ԱՄՆ համալսարաններում պաղեստինամետ ցույցեր են․ կան ձերբակալվածներ
Միացյալ Նահանգների բազմաթիվ համալսարաններում չեն դադարում պաղեստինամետ բողոքի ակցիաները։ Ուսանողները բողոքում են Գազայի հատվածում շարունակվող ռազմական գործողությունների դեմ և պահանջում թույլ տալ մարդասիրական օգնություն հասցնել շրջան։
Թեև որոշ ուսանողներ ձերբակալվել են, բայց ցույցերը չեն մարում: Ակցիաները շարունակվել են, երբ անգամ համալսարանների վարչակազմերը հորդորել են դադարեցնել այն և ապամոնտաժել բողոքավորների ժամանակավոր ճամբարները: Ցույցերը դադարեցնելու շուրջ բանակցությունները շարունակվում են։
Անցած հինգշաբթի ավելի քան 100 ուսանող է ձերբակալվել երկրի համալսարաններում: Բողոքի ցույցերին զուգահեռ կոչեր են հնչում ուղղված ուսումնական հաստատությունների վարչակազմերին՝ թույլ չտալ հակասեմականության դրսևորումներ: Նախօրեին «Ամերիկայի ձայնն» ականատես է եղել, թե Կոլումբիայի համալսարանում ինչպես են տեղի ունենում ձերբակալությունները:
Ցուցարարներից մեկը, ով հրաժարվել է հայտնել իր անունը, ներկայացրել է ուսանողների պահանջները: «Այստեղ եմ ընկերներիս հետ և պահանջում եմ անհապաղ զինադադար հաստատել [Գազայի հատվածում], որպեսզի կարողանանք մարդասիրական օգնություն հասցնել Գազա»,- ասում է ցուցարարը:
Կարծիքներ