Անհայտ ցանցահենները հարձակվել են Կարմիր Խաչի վրա, գողացել կես միլիոն մարդու տվյալ
Կարմիր Խաչի միջազգային կոմիտեի սերվերները ենթարկվել են հզոր ցանցահենային հարձակման: Այս մասին հայտնում է Meduza-ն, վկայակոչելով ԿԽՄԿ հրապարակած հայտարարությունը: Համաձայն առկա տեղեկատվության, ցանցահենային հարձակման հետեւանքով հնարավոր է եղել 515 հազար մարդու անձնական տվյալ գողանալ: Նրանք հիմնականում առավել խոցելի խմբերին պատկանող մարդիկ են` ռազմական հակամարտությունների պատճառով ընտանիքներից բաժանված անձինք, կամ տարերային աղետների հետեւանքով ընտանիքից բաժանված անձինք, անհետ կորածներ եւ բանտարկության մեջ գտնվողներ:
ԿԽՄԿ-ում հայտարարել են, որ այդ մարդկանց մասին տեղեկատվության հանրայնացումը շատ դեպքերում կարող է չափազանց ռիսկային լինել եւ սպառնալիքներ ստեղծել նրանց անվտանգության համար: Թե ով է կանգնած այդ հարձակման հետեւում, դեռ անհայտ է: ԿԽՄԿ-ն դիմել է ցանցահեններին եւ հորդորել սխալ քայլ չանել եւ չվաճառել իրենց կողմից գողացված տվյալները, որպեսզի մարդկանց չվնասեն, ովքեր առանց այն էլ գտնվում էն բարդ իրավիճակում:
Կարծիքներ