Բուդաղյանը գնաց, Գյոզալյանը եկավ․ ի՞նչ է կատարվում հատուկ կորպուսում

Վերջին օրերին ՀՀ զինված ուժերում մի շարք փոփոխություններ են կատարվել՝ որոշ զինվորականներ են ազատվել պաշտոնից։ Մեր տեղեկություններով, դա տեղի է ունեցել նաեւ ներքին ինտրիգների եւ անհամաձայնությունների արդյունքում։ Աշխատանքից ազատվողներից մեկը հատուկ բանակային կորպուսի հրամանատար, գեներալ-մայոր Արտակ Բուդաղյանն է։ Նա առավել հայտնի է 2013 թվականին Գորիսում՝ Սուրեն Խաչատրյանի առանձնատան մոտ տեղի ունեցած փոխհրաձգության դեպքերից, երբ սպանվեց Գորիսի քաղաքապետի նախկին թեկնածու, գործարար Ավետիք Բուդաղյանը։ Նրա եղբայրը՝ Արտակ Բուդաղյանը, այն ժամանակ Գորիսի զորամասի հրամանատարն էր։ Հատուկ բանակային կորպուսը ստեղծվել է 44-օրյա պատերազմից հետո՝ 2021 թվականի ամռանը, եւ բանակում համարվում է ամենանիկոլական ստորաբաժանումը։ Այն, որպես կանոն, համալրվում է իշխանությունների կողմից սիրված սպայակազմով։

Արտակ Բուդաղյանի շրջապատից ստացված տեղեկությունների համաձայն, նա երեկ Երեւանում է եղել եւ շուտով նոր պաշտոն է ստանալու։ «Շատ լավ է, նա արժանի է։ Մարդկայինն ու տղայականը նրա մեջ շատ են»,- ասաց նախկին զինվորականներից մեկը։ Հակառակ կարծիքն էլ կա՝ որ Արտակ Բուդաղյանից դժգոհ էին։

«Հրապարակի» մյուս աղբյուրը՝ ԶՈՒ կենտրոնական ապարատից, նշում է․ «Ասում էին, որ լավ չի աշխատում Բուդաղյանը, բոլորը դժգոհ էին։ Կառավարման լուրջ խնդիր էր առաջանում իր եւ տեղակալների միջեւ։ Սամվել Պողոսյանի հետ էր խնդիրը՝ գեներալ մայոր»։ Հատուկ բանակային կորպուսի հրամանատարի տեղակալ Սամվել Պողոսյանը եւս ազատված է պաշտոնից: Գորիսում կարծիքներ կան, որ Բուդաղյանը զբաղված էր հացի բիզնեսով, բանակի մատակարարումներով եւ բուն զինվորական գործին, բանակին քիչ էր ուշադրություն դարձնում։ Մեզ չհաջողվեց Արտակ Բուդաղյանի հետ կապ հաստատել, սակայն նրա եղբայրը՝ Արա Բուդաղյանը, հերքեց եղբոր՝ բիզնեսմեն լինելու փաստը․ «Նա ոչ մի փուռ էլ չունի, երբեք բիզնեսով չի զբաղվել»։ Փուռն իրականում ընտանեկան բիզնեսի մասն է։

Հիշեցնենք, որ ՀՀ նախագահի հրամանով ընդամենը մի քանի ամիս առաջ Բուդաղյանը Հանրապետության տոնի առթիվ հայրենիքի պաշտպանության եւ անվտանգության ապահովման գործում ներդրած ավանդի, մարտական գործողությունների ընթացքում ցուցաբերած խիզախության եւ նվիրումի համար պարգեւատրվել էր «Մարտական խաչ» 1-ին աստիճանի շքանշանով։

Արտակ Բուդաղյանին հատուկ կորպուսի հրամանատարի պաշտոնում փոխարինել է գնդապետ Արմեն Գյոզալյանը, որը 2021 թվականից մինչ այդ հատուկ բանակային կորպուսի շտաբի պետ-կորպուսի փոխհրամանատարն էր։ Արմեն Գյոզալյանի մասին նույնպես հակասական լուրեր են պտտվում։ Նախորդ իշխանությունների ժամանակ նա առանձնապես լուրջ ծանոթություններ կամ, ինչպես ասում են՝ «տեր» չի ունեցել, տարբեր զորամասերում զբաղեցրել է հրամանատարական պաշտոններ, եւ միայն  հեղափոխությունից հետո է նրա ծառայական կարիերան սկսել ինտենսիվ վերելք ապրել։ Նոր իշխանության օրոք նա թռիչք է կատարել ԶՈՒ բարձրագույն հրամկազմ։ Կադրային զինվորական է, մասնակցել է 44-օրյա պատերազմին, սակայն ՊՆ կայքում՝ նրա կենսագրության մեջ այս փաստը նշված չէ։ Ասում են, որ նա նոր իշխանությանը հոգով ու սրտով հնազանդ կադրերից է։ Դատեր է հարուցել լրագրողների դեմ, այն բանից հետո, երբ նրան մեղադրել են զինվորների նկատմամբ դաժան վերաբերմունքի համար, ինչն ինքը ժխտում է։ Ըստ այլ աղբյուրների՝ նա գրագետ է, բանակին նվիրված, վառոդի հոտ քաշած կադրերից։

Նախագահի հրամանագրերով պաշտոնից ազատվել է նաեւ հատուկ բանակային կորպուսի շտաբի պետ-կորպուսի հրամանատարի տեղակալ Բագրատ Մաթեւոսյանը, շտաբի պետ-կորպուսի հրամանատարի տեղակալ է նշանակվել Լեւոն Կասյանը, իսկ հատուկ բանակային կորպուսի հրամանատարի տեղակալ` Գագիկ Պողոսյանը։

«Նոր սերունդն է, լավ կադրեր են։ Նոր սերունդն էն ջահելներն են, որոնց գոնե 45-ը չի լրացել։ Քիչ թե շատ կարդում են, քիչ թե շատ նորմալ կրթություն են ստացել, բացի զինվորական ռուսական ու հայկական կրթությունից, Արեւմուտքում են սովորել կամ լրացուցիչ, կողքից մագիստրատուրա են սովորել, քաղաքացիական հաստատություն են ավարտել»,- ասում է բարձր սպայակազմի մեր աղբյուրը՝ արդարացնելով կադրային այս փոփոխությունները։