Նախկին քաղաքապետը՝ կրկին ուշադրության կենտրոնում

Երեկ կայքերից մեկը տեղեկություն էր տարածել այն մասին, որ ոստիկանության ՔՀԳՎ եւ նույն վարչության Արմավիրի մարզային ոստիկանության Վաղարշապատի բաժնի աշխատակիցներն Էջմիածին-Մարգարա խճուղու 4/1 հասցեում հայտնաբերել են մի ամբողջ արսենալ: Ըստ նույն աղբյուրի՝ տարածքը եւ շինությունը պատկանում են Էջմիածնի նախկին քաղաքապետ Հրաչիկ Աբգարյանին:

Հիշեցնենք, որ Հրաչիկ Աբգարյան անունը մամուլում շրջանառվեց տարեսկզբին՝ կապված գեներալ Մանվելի եւ նրա միջեւ տեղի ունեցած տարաձայնությունների հետ, ինչն ավարտվել էր ծեծկռտուքով:

Դեպքից հետո, թեեւ նախկին քաղաքապետը ոստիկանության Վաղարշապատի բաժնում իրեն չծեծելու մասին հայտարարություն էր տվել, բայց մինչ այդ էլ «Հրապարակին» գրեթե անկեղծացել էր: «Դե հա, էլի...»,-ասել էր կցկտուր:

Հրաչիկ Աբգարյանին մոտ կանգնածներից մեկը զարմացած էր զենք-զինամթերքի այդ քանակությունից: Ըստ նրա՝ եթե դրանք իրոք Հրաչինն են, ապա չէր թաքցնի մի վայրում, որը համարյա ճանապարհի վրա է եւ բոլորի աչքի առաջ: «Ըտեղ գոմեր են, մի երկու բասեին՝ ձկնաբուծության համար, ու երեք սենյակով տան նման մի բան, որ աշխատողները հանգստանան: Հրաչն էլ էնքան միամիտ տղա չէ, որ էդքան զենք ունենա ու էս խառը ժամանակներում աչքի առաջ պահի»:

Հարցին, թե ինչ խառը ժամանակների մասին է ակնարկում, ասաց. «Դե, գեներալի հետ էն դեպքից հետո, էլի...»: Զարմանալին այն է, որ նախկին քաղաքապետին առնչվող հերթական աղմկահարույց բացահայտման մասին Էջմիածնում կարծես վախենում են խոսել:

Քաղաքացիները, որոնց հանդիպեցինք այգիներից մեկում, կամ ձեւացնում էին, թե ոչինչ չեն լսել, կամ լսել, բայց թերահավատորեն էին վերաբերվում: «Երեւի զինաթափում են, որ արյուն չթափվի»,-ասաց տարեց մի տղամարդ, ըստ որի՝ Հրաչը երդվել է այդ խայտառակությունն անպատասխան չթողնել: «Երեւի մտածեցին, որ ճիշտ կլինի շագանակները ոստիկանության ձեռքով կրակից հանեն, ու էս թատրոնը եղավ»: Մեկ ուրիշի կարծիքով էլ, «եթե ոստիկանությունն օպերատիվ տվյալներ ուներ, ապա ինչի՞ ավելի շուտ չէր խուզարկում տարածքը: Թե՞ սպասում էր կրքերը հանդարտվեին, որ մարդիկ ծեծկռտուքը խուզարկության հետ չկապեին... Էս ժողովուրդը շատ խելոք ժողովուրդ ա, եթե լռում ա, չի նշանակում, թե բան չի հասկանում: Պարզից էլ պարզ ա, թե էս ամեն ինչը որտեղից ա գալիս...»:

Փորձեցինք հասկանալ «որտեղից ա գալիս»-ի ենթատեքստը: «Իմ լսելով, յանի գեներալը Հրաչին ասել ա՝ քաղաքից կգնաս: Սա էլ չի գնացել, դրա համար էլ, իմ կարծիքով, էս կաշան եփվել ա»,-պարզաբանեց տարեց տղամարդը:

Սերոբ ՄԱՐՈՒԹՅԱՆ