Լավ պրծանք

Միջազգային իրավապաշտպան «Freedom House» կազմակերպության օրերս հրապարակած հաղորդագրությունից տեղեկանում ենք, որ Հայաստանը չի մտնում այն 17 երկրների ցուցակի մեջ, որոնք աշխարհում որակվել են որպես ամենառեպրեսիվն ու «տվյալ երկրի հասարակության համար ամենաանհարմարավետ կենսակերպ ապահովողները»:



Այնպես որ, կարող ենք հանգիստ շունչ քաշել. ըստ իրավապաշտպան կազմակերպության փորձագետների, մեզանից ավելի բեթար վիճակում դեռ ահագին երկիր է մնացել: Այս հարցում լավ պրծանք: Վերադառնալով վերոհիշյալ ցուցակին, ասենք, որ այն գլխավորում է Բիրման, որին հաջորդում են Հասարակածային Գվինեան, նորաստեղծ Էրիթրեան (որը մի քանի տարի առաջ է անջատվել Եթովպիայից. թե ասա, որ էդ օրը պիտի ընկնեիր, էլ ինչո՞ւ էիր անջատվում), Հյուսիսային Կորեան, Սոմալին, Կուբան, Սաուդյան Արաբիան, Թուրքմենստանը, Սիրիան եւ մանկական ստրկության վաճառքով աշխարհում անխոս լիդեր Սուդանը:



Այս եւ «սեւ ցուցակում» հայտնված մյուս երկրներն ամենացածր գնահատականներ են ստացել այնպիսի ոլորտներում, ինչպիսիք են քաղաքական ու քաղաքացիական իրավունքները, լրատվամիջոցների ու խոսքի ազատությունը, քաղաքացիական հասարակության առկայությունը: Այս երկրներում մարդիկ ամենաշատն են տուժում իրենց համալիր իրավունքների համակարգված խախտումներից:



Սակայն «Freedom House»-ի փորձագետները մտահոգ են այն իրողության կապակցությամբ, որ ՄԱԿ-ի մարդու իրավունքների խորհուրդը, ակտիվորեն ներգրավված լինելով մարդու իրավունքների ոլորտում խախտումների վերհանման, համաշխարհային հանրության ուշադրությունն այդ գերխնդրին բեւեռելու գործին, այնուամենայնիվ աչքաթող է անում Չինաստանին, որտեղ, ըստ փորձագետների, ամենաշատն են խախտվում մարդու իրավունքները:



Հիմա մարդ չի իմանում՝ նախանձի՞ չինացիներին իրենց տնտեսական աճի տեմպերի համար, թե՞ կարեկցի` նրանց իրավունքները ոտնահարվելու կապակցությամբ: Մի բան էլ է հետաքրքիր` չինացիները գիտե՞ն, որ իրենց իրավունքները ոտնահարվում են, թե՞ դրա մասին տեղյակ են միայն ամերիկացի փորձագետները:



Միգուցե իրենց պետք էլ չեն իրենց իրավունքները, մենակ թե թողնեն հանգիստ, տքնաջան աշխատեն: Ամեն դեպքում, հայերիս արժե չինացիների հետ փորձի փոխանակում անել` դուք մեզ իրական տնտեսական աճի տեմպեր, մենք ձեզ` իրավունքների համար պայքարի աննախադեպ օրինակներ...