ՌԴ չայցելե՛լ. Տոկիոն ահաբեկչությունից հետո զգուշացրել է քաղաքացիներին
![ՌԴ չայցելե՛լ. Տոկիոն ահաբեկչությունից հետո զգուշացրել է քաղաքացիներին](https://hraparak.am/uploads/images/2024/06/image_750x_6678ff25516a0.jpg)
Ճապոնիայի իշխանությունները խորհուրդ են տվել իրենց քաղաքացիներին զերծ մնալ Ռուսաստանի տարածք մեկնելուց՝ կապված Դաղստանում տեղի ունեցած ահաբեկչությունների հետ։ Տոկիոն նույնպես շարունակում է հետևել Ռուսաստանի Դաշնությունում տիրող իրավիճակին, ինչի մասին հայտարարել է նախարարների կաբինետի գլխավոր քարտուղար Յոշիմասա Հայաշին։
«Կառավարությունը կշարունակի ուշադիր հետևել Ռուսաստանում տիրող իրավիճակին, ներառյալ՝ այս միջադեպը։ <...> Ճամփորդությունները դադարեցնելու վերաբերյալ առաջարկությունները շարունակում են գործել Ռուսաստանի Դաշնության ողջ տարածքում»,- ասել է Հայաշին Տոկիոյում կայացած մամուլի ասուլիսում, որի խոսքերը փոխանցել է JIJI Press-ը։
Նա նշել է, որ այս պահին Ռուսաստանում Ճապոնիայի քաղաքացիների կյանքին սպառնացող վտանգի դեպքերի մասին տեղեկություն չկա։
Հիշեցնենք, որ նախօրեին մի շարք ահաբեկչություններ են տեղի ունեցել Դաղստանի տարածքում, մասնավորապես՝ Մախաչկալայում և Դերբենտում։ Արդյունքում հարձակման են ենթարկվել երկու ուղղափառ եկեղեցիներ, սինագոգը և ճանապարհային ոստիկանության կետը։ Սպանվել են ավելի քան 15 ոստիկաններ, քահանա հայր Նիկոլայը և մի քանի քաղաքացիական անձինք։ Ահաբեկիչներից երեքը սպանվել են. նախնական վարկածով՝ նրանք հանրապետության ղեկավարներից մեկի որդիներին ու բարեկամն են:
Հավելենք, որ Դաղստանում հունիսի 24-ից 26-ը եռօրյա սուգ է հայտարարվել։ Այս օրերին Հանրապետության ողջ տարածքում կիջեցվեն պետական դրոշները, իսկ հեռուստառադիոընկերությունները և մշակութային հաստատությունները կչեղարկեն բոլոր ժամանցային միջոցառումները, գրում է 360.ru-ն։
Կարծիքներ