Հետաձգումն անարդյունավետ է

Արցախյան հակամարտության կարգավորման հստակ սկզբունքների համաձայնեցման գործընթացի հետաձգումն անարդյունավետ է: Նման հայտարարությամբ է հանդես եկել Ռուսաստանի արտաքին գործերի նախարարության պաշտոնական ներկայացուցիչ Ալեքսանդր Լուկաշեւիչը: «Մեծ հույսեր կան, որ Դովիլում արված նախագահների հայտարարությունը կօգնի կողմերին գիտակցել այն գիծը, որտեղ հասել է կարգավորման քաղաքական գործընթացը: Այնուհետեւ հիմնական սկզբունքների ընդունման հստակ խնդիր է առաջանում»,- ասել է Լուկաշեւիչը:



Նրա խոսքով` հռետորաբանելու եւ գործընթացը հետաձգելու փոխարեն Հայաստանի եւ Ադրբեջանի նախագահները պետք է համաձայնության գան, ընդունեն սկզբունքները եւ աշխատեն այն մեծ փաստաթղթի վրա, որն էլ կորոշի կարգավորման պարամետրերը:



Հիշեցնենք, որ մայիսի վերջին ֆրանսիական Դովիլ քաղաքում կայացած Մեծ ութնյակի գագաթաժողովի շրջանակներում ԱՄՆ-ի, Ռուսաստանի եւ Ֆրանսիայի նախագահները հանդես էին եկել Արցախի հակամարտության վերաբերյալ հայտարարությամբ, որով Հայաստանի եւ Ադրբեջանի նախագահներին կոչ էին անում «հունիսին կայանալիք գագաթաժողովի ընթացքում ավարտել հակամարտության կարգավորման հիմնական սկզբունքների շուրջ աշխատանքները»: