ՀԷՑ-ն իր պատճառած վնասները փոխհատուցո՞ւմ է բաժանորդներին

Վերջին շրջանում հաճախակի են դարձել հոսանքի անջատումները, որոնք երբեմն երկար ժամեր են տեւում։ Թեմայի շուրջ զրուցել ենք «Հայաստանի էլեկտրական ցանցեր» ՓԲԸ մամուլի խոսնակ Նատալյա Սարջանյանի հետ։

- Բավականին հաճախացել են հոսանքի անջատումները Հայաստանով մեկ։ Ինչո՞վ է դա պայմանավորված։

-  Գուցե պլանային անջատումներ են կամ վթարային։

- Վթարային անջատումները հասկանալի են։ Կմանրամասնե՞ք՝ պլանային անջատումներն ինչի՞ համար են արվում, եւ օրվա կտրվածքով որքա՞ն ժամանակով են նախատեսված այդ անջատումները։

- Ընդհանրապես, մեր էլեկտրաէներգետիկ համակարգն է այդպիսին․ նախատեսում է պլանային անջատումներ։ Դա նշանակում է, որ որեւէ տեղ, որ մենք հասկանում ենք, որ վաղը կարող է խնդիր լինել, այդ հատվածում անջատում ենք կատարում եւ մեր աշխատանքներն իրականացնում։ Կոնկրետ այս վերջին տարիներին ինտենսիվ փոխարինել ենք հաշվիչները երկսակագնային սմարթ հաշվիչներով։ Գրեթե 100 տոկոսով փոխարինել ենք հին հաշվիչները նոր սմարթ հաշվիչներով։ Այդ հաշվիչների փոխարինման աշխատանքներն էլ կատարելու ընթացքում, բնականաբար, անջատում են կատարում, նոր կարողանում են այդ հաշվիչները  փոխարինել։ Դրան գումարած՝ նաեւ շենքերի մուտքերի էլեկտրատնտեսությունն ենք կարգի բերում։ Դա էլ է ենթադրում մի քանի ժամով անջատում։
Պլանային անջատումները հիմնականում իրականացնում ենք ժամը 10։00-17։00-ն ընկած ժամանակահատվածում, դրանից ոչ ավել ժամով։

- Ձմեռը հեռու չէ։ Պլանային անջատումները ձմռանն ինչպիսի՞ հաճախականությամբ են իրականացվելու։

- Ձմռանը փորձում ենք ավելի քիչ կատարել պլանային անջատումներ՝ հաշվի առնելով թե՛ մեր համակարգի առանձնահատկությունը եւ թե՛ բնակիչներին ավելի քիչ անհանգստություն պատճառելը։

- Բնակիչները բողոքում են, որ իրենց նոր հաշվիչները նախկինների պես են աշխատում։ Այսինքն՝ ամսական կտրվածքով իրենք այդքան հոսանք չեն օգտագործել, սակայն թվերն ավել են գալիս։

- Նոր սմարթ հաշվիչների տվյալները 6-7 տեղից գրանցվում են տարբեր կենտրոններում։ Եվ այդտեղ որեւէ միջամտություն այդ հաշվիչներին անելն անհնար է։ Որովհետեւ, եթե մի տեղ մեկը միջամտի, մնացած բոլոր տեղերում երեւալու է։ Այսինքն՝ այստեղ բացառվում է, որ լինի միջամտություն, մարդկային գործոնը բացառվում է։

- «Հայաստանի էլեկտրական ցանցեր» ՓԲԸ-ն կրո՞ւմ է պատասխանատվություն իր բաժանորդներին պատճառած վնասի համար։  Օրինակ, եթե հոսանքի անջատման պատճառով փչանում է բաժանորդի էլեկտրական որեւէ թանկարժեք սարք, փոխհատուցում իրականացվո՞ւմ է, թե՞ ոչ։

- Անշուշտ։ Եթե հոսանքի շեղման արդյունքում բաժանորդը վնաս է կրում, բնականաբար, եթե խոսքը, օրինակ, որեւէ սարքավորման, կենցաղային տեխնիկայի մասին է, մենք կա՛մ վերանորոգում ենք այդ սարքավորումները, ինչքան որ կա՝ անկախ քանակից, կա՛մ, եթե ենթակա չեն վերանորոգման, ֆինանսական փոխհատուցում ենք իրականացնում։

- Իսկ ինչպե՞ս է իրականացվում այդ գործընթացը։ Բաժանորդն ինչպե՞ս դիմի ՀԷՑ-ին եւ ապացուցի, որ հենց «Հայաստանի էլեկտրական ցանցերի» կողմից հոսանքի անջատման պատճառով է փչացել իր տեխնիկան։

- Եթե բաժանորդն իր մոտ հայտնաբերում է տեխնիկայի հետ կապված ինչ-որ խափանում, մեզ մոտ դիմում է գրում կամ մեր սպասարկման ցանկացած կենտրոնում, կամ էլեկտրոնային փոստի միջոցով, կամ կայքի միջոցով, ինչպես իրեն հարմար է։ Դիմում է լրացնում, որտեղ նշում է, թե ինչ սարքավորումներ են շարքից դուրս եկել։ Դրանից հետո մեզ մոտ եթե հաստատվում է լարման շեղման փաստը, իսկ դա մեզ մոտ գրանցամատյաններում է արձանագրվում։ Այսինքն՝ եթե կոնկրետ այդ հասցեում լարման շեղում է եղել,  մեզ մոտ գրանցամատյաններում միանշանակ երեւում է, այդ ստորաբաժանումից այդ դիմումն ուղարկվում է մեր համապատասխան կառույցին։ Մենք ունենք պայմանագիր՝ վերանորոգող կազմակերպության հետ, ուղարկվում է տեխնիկան իրենց։ Վերանորոգող կազմակերպությունը նայում է, թե այդ սարքավորումն ինչից է շարքից դուրս եկել։ Եթե նա էլ  հաստատում է, որ դա լարման շեղման արդյունքում է շարքից դուրս եկել, ուրեմն վերանորոգում է այդ սարքավորումը։ Եթե, իհարկե, ենթակա է վերանորոգման։ Եթե վերանորոգման ենթակա չէ, մենք գնահատում ենք այդ սարքավորման արժեքն ու շուկայական միջին արժեքով բաժանորդին տրամադրում ենք ֆինանսական փոխհատուցում։ Այդ ամեն ինչը շատ արագ՝ 10 աշխատանքային օրվա ընթացքում  լուծում ենք։