Յո՞ երթաս, Հայաստան
Հիշեցի մի ականատեսի պատմություն՝ ղարաբաղյան շարժման թեժ ժամանակահատվածում տեղի ունեցած միջադեպի մասին: ՀԿԿ կենտկոմի առաջին քարտուղար Սուրեն Հարությունյանը եւ ՀԽՍՀ գլխավոր դատախազ Վլադիմիր Նազարյանը նոր էին ժամանել Մոսկվայից եւ անմիջապես գնացել էին Թատերական հրապարակ: Հայաստանի ողջ բնակչությունն անհամբեր սպասում էր նրանց վերադարձին. սպասվում էր, որ Հարությունյանը հուսադրող լուր է բերելու Լեռնային Ղարաբաղի մասին: Հրապարակում ասեղ գցելու տեղ չկար: Երբ Հարությունյանը մոտենում է միկրոֆոնին, որ խոսի, ներկաները սկսում են վանկարկել. «Կոմիտե, կոմիտե, կոմիտե»: Խոսքը վերաբերում էր Լեւոն Տեր-Պետրոսյանին եւ ղարաբաղյան կոմիտեի մյուս անդամներին, ովքեր այդ ժամանակ «բուտիրկայում» փակված էին: Ղարաբաղյան շարժման առաջնորդները, անշուշտ, արժանի էին նման աջակցության…
Սակայն ո՞րը որից հետո է. Ղարաբաղի հարցի (իմա՝ իր բնօրրանում հայի ապրելու) լուծո՞ւմն է առաջնային, թե՞ կոմիտեի անդամների շուտափույթ ազատվելը բանտից: Քանի դեռ Հարությունյանին թույլ չէին տվել խոսել, նա շրջվում է դեպի Նազարյանն ու ասում. «Վլադիմիր, իրենց ուզածը Ղարաբաղը չէ, այլ կոմիտեն է»: Երեւի Մոսկվան գաղտնալսում էր (հիրավի՝ ճակատագրի հեգնանք) …Կարճ ժամանակ անց կոմիտեի անդամները ստանձնեցին երկրի իշխանությունը: Նրանք եւ Մոսկվան չէին կարող անտեսել ժողովրդի ցանկությունը: Բայց խոսքը դրա մասին չէ:
100 տարի (անիմաստ է անդրադառնալ մեր հազարամյակների պատմությանը, եթե մենք դասեր չենք քաղել ոչ թե վերջին հարյուր տարվա, այլ գոնե նորագույն պատմության ընդամենը 30 տարիներին տեղի ունեցած իրադարձություններից), ինչ մենք տեղապտույտի մեջ ենք ու չենք կարողանում կողմնորոշվել թե ինչ ենք ցանկանում, ի վերջո, երբ ենք դուրս գալու ամեն տեսակի կոնֆլիկտներում պատանդի կարգավիճակից:
Ինչեւէ, այնպես է ստացվել, որ ներկայում ոչ միայն Արցախի հարցը (իմա՝ իր բնօրրանում հայի ապրելու) հրատապ չէ, այլեւ երկրորդական է, երրորդական կամ չորրորդական է կորոնավիրուսի համավարակը, տասներորդական՝ երկրի սոցիալական ու տնտեսական անկումը: Համենայնդեպս, այդպիսի տպավորություն է ձեւավորվում որոշ իրադարձությունների ֆոնին: Դրանցից մեկն էլ այսօր մեկնարկեց:
Ըստ ամբոխի (ոչ հասարակության) կարծիքի՝ Գագիկ Ծառուկյանին դեռ երեկ պետք էր կալանավորել եւ ուղարկել «ոչ այնքան հեռավոր վայրեր», որովհետեւ մեծ հարստություն ունի, ինչը սարսափելի ամոթ է. չի էլ ամաչում ու հպարտանում է դրանով (բայց, չգիտես ինչու, աղքատությունն ամոթ բան չէ, թեեւ դրանով ոչ ոք չի հպարտանում): Բայց դա՞ է առաջնային խնդիրը, թե՞ երկրի տնտեսության զարգացումը՝ արտաքին բազմաթիվ սպառնալիքներին դեմ-հանդիման:
2018 թ․ «Մարիոթ հոթել»։ «Ի՞նչ անել. Հայաստանի տնտեսության զարգացման արդի հիմնախնդիրները եւ ռազմավարական ուղղությունները» գիտագործնական խորհրդաժողով: Ներկա էր ՀՀ վարչապետը: Իմ ելույթը (վարչապետն արդեն գնացել էր՝ խոստանալով ընթերցել զեկույցների ժողովածուն) նվիրված էր տնտեսական զարգացման ֆենոմենին (ականավոր տնտեսագետ Յոզեֆ Շումպետերի հայացքի ներքո): Հիմնական հարցը ձեւակերպված է այսպես. «Ինչո՞ւ Հայաստանում (ինչպես նաեւ հետխորհրդային մյուս երկրներում) իրականացված շուկայական վերափոխումները հանգեցրել են երկրի ապաարդյունաբերականացմանը, անարդյունավետ եւ անմրցունակ տնտեսության ձեւավորմանը…»: Ներկայացնելով զարգացման տարբեր, հաջողված մոդելներ՝ փորձեցի մանրամասն նկարագրել Հարավային Կորեայի փորձը, որտեղ նույնպես առաջացել էին օլիգարխներ՝ չեբոլներ: Դրանից հետո մի քանի առաջարկություններ եւ օգտակար նյութեր եմ ուղարկել կառավարություն…
Դժբախտաբար, ոմանց թվում է, թե գաղափարներ գեներացնելը սովորական բան է. ինչ-որ դասախոսիկ- գիտնականներ, պրոֆեսորիկներ ուզում են ինքնահաստատվել: Համենայնդեպս՝ նման վերաբերմունքն ակադեմիական շրջանակների նկատմամբ խոր արմատներ ունի ու ձեւավորվել է տասնամյակներ առաջ:
Հայաստանում հիմնականում ավարտվել է կապիտալի նախասկզբնական կուտակումը: Խնդիրը ներկայում հանգում է դրա արդյունավետ գործադրմանը: Այս առումով, իմ առաջարկը հետեւյալն էր. ոչ թե օլիգարխիան պետք է կառավարի պետությունը, այլ պետությունը պետք է կառավարի օլիգարխիային, ինչպես դա արվեց Հարավային Կորեայում՝ շնորհիվ նախագահ Պակ Չժոն Խիի ավտորիտար իշխանության: «Կառավարել օլիգարխիան» արտահայտությունն այստեղ նկատի չի առնվում ուղղակի իմաստով, այլ խոսքը վերաբերում է նրան, որ կառավարությունը պետք է առաջարկի այս կամ այն ֆինանսաարդյունաբերական խմբին՝ զարգացում ապահովելու (ներդրումներ անելու) տնտեսության նոր, արագ աճող ինովացիոն ոլորտներում՝ այդպիսով ապահովելով երկրի տնտեսական աճի ինովացիոն բնույթը:
Այդ դեպքում պետությունը պետք է համակողմանի աջակցի այդպիսի «կամավոր-պարտադիր» նախաձեռնություններին: Կառավարությունն արդյոք նման առաջարկություններ արե՞լ է հայկական ֆինանսաարդյունաբերական խմբերին։ Օրինակ, «Մուլտի գրուպին» առաջարկվե՞լ է արդյոք ձեռնարկել հրթիռների կամ ռազմական այլ սպառազինությունների արտադրություն: Եթե եղել է նման առաջարկ, ու նա հրաժարվել է (նախագահ Պակը նման դեպքերում ասում էր՝ կնեղանամ, ինչը հղի էր լուրջ հետեւանքներով, ուստիեւ հեռավոր 1960-ականներին ոչ մի չեբոլ չէր հրաժարվում պետության առաջարկություններից), ապա Ծառուկյանին պատժելը տեղին է: Ավելին, դեռեւս կոմունիստական գաղափարներ դավանողների տեսանկյունից, արդարացի է սեփականաշնորհված գույքը վերադարձնել պետությանը, եւ, ի լրումն դրան, ներկայում ով տիրապետում է 40-50 մլն դրամ արժողությամբ անշարժ եւ շարժական գույքի, նույնպես պետք է պատասխանատվության ենթարկել: Այսինքն՝ պետք է վերականգնել կոմունիստական արտադրահարաբերությունները: Սա՞ է հասարակության ցանկությունը: Ոչ, սա ամբոխի տգիտությունն է:
Մարդկային տգիտության հիմնական պատճառների բացահայտմանը եւ դրանց դեմ պայքարի եղանակներին է նվիրված անգլիացի «զարմանալի դոկտոր» Ռոջեր Բեկոնի Opus maius-ը: Ճշմարտությանը հասնելու հիմնական խոչընդոտների շարքում Բեկոնը նշում է կեղծ հեղինակությունը, ամբոխի սովորությունը եւ կարծիքը: Ըստ նրա՝ սովորույթը վատ է, քան հեղինակությունը, իսկ ամբոխի կարծիքն ավելի վատ է. այն ընդհանրապես չպետք է հաշվի առնել: Ռոջեր Բեկոնը չի բավարարվում վերոնշյալ պատճառները թվարկելով, այլ դրանք քննարկում է բարոյաէթիկական դիտանկյունից՝ նշելով մյուս երեքի հիմքում ընկած գլխավոր պատճառը՝ իմաստության տեսքով սեփական տգիտությունը քողարկելը, ինչը տեղի է ունենում մեծամտության պատճառով: Հետեւաբար, հնացած, նախորդ հասարակարգի սովորույթներից պետք է ձերբազատվել, իսկ ժողովրդավարությունը չնենգափոխել ամբոխի կարծիքով:
Աշխարհում տեղի են ունենում տեկտոնական փոփոխություններ, որոնց ընդառաջ գնալու համար պահանջվում է մարդկային, ֆինանսական ռեսուրսների համախմբում, տնտեսության մրցունակության բարձրացում: Պետությունը չի կարող կրավորական դիրք բռնել ու ամեն ինչ թողնել Ադամ Սմիթի՝ շուկայի «անտեսանելի ձեռքի» քմահաճույքին:
Եթե գործարարները պետությունից աջակցություն չստանան, ապա վարչապետի հայտարարած 30 մլրդ դոլարի արտահանման ծավալը, կապված առաքման գլոբալ շղթաների խաթարմամբ «բացված պատուհանի» հետ, ո՞վ պետք է ապահովի: Ո՞վ պետք է ներդրումներ անի տնտեսության մեջ: Կարո՞ղ է Օստապ Բենդերը (Заграница нам поможет!), ում հայրը թուրքահպատակ էր: Նրա՞նք, ովքեր ատում են հարուստներին եւ ցանկանում են, որ բոլորն աղքատ դառնան: «Դե, էդ Ծառուկյանը պտի նստի ու իր հարստությունը պտի բաշխի աղքատներին»,- մտածում են նմանները: Նման մարդկանց միլիոն էլ տաս, նրանք էլի աղքատ են մնալու:
Ի դեպ, առաջիկա տարիներին օտարերկրյա ներդրումների ցանկալի ու անհրաժեշտ ծավալներ հազիվ թե ներհոսեն Հայաստան, ինչի մասին վկայում է Investment Trends Monitor-ը: Ու դա ոչ այնքան այս կամ այն ազգային կառավարությունից է կախված, այլ մեծապես պայմանավորված է գլոբալ միտումներով: Հետեւաբար, ներդրումների ներքին աղբյուրների կարեւորությունն ակներեւ է դառնում: Ահա մեկ պատճառ, թե ինչու Ծառուկյանին կամ մյուս խոշոր գործարարներին պետք է վերաբերվել այնպես, որպեսզի իրենք ներդրումներ անեն կառավարության տնտեսական ծրագրերում:
Յո՞ երթաս, Հայաստան:
Հնչում են կարծիքներ, թե վարչապետը ձգտում է բռնապետ դառնալ: Դա լավ է, եթե նախագահ Պակի նման նա միտված է Հայաստանը զարգացած երկիր դարձնելուն: Բայց ինչպե՞ս՝ պողոսներո՞վ, թե՞ կայացած գործարարներով: Ավանդական հորդոր. մի հարցրեք, թե նրանց որտեղից առաջին միլիոնը:
Հասարակության մեջ օր առաջ համերաշխության ու հանդուրժողականության մթնոլորտ հաստատելն այլընտրանք չունի: Առավել եւս՝ համավարակի առաջացրած այս անորոշության պայմաններում: Մենք դեռ չգիտենք, թե ինչ է սպասվում առջեւում՝ համավարակի առումով, էլ ավելի մեծ է անորոշությունը տնտեսական բնագավառում: Այս գլոբալ աղետի պայմաններում բազմաթիվ երկրներում նկատվում է հասարակությունների համախմբում, մարդկանց փոխադարձ աջակցություն. եթե դու առողջ ես ու կարող ես քեզ թույլ տալ խնջույք անելու շռայլություն, ապա դա չես անում, որովհետեւ դա բարոյական չէ. չի կարելի խնջույք անել ժանտախտի ժամանակ:
«Խնջույք ժանտախտի ժամանա՞կ», թե «Սե՞ր ժանտախտի ժամանակ»: Ես նախապատվությունը տալիս եմ Գաբրիել Մարկեսին, ում գիրքը սիրո մասին է, այն սիրո, որը հաղթում է ամեն ինչ՝ ժամանակը եւ տարածությունը, կյանքում հանդիպող դժվարությունները եւ, նույնիսկ, մարդկային հոգու անկատարությունը, այն սիրո, որի արդյունքում տեղի է ունենում հրաշք. ծնվում է մարդ:
Գագիկ ՎԱՐԴԱՆՅԱՆ
Տնտեսագիտության դոկտոր, պրոֆեսոր
Կարծիքներ