«Տեսնենք, թե պատերազմը կարո՞ղ ենք դադարեցնել». ծածկագրված ուղե՞րձ, թե՞ «անմեղ» ցանկություն
ԱՄՆ նախագահ Դոնալդ Թրամփի առաջին արձագանքը Արցախի Հանրապետության դեմ սեպտեմբերի 27-ին Թուրքիայի սանձազերծած պատերազմին եղել է. «Տեսնենք, թե պատերազմը կարո՞ղ ենք դադարեցնել»:
Անկեղծ, համեստ, ԱՄՆ հզորությանն ու «աշխարհը լուսավորելու» իր ստանձնած առաքելությանն անհամարժեք հայտարարություն, քանի որ, սովորաբար, ամերիկացիներն ասում են. I can do it. I must do it!, բայց երբեք՝ Can I do it?։ Այլապես ԱՄՆ-ն չէր լինի այնպիսին, ինչպիսին այժմ է, այլապես պիոներները կամ եվրոպացի միգրանտները չէին աձանագրի այդպիսի ցնցող հաջողություններ:
Նշված հայտարարությունից կարճ ժամանակ անց Դոնալդ Թրամփը խոստացել է ամեն ինչ կարգի բերել ու հեշտությամբ, քանի որ գիտի, թե ինչ է անում (now how-ի նման մի բան): Այդ դեպքում զո՞ւր են մարդկային հազարավոր զոհերը, բնակավայրերի ավերումները, միլիարդավոր ծախսերը. տպավորություն է ստեղծվում, որ ԱՄՆ նախագահն իր պաշտոնավարման սկզբում էլ ուներ հարցի լուծում, ուղղակի սպասում էր մինչեւ կողմերը «հասունանան»՝ հազարավոր մարդկանց արյան գնով: Դոնալդ Թրամփի now how-ն յուրօրինակ ծածկագրված հաղորդագրություն է, որը հիմք է առնվազն հետեւյալ ենթադրությունների համար.
Ենթադրություն 1: Արցախի Հանրապետությունը ստանում է NATO-ին անդամագրվելու հրավեր, որն ընդունելու դեպքում՝ արագացված գործընթացով դառնում է այդ կազմակերպության անդամ (ինչու ոչ, եթե Արցախի դյուցազունները հեշտությամբ վերացնում են թուրքական հատուկ ջոկատայիններին՝ ամոթով թողնելով, փաստորեն, NATO-ին): Թուրքիան, այդ դեպքում, անմիջապես դադարեցնում է ռազմական գործողությունները NATO-ի երիտասարդ անդամ երկրի նկատմամբ: Թեպետ դա քիչ հավանական է, քանի որ Թուրքիան պատրաստվում է պատերազմել NATO-ի հնագույն անդամ Հունաստանի դեմ:
Ենթադրություն 2: ԱՄՆ-ն «գորգային» ռմբակոծության ու հրթիռակոծության է ենթարկում իր դաշնակից Թուրքիային, ինչի արդյունքում թուրքերն աղերսում են իրագործել Սեւրի պայմանագիրը, իսկ Հունաստանին խնդրում են նվեր ընդունել նեղուցները, ներառյալ Կոստանդնուպոլիսը ու Սուրբ Սոֆիայի տաճարը՝ ի նշան երկու ժողովուրդների հավերժական բարեկամության: 100 տոկոսով հնարավոր եւ 100 տոկոսով անհնար տարբերակ:
Այսպիսով, այդ ենթադրությունները ոչ մի քննության չեն դիմանում: Մնում է համբերել մինչեւ նախագահական ընտրությունների ավարտը եւ հուսալ, որ Դոնալդ Թրամփը կպահպանի իր դիրքերը եւ այս անգամ ապածածկագրելով իր ուղերձը, կասի. «I now-how (ներկայացնելով այն ճանապարհը, որով նա պատրաստվում է «ամեն ինչ հեշտությամբ կարգի բերել»). I can do it. I must do it!»: Հետեւաբար, ցանկանանք հաջողություն պարոն Դոնալդ Թրամփին, եւ թող Աստված պահպանի Ամերիկայի ժողովրդին: Իսկ Արցախի ժողովուրդն արդեն գտել է իրեն պահպանելու՝ 32 տարի ձգվող դժվարին ճանապարհը:
Խոնարհվում ենք Արցախի հայրենական պատերազմում զոհվող հայորդիների հիշատակի առաջ, համբուրում ենք նրանց մայրերի ձեռքերը եւ դեռ կխոնարհվենք նրանց առաջ, ովքեր ողջ ու առողջ կհաղթահարեն այդ դժվարին ճանապարհը:
Գագիկ ՎԱՐԴԱՆՅԱՆ
Կարծիքներ