Մերժված երեխաների խնդիրները

Հոկտեմբերի 12-16-ը կկայանա մանկապատանեկան ֆիլմերի 6-րդ միջազգային փառատոնը, որի կազմակերպիչն է Երեխաների եւ պատանիների համար կինոյի եւ հեռուստատեսության զարգացման «Ռոլան Բիկով» հիմնադրամը: Երեկ «Մոսկվա» կինոթատրոնում փառատոնի բացման արարողությունն էր, որ վարում էին պատանիները: Նրանք ներկայացրին փառատոնի տարբեր անվանակարգերում ընդգրկված ֆիլմերը եւ մանկապատանեկան ու պրոֆեսիոնալ ժյուրիի անդամներին:



Ողջույնի խոսքով հանդես եկան «Ռոլան Բիկով» հայկական հիմնադրամի նախագահ Նունե Մանուկյանը եւ ՄԱԿ-ի մանկական հիմնադրամի հայաստանյան գրասենյակի ներկայացուցիչ Լեյլի Մոշիրին: Այս տարի մանկապատանեկան փառատոնը ներմուծել է նոր՝ «Ես իրավունք ունեմ» մրցութային անվանակարգ, որը սահմանվել է «Ռոլան Բիկով» հիմնադրամի հայաստանյան գրասենյակի եւ ՅՈւՆԻՍԵՖ-ի հայաստանյան գրասենյակի կողմից: «Այս փառատոնը հզոր պլատֆորմ է, որտեղից արվեստի միջոցով մենք կարող ենք բարձրաձայնել մերժված երեխաների խնդիրները, մատնացույց անել նրանց առջեւ կանգնած մարտահրավերները»,-իր ուղերձում նշեց Լեյլի Մոշիրին:



Ֆիլմերի ցուցադրությունից զատ, փառատոնի շրջանակներում կանցկացվեն նաեւ վարպետության դասեր, մի շարք ուսումնական հաստատություններում կլինեն հանդիպումներ փառատոնի հյուրերի հետ: Մոսկվայի տանը «Ես իրավունք ունեմ» խորագրի ներքո կանցկացվի մարզերում ապրող երեխաների գեղանկարչական աշխատանքների ցուցահանդես: Կլինի այցելություն Գյումրիի «Թռչունյան տուն» մանկատուն: Կինոփառատոնի շրջանակներում կիրականացվի նաեւ «Դու մենակ չես, միասին կհաղթենք» խորագրով սոցիալական ծրագիր, որով նախատեսվում է անվճար բժշկական հետազոտություն անցկացնել երեխաների ու պատանիների շրջանում: Փառատոնի ընթացքում կցուցադրվեն 81 լիամետրաժ ու կարճամետրաժ, խաղարկային, վավերագրական եւ անիմացիոն ֆիլմեր 27 երկրներից: