Հաջորդ անգամ ասելու է. «Կեցցեն մեր թոռները, որ ապրելու են ազատ եւ երջանիկ Հայաստանում»

2022 թվականի դեկտեմբերի 31-ին հղված Ծնննդյան տոների ուղերձը Նիկոլ Փաշինյանն ամփոփեց այսպես. «Կեցցեն մեր երեխաները, որ ապրելու են ազատ եւ երջանիկ Հայաստանում»: Նախքան 44-օրյա պատերազմում պարտվելն ու այդ պարտությամբ հպարտանալը, Նիկոլ Փաշինյանն ասում էր. «Կեցցե՛նք մենք եւ մեր երեխաները, որ ապրում ենք եւ ապրելու ենք ազատ եւ երջանիկ Հայաստանում»: Այսինքն, 2022 թվականի դեկտեմբերին 31-ին Նիկոլ Փաշինյանն ասաց, որ նախկին Հայաստանում, գոնե մինչեւ պատերազմը, մարդիկ ազատ եւ երջանիկ էին, հիմա ազատ ու երջանիկ չեն, բայց ինքը ուզում է, որ մեր երեխաներն ազատ ու երջանիկ լինեն: Սա խոստովանություն է, որ թավշյա գործիչները դժբախտացրել են Հայաստանի քաղաքացիներին: Մենք անդրադարձ ունենք 2023 թվականի հունվարի 3-ին:

Թեման նորից բարձրացնելու առիթը թավշյաների հորինած Քաղաքացու օրվա առիթով Նիկոլ Փաշինյանի ուղերձն էր, որում նա կրկնեց նույն նախադասությունը. «Կեցցեն մեր երեխաները, որ ապրելու են ազատ եւ երջանիկ Հայաստանում»: Արդեն երկրորդ անգամ է խոստովանում, որ 2018 թվականից այսկողմ իր թիմը դժբախտացրել է Հայաստանի քաղաքացիներին ու ընդամենը ուզում է երջանիկ ու ազատ լինեն մեր երեխաները: Հայտնի խոսք կա՝ ուզելը վնասակար չէ: Վնասակար է անգործությունը, ստախոսությունը, չարությունը: Որակներ, որ հատուկ են թավշյաներին:

Այսպես որ գնա Նիկոլ Փաշինյանի հաջորդ ուղերձը կավարտվի այլ ցանկությամբ. «Կեցցեն մեր թոռները, որ ապրելու են ազատ եւ երջանիկ Հայաստանում»:

Արեգ ՄԱՐԳԱՐՅԱՆ