանի կարծիքով՝ նրանք ավելի՞ կապված էին նախկին իշխանությունների հետ, քան իրենք։ Ասում է, որ Բարձրագույն դատական խորհրդի անդամը չի կարող կապված լինել նախկին կամ ներկա իշխանությունների հետ։