Թալանել են ԱԺ նախկին պատգամավորի տունը

Երեկ՝ օգոստոսի 21-ին, ժամը 06.10-ի սահմաններում, ոստիկանության Երեւան քաղաքի վարչության հերթապահ մասից Մալաթիայի բաժնում հաղորդում է ստացվել, որ դիմակավորված 5 անձինք զինված մտել են Կիլիկիա թաղամասի Սիսվանի փողոցի թիվ 57 տուն եւ զենքի սպառնալիքով հափշտակել ոսկեղեն ու գումար։ Նշված հասցե մեկնել են ոստիկանության Մալաթիա Սեբաստիա վարչական շրջանի ոստիկանության պետ, ոստիկանության գնդապետ Լեւոն Յազիչյանը, Երեւան քաղաքի վարչության քրեական հետախուզության բաժնի պետ Արտակ Կարապետյանը, ոստիկանության փորձաքրեագետներ, կինոլոգներ:



Ինչպես պարզվել է, նույն օրը՝ ժամը 05.00-ին, նշյալ դիմակավորված անձինք պատշգամբով մտել են ԱԺ նախկին պատգամավոր Նապոլեոն Ազիզյանի տուն, ծեծի ենթարկել նրան, կնոջը եւ դստերը, զենքի սպառնալիքով հափշտակել 35 հազար դոլար, 3,5 միլիոն դրամ, ոսկյա, արծաթյա եւ ադամանդե զարդեր եւ 6 արժեքավոր նկարներ, ինչից հետո դիմել են փախուստի:



Ազիզյանին, նրա կնոջը եւ դստերը տրվել են դատաբժշկական ուղեգրեր: Փաստի առթիվ ոստիկանության Մալաթիա Սեբաստիայի քննչական բաժնում հարուցվել է քրեական գործ։