Երրորդ անգամ է այդ քրեական գործը բացվում, սակայն ոչ մի անգամ չեմ հարցաքննվել

«Հրապարակի» զրուցակիցը Արաբկիր վարչական շրջանի նախկին ղեկավար Հովհաննես Շահինյանն է:

- Պարոն Շահինյան, ամիսներ առաջ հայտարարել էիք, որ «Հանրային ձայն» կուսակցության ցուցակով մասնակցելու եք Երևանի ավագանու ընտրություններին, անգամ խոսվում էր, որ Դուք եք լինելու առաջին համարը, սակայն պարզվեց ցուցակում առհասարակ Դուք չկաք: Առաջին համարը կալանավայրում գտնվող Արտակ Գալստյանն է, երկրորդ համարն էլ զբաղեցնում է «Ալյանս» կուսակցության նախագահ Տիգրան Ուրիխանյանը:

- Դե այս իրավիճակում գնալ ու առաջադրվել ընտրություններում, այնքան էլ ճիշտ չէ: Նախ ես երկրում չեմ, բուժման նպատակով արտերկրում եմ, սակայն ամեն դեպքում կարծում եմ, որ ամեն բան կանխորոշված է և ընտրություններին մասնակցելու կարիք չկա: Դա ոչ թե քաղաքապետի ընտրություն է լինելու, այլ քաղաքապետի ընտրության իմիտացիա: Իշխանություններն անպայման իրենց ուզած թեկնածուին դարձնելու են քաղաքապետ, դրանում կարող եք չկասկածել:

- Գուցե Ձեր հարաբերությունները Դոգի` Վարդան Ղուկասյանի հետ այնքան էլ լավ չեն, դրա համա՞ր որոշեցիք ընտրություններին չմասնակցել:

- Ես չէի ասի, թե իմ ու Վարդան Ղուկասյանի հարաբերությունները վատ են: Ոչ մի խնդիր չենք ունեցել, ես նրա հետ ծանոթացել եմ այս տարվա մայիսին, երբ ձևավորվում էր «Մայիսյան դաշինքը», որտեղ ես ևս հանդես եկա: Նախքան այդ ես նրա հետ անգամ ծանոթ չեմ եղել: Խնդիրն այն է, որ այս ընտրություններին մասնակցելն անիմաստ է: Ցանկանում էի, որպեսզի Արտակ Գալստյանն էլ մասնակցի ընտրություններին, քանի որ այս ընտրությունները պետք էր նախ դիտարկել որպես իշխանափոխության մեկնարկ:

- Ամեն դեպքում Արտակ Գալստյանը «Հանրային ձայնի» քաղաքապետի թեկնածուն է:

- Ես սա մասնակցություն չեմ համարում: Ընտրություններին ոչ թե Արտակ Գալստյանն է մասնակցում, այլ նրա անուն-ազգանունը:

- Ինչո՞ւ:

- Այստեղ անձի մասին չէ խոսքը: Եթե անձերով առաջնորդվենք, կմնանք նույն տեղում: Համակարգային մոտեցում է հարկավոր: Համակարգը պետք է փոփոխվեր, նոր համակարգ ստեղծվեր: Այսօր մենք գնում ենք նույն այն ճանապարհով, որով գնացել ենք տարիներ առաջ` 1995-ի հուլիսի 5-ից: Գրեթե երեսուն տարի շարունակ նույն համակարգն ենք կիրառում` ընտրակաշառք, ընտրակեղծիք, ձայների ոչնչացում և այլն: Այս համակարգը հիմնադրել է Սերժ Սարգսյանը, նրան այն ժամանակ ոչ թե Նարիմանով, այլ դիրեկտոր էին ասում, կամ էլ` նաչալնիկ: Նա ուժային կառույցներում աշխատելով կարողացավ այս համակարգը ստեղծել: Բոլորի վրա կոմպրոմատներ հավաքեց` «մասնատիր, որ տիրես» սկզբունքով:

- Ձեր դեմ վարույթ էր հարուցվել, չարաշահումների հետ կապված: Ի՞նչ ընթացքում է գործը:

- 2008 թվականից սկսած այդ գործի շրջանակներում չարաշահումներից են խոսում` նաչալնիկի հրամանով: Թե ինչի մասին է խոսքը, ազնվությամբ չգիտեմ: Եթե ինձ հարցաքննեն գոնե, ես կկարողանամ հստակ պատասխանել Ձեր հարցին: 15 տարի է կա գործ, սակայն չգիտենք ինչ գործ է: Երրորդ անգամ է այս գործը բացվում, սակայն ոչ մի անգամ չեմ հարցաքննվել: Այժմ Հայաստանում չեմ, առողջական խնդիրների պատճառով, սակայն անպայման վերադառնալու եմ շուտով: