Գյուղացին հույս չունի, որ կարտոֆիլ կունենա
Այսօր տեղացած կարկուտը մեծ վնաս է հասցրել Կոտայքի մարզի Մեղրաձոր, Աղավնաձոր, Մարմարիկ համայնքերի կարտոֆիլի ցանքատարածություններին: «100%-ով կարտոֆիլը վնասվել է, այս տարի բերք չի լինի, կարտոֆիլի գինն էլ թանկ կլինի»,- մեզ հետ զրույցում ասացին գյուղացիները:
Կոտայքի մարզի այս համայնքներում գյուղացիները հիմնականում կարտոֆիլի ցանք են անում: Գյուղացին այս տարի առատ բերք էր ակնկալում, քանի որ եղանակը բարենպաստ էր, սակայն 20 րոպե տեղացած կարկուտը վնասեց ողջ ցանքատարածքները: Աղավնաձոր համայնքի վարչական ղեկավար Մխիթար Դանիելյանը մեզ հետ զրույցում ասաց, Աղավնաձորում այս տարի կարտոֆիլ չի լինի «Գյուղացու միակ ապրուստը կարտոֆիլն էր, լրիվ ավիրեց կարկուտը: Միայն մեր գյուղից 100 ընտանիք վարկ են վերցրել, կարտոֆիլի նոր սերմ են առել: Նորմալ կարտոֆիլի սերմի 1 կգ 500 դրամ արժե: Դե պատկերացրեք, էդ մարդիկ 1 մլն. դրամ վարկ են վերցրել, որ ցանք անեն, եկամուտ ստանան: Հիմա անգամ հույս չունեն, որ իրենց օգտագործելու համար կարտոֆիլ կունենան»: Անձրեւ դեռ չէր դադարել տվյալ համայնքների բնակիչները փակեցին Հրազդան-Հանքավան մայրուղին: Նրանք պահանջում էին հանդիպում մարզպետի հետ: Մարզպետ Ռոմանոս Պետրոսյանը հանդիպել է գյուղացիներին, շրջել մի քանի ցանքատարածքներով, ապա խոստացել, որ առավոտյան հանձնաժողովը համայնքներ կայցելի, կգնահատի վնասի չափը, եւ այն կներկայացնեն կառավարություն:
Կարծիքներ