Խաղաղ կարգավորումն այլընտրանք չունի
hraparak
9 Հունիս 2011 | 13:17
0
Հունիսի վերջին Կազանում Հայաստանի եւ Ադրբեջանի նախագահները կարող են հավանություն տալ ղարաբաղյան հակամարտության կարգավորման վերջնական փաստաթղթին՝ Արցախի Հանրապետության նախագահ Բակո Սահակյանի հետ մոտ երկու ժամ տեւած հանդիպումից հետո երեկ հայտարարել են ԵԱՀԿ Մինսկի խմբի համանախագահներ Ռոբերտ Բրադկեն (ԱՄՆ), Իգոր Պոպովը (ՌԴ) եւ Բեռնար Ֆասիեն (Ֆրանսիա): Մասնավորապես Մինսկի խմբի ֆրանսիացի համանախագահը հայտարարել է. «Մենք հույս ունենք, որ նախագահների` Կազանում կայանալիք առաջիկա հանդիպմանը կողմերը հավանություն կտան կարգավորման համար առաջարկվող փաստաթղթի արդեն վերջնական տարբերակին: Խոսքն այն փաստաթղթի մասին է, որը կողմերին է առաջարկվել մոտ երեք ամիս առաջ` Սոչիում»,- ասել է Բեռնար Ֆասիեն:
Քննարկվող փաստաթղթի մասին համանախագահներն ասել են նաեւ, թե դեռեւս հղկման ու փոխհամաձայնեցման կարիք կա: Հիշեցնենք, որ Ռուսաստանի նախագահ Դմիտրի Մեդվեդեւի միջնորդությամբ եւ մասնակցությամբ Կազանում հունիսի 25-ին նախատեսված է Հայաստանի եւ Ադրբեջանի նախագահներ Սերժ Սարգսյանի եւ Իլհամ Ալիեւի հանդիպումը Լեռնային Ղարաբաղի հակամարտության խաղաղ կարգավորման հարցի շուրջ:
Երեկվա հանդիպման մասին, ի դեպ, կցկտուր տեղեկություն էր հաղորդվում Արցախի նախագահի մամլո ծառայության հաղորդագրությամբ, որում մասնավորապես նշված էր, որ հանդիպման ընթացքում ադրբեջանա-ղարաբաղյան հակամարտության կարգավորման եւ տարածաշրջանային գործընթացներին առնչվող տարբեր հարցերի քննարկման ընթացքում երկուստեք նշվել է, որ հակամարտության խաղաղ կարգավորումն այլընտրանք չունի:
Հանդիպմանը ներկա են եղել Արցախի Հանրապետության արտաքին գործերի նախարար Գեորգի Պետրոսյանը, ԵԱՀԿ գործող նախագահի անձնական ներկայացուցիչ Անջեյ Կասպրշիկը, պաշտոնատար այլ անձինք: Այսօր համանախագահները ժամանելու են Երեւան՝ հանդիպելու ԱԳ նախարար Էդվարդ Նալբանդյանի եւ նախագահ Սերժ Սարգսյանի հետ: Թերեւս այսօր պատկան մարմինները բացեիբաց կհայտնեն, թե կազանյան ուշագրավ հանդիպման ժամանակ կոնկրետ ինչպիսի փաստաթղթի տակ է ստորագրելու հայկական կողմը:
Կարծիքներ