Ռոբերտ Քոչարյանը որպես վկա հանդես չի գա
Այսօր Կենտրոն եւ Նորք Մարաշ վարչական շրջանների ընդհանուր իրավասության դատարանում շարունակվեց Ռոբերտ Քոչարյանն ընդդեմ «Հրապարակ» օրաթերթի գործով նախնական դատական նիստը: Ինչպես նախապես գրել էինք, այս ընթացքում կողմերը պետք է քննարկեին դատական վեճը հաշտությամբ ավարտելու տարբերակը, սակայն դատական նիստին պարզ դարձավ, որ հաշտություն չի կայացել, քանի որ հայցվոր կողմի ներկայացուցիչները հերքման տեքստի տպագրումը դիտում էին որպես հաշտության նախապայման: Այսօրվա դատական նիստին «Հրապարակի» ներկայացուցիչ Արա Զոհրաբյանը կրկին փորձեց հստակեցնել հայցի առարկան, թե հատկապես որ բառերն ու արտահայտություններն են որակվում որպես զրպարտություն, որոնք՝ վիրավորանք: Հայցվորի ներկայացուցիչներ Արփինե Մելիքբեկյանն ու Սարգիս Գրիգորյանը այսօր եւս պնդեցին իրենց միջնորդությունը՝ որպես վկա դատարան հրավիրել «Հրապարակ» օրաթերթի խմբագիր Արմինե Օհանյանին եւ վիճահարույց հոդվածի հեղինակ Լուսինե Պետրոսյանին: Արա Զոհրաբյանը իր հերթին միջնորդեց նման պարագայում որպես վկա հրավիրել նաեւ ՀՀ նախկին նախաագահ Ռոբերտ Քոչարյանին, քանի որ նրանից լավ ուրիշ ոչ ոք չի կարող ասել, թե հատկապես ինչից է վիրավորվել: Դատարանը ներկայացված միջնորդությունները բավարարեց մասնակի: Հաջորդ դատական նիստին վկայի կարգավիճակով դատարան կհրավիրվի հոդվածագիր Լուսինե Պետրոսյանը: Մանրամասները «Հրապարակի» վաղվա համարում:
Կարծիքներ