Երբ կան խաղի կանոններ, որոնք պարտադիր են, բայց ոչ ընդունելի
Արտաքին գործերի փոխնախարար Շավարշ Քոչարյանը բացառում է, որ Մաքսային միությանն անդամակցելիս ՀՀ-ին ավելի վատ պայմաններ կառաջարկեն, քան մյուս անդամ երկրներին, թեև չի հերքում, որ կան խաղի ընդհանուր կանոններ, որով պարտավոր է առաջնորդվել նաև Հայաստանը։
«Խնդիրն այն է, որ Մաքսային միության տարածքի երկրներում կան խաղի ընդհանուր կանոններ և բնական է, որ դու այդ խաղի կանոններով պետք է առաջնորդվես։ Այսինքն՝ բացառվում է, որ այնպիսի բան լինի, որ ՀՀ-ին ավելի վատ պայմաններ առաջարկեն, քան մյուսներին։ Իրականում դրանք ընդհանուր խաղի կանոններ են»,- մի քանի լրագրողների հետ զրույցում ասել է Քոչարյանը:
Շավարշ Քոչարյանը, ով այն պաշտոնյաներից է, ովքեր մինչև սեպտեմբերի 3-ը հավատացած էին, որ Հայաստանը գնում է ԵՄ, այսօր ակնհայտ հիասթափվածությամբ է խոսում մեր ապագայի մասին՝ չմոռանալով հույս տալ, որ մեկ էլ տեսար՝ բանակցությունների արդյունքում ՄՄ-ում մեզ համար ինչ-որ բան փոխվի դեպի լավը: Իսկ թե ինչպես է դա պատկերացնում փոխնախարարը, երբ կան բոլորի համար պարտադիր խաղի կանոններ, դժվար է ասել: «Հայաստանն այս իրավիճակից չի կարող բացառապես շահող դուրս գալ, չնայած բանակցություններով արվելու է ամեն ինչ, որ առավելագույնս ընդունելի պայմաններ լինեն»,- ասել է փոխնախարարը:
Կարծիքներ