«Փարավոն» ռեստորանում մեծ շուքով նշել են Վահագն Գեւորգյանի հաղթանակը

Երեքշաբթի օրը Ծառուկյանին պատկանող «Փարավոն» ռեստորանում մեծ շուքով նշել են Աբովյանի քաղաքապետ Վահագն Գեւորգյանի հաղթանակը: «Տոնակատարությանը» մասնակցել է մոտ հազար մարդ, սակայն նրանց թվում չի եղել Աբովյանի նախկին քաղաքապետ, Կոտայքի այժմյան մարզպետ Կարապետ Գուլոյանը, ինչը զարմացրել է ոմանց: ԲՀԿ-ականներից որեւէ մեկը նույնպես չի մասնակցել խնջույքին. սեղանների գլխին եղել է միայն Ծառուկյանը: Հարցին՝ Դո՞ւք ինչու չեք մասնակցել ձեր հանձնաժողովի գլխավոր մասնագետ Վահագն Գեւորգյանի հաղթանակի «տոնական արարողություններին», ԱԺ տեղական ինքնակառավարման հանձնաժողովի նախագահ Ստեփան Մարգարյանը տարակուսեց. «Քե՞ֆ են արել, տեղյակ չեմ», ապա կատակեց. «Վայ թե նեղանամ»: Մի նեղացեք, Ծառուկյանն այլեւս քաղաքականության մեջ չէ, Ձեր ներկայությունը «կքաղաքականացներ» սույն տոնակատարությունը: