Ապտակ Թուրքիայից

Նախօրեին FLYONE ARMENIA ընկերությունը հաղորդեց, որ Թուրքիայի ավիացիոն իշխանություններն իրենց օդային տարածքով դեպի եվրոպական երկրներ չվերթներ իրականացնելու (overflight) հնարավորություն չեն տրամադրել, ուստի ստիպված են չեղարկել մինչեւ հունիսի 10-ը Երեւան-Լիոն- Երեւան եւ Երեւան-Փարիզ-Երեւան ուղղություններով չվերթները։ Ընկերությունը ներողություն է խնդրել ուղեւորներից եւ խոստացել փոխհատուցել նրանց վնասները:

Հիշեցնենք, որ ավիաընկերությունը Սուքիասյանների ընտանիքին է պատկանում, եւ այն իր առաջին չվերթներն իրականացրեց դեպի Ստամբուլ։ Ավելին՝ ԱԺ ՔՊ-ական պատգամավոր Խաչատուր Սուքիասյանը հայ-թուրքական հարաբերությունների ամենաեռանդուն ջատագովներից է։ Նա ընդամենը մեկ ամիս առաջ հայտարարել էր․ «Չե՞նք կարող մեկս մյուսի հետ նորմալ հարեւանություն անել, եղբայրություն՝ մենք իրենց համար ցավանք, իրենք մեզ համար ցավան․․․ Պետք է մեկս մյուսին աջակցենք, որ զարգանանք, հարեւաններ ենք, դարերով ապրելու ենք նույն տեղում»։ Թվում էր՝ հարեւանն էլ պետք է ձգտի կարգավորել մեզ հետ հարաբերությունները՝ «եղբայրություն անելու», որ «մեկս մյուսին աջակցելով՝ զարգանանք»։

Թվում էր՝ հարեւանն ավելի շատ պետք է շահագրգռված լինի․ իրենց եղբար Ադրբեջանը գոնե մասնակիորեն լուծել է խնդիրը՝ հսկայական տարածքներ է հետ նվաճել, հիմնավորվել է Արցախի սրտում՝ Շուշիում, նեղ կացության մեջ է դրել պարտված կողմին եւ հիմա կարող է մտածել նաեւ սահմանները բացելու, հարաբերությունները կարգավորելու մասին։ Գոնե կարող էր այնպես անել, որ հակաթուրքական այս ալիքը Հայաստանում մարեր, եւ հայ հասարակությանն ապացուցեր, որ ինքն էլ է պատրաստ եղբայրանալու։ Կարող էր գոնե աջակցել «խաղաղության դարաշրջան» բացող Նիկոլ Փաշինյանին՝ հաղթահարելու այս փուլը։ Ավաղ։