Զրո տոկոս տոկոսադրույքով վարկեր՝ սահմանամերձ համայնքներին
Գյուղատնտեսության նախարարի պաշտոնակատար Գեղամ Գևորգյանն այսօր զեկուցեց գյուղատնտեսության ոլորտին տրամադրվող վարկերի տոկոսադրույքների սուբսիդավորման ծրագիրը հաստատելու մասին նախագիծը։ Նախագծով առաջարկվում է սահմանամերձ համայնքներին տրամադրվող վարկերի տոկոսադրույքը սահմանել զրո, նախկինում տրամադրված վարկերի տոկոսադրույքը սահմանել զրո՝ նախկինում 3 տոկոս էր, իսկ կոոպերատիվներին տրամադրվող 3 տոկոս, այլ գյուղացիական տնտեսություններին տրամադրվող 5 տոկոս տոկոսադրույքով վարկերը կպահպանվեն։ Զրո տոկոս տոկոսադրույքով վարկերը տրամադրվելու են 3-15 մլն դրամի չափով՝ նախկին 3-10 միլիոնի փոխարեն, և դրանք պետք է օգտագործվեն գյուղատնտեսության ոլորտում։ Այդ տոկոսադրույքներից զատ, այլ ծախսեր չեն նախատեսվում՝ սպասարկման վճար և այլն։
Գեղամ Գևորգյանը որպես հիմնավորում նշեց, որն ներկայումս գյուղատնտեսության զարգացմանը խոչընդոտում են մի շարք գործոններ, որոնցից կարելի է առանձնացնել գյուղատնտեսության վարման բարձր ռիսկայնությունը, գյուղացիական տնտեսությունների փոքր չափերը և հողաբաժինների մասնատվածությունը, խոշոր ապրանքային տնտեսությունների ցածր տեսակարար կշիռը, գյուղատնտեսությունում տնտեսվարողների համատեղ գործունեության ոչ բավարար ընթացքը և այլն։ «Առևտրային բանկերի կողմից հիմնականում տրամադրվող վարկերի բարձր տոկոսադրույքների պատճառով դրանք գրեթե անմատչելի են արտադրատեխնիկական բարդ պայմաններ և իրացման դժվարություններ ունեցող բազմաթիվ տնտեսվարողների համար, ուստի պետական հովանավորչական քաղաքականության իրականացումն անհրաժեշտ պայման է հանդիսանում գյուղատնտեսությունում տնտեսվարողների կարողությունների հզորացման, արտադրության ծավալների ընդլայնման և գյուղատնտեսական արտադրության մրցունակության բարձրացման համար։
Դրա հետ մեկտեղ կարևորագույն խնդիր է վարկերի նպատակայնության մակարդակի բարձրացումը, վարկերի գումարի և վարկավորման ժամկետների ավելացման միջոցով դրանց նպատակաուղղումը տնտեսությունների խոշորացմանը, արդիական տեխնոլոգիաների ներդրմանը և տնտեսվարողների գիտելիքների մակարդակի բարձրացմանը»,- ասաց Գեղամ Գևորգյանը։
Կարծիքներ