Որեւէ նեղացածության զգացողություն չկա, քաղաքականության մեջ խաղացողը չպետք է նեղանա որեվէ մեկից

Գյումրու քաղաքապետի դաշնակցական թեկնածու, ՀՅԴ ցուցակը գլխավորած Աշոտ Կուրղինյանի հետընտրական տրամադրությունն արդեն նորմալ է։ Նա վերլուծել է իր եւ թիմի պարտության պատճառները, թե ինչպես ստացվեց, որ պարտվեցին, եւ հասկացել է, որ պետք է ավելի շատ բան անել, քան արված է մինչեւ հիմա։ Նկատենք, որ ՀՀԿ-ի կոալիցիոն գործընկեր Դաշնակցությունը պարտվեց մի մարզում, որի մարզպետը՝ Հովսեփ Սիմոնյանը, դաշնակցական է։

«Պրոցեսը՝ ընդհանուր առումով, որպես ընտրություն եւ ընտրական գործընթաց, գնահատում եմ նորմալ, մեր ցածր արդյունքի պատճառներն էլ փնտրում եմ միայն ու միայն մեր մեջ»,-ասաց նա։

- Ձեր մեջ, հատկապես ո՞ւմ՝ ՀՅԴ Շիրակի մարզային կառույցի՞, դաշնակցական մարզպետի՞, թե՞ ձեր թիմի, առհասարակ։

- Մարզպետի գործառույթների հետ ես ընդհանրապես կապ չունեմ, հիմնականում Դաշնակցության հավաքական կերպարի՝ Շիրակի մարզում։ Կառույցն այդ նախընտրական կարճ շրջանում երեւի թե չէր կարող անել այն, ինչ պետք էր անել։ Եվ մենք հետեւություններ ենք արել, 2017-ին էլ նույն վճռականությամբ մասնակցելու ենք։

- Այդուհանդերձ, ակնկալիք կար, որ դաշնակցական մարզպետը կաջակցի, որ Գյումրիում իր կուսակցությունը բավարար արդյունք ապահովի։

- Նման հարցերը պետք է ուղղել Դաշնակցության Գերագույն մարմնին, որովհետեւ ե՛ւ կադրային հարցերով, ե՛ւ մնացած հարցերով պատասխանատուն իրենք են։ Իրենք էլ, կարծեմ, մի քանի հարցազրույցներում գնահատականներ տվել են, հետեւություններ կանեն կամ չեն անի։

- Իսկ ինչպե՞ս ստացվեց, որ Վանաձորում ՀՅԴ-ն կարողացավ անցողիկ շեմը հաղթահարել, իսկ Գյումրիում՝ ոչ։

- Գործընթացներ տեղի ունեցան, Վանաձորում ժողովուրդը որոշեց Դաշնակցությանը մի քիչ ավելի շատ քվե տալ եւ շեմն անցկացնել, Գյումրիում որոշեց չտալ։ Ժողովրդի կարծիքը հարգում ենք։

- Անձամբ Ձեր թերացման կամ ոչ արդյունավետ աշխատանքի խնդիրը տեսնո՞ւմ եք այս ձախողման մեջ։

- Կոնկրետ իմ՝ ոչ։

- ՀՅԴ Գերագույն մարմինը քննարկե՞լ է այս հարցը, ի՞նչ գնահատական է տվել սրան։

- Գնահատականը դեռ առջեւում է, գիտեմ, որ զբաղվում են։ Գերագույն մարմնի համար այս արդյունքը, մեղմ ասած, գոհացուցիչ չէր, ինչպես նաեւ բոլորիս համար։ Մենք՝ որպես քաղաքական կառույց եւ կուսակցություն, որ անելիքներ ունի եւ անելու է, անելու ենք հետեւություններ եւ շարժվելու ենք առաջ։

- Գյումրիում այն ուժերը, որոնք անցել են ավագանու կազմ՝ «ԳԱԼԱ»-ն, ԲՀԿ-ն եւ «Հայկական վերածնունդը», պատրաստվում են բոյկոտել ավագանու նիստերը։ Դուք սրան ինչպե՞ս եք վերաբերվում։

- Նորմալ, քաղաքական ուժերն իրենք են որոշում իրենց կեցվածքը։ Բնականաբար, նորմալ քաղաքական գործընթացներ են, էս ամեն ինչը եւս մեկ անգամ փաստում է, ինչի մասին ես նախընտրական շրջանում շատ եմ ասել, որ քաղաքականացված ընտրություններն ամենաճիշտ ընտրություններն են, որովհետեւ տեսնում ենք քաղաքական պայքար ե՛ւ Վանաձորի օրինակով, ե՛ւ Գյումրիի օրինակով։ Ուրախ եմ, որ Դաշնակցությունն իր՝ մեղմ ասած, լուման, հսկայական ծառայությունը մատուցել է, որպեսզի մեր ժողովրդին քաղաքական հարթության մեջ բերի ընտրություններին, այլ ոչ թե թաղային կամ անձնական։

- Ամեն դեպքում՝ այդ թաղայինն ու անձնականը դարձյալ աշխատեցին այս ընտրություններում։

- Իհարկե, աշխատեցին։ Իներցիոն երեւույթներ են, կանցնեն, հաջորդ ընտրություններին ավելի քիչ կլինեն։

- Կարո՞ղ է նեղացածություն, նեղսրտում կա Ձեր կուսակցությունից, մարզային կառույցից կամ գյումրեցիներից։

- Որեւէ նեղացածության զգացողություն չկա, քաղաքականության մեջ խաղացողը չպետք է նեղանա որեւէ մեկից, այլ պետք է հետեւություններ անի։

- Գյումրիում, այդուհանդերձ, շատերն անձերի համար ձայն տվեցին կուսակցություններին։ Ձեր անձը բավականին դրական էր ընկալվում գյումրեցիների շրջանում։ Ձեզ ձայն չտալն ինչո՞վ եք պայմանավորում՝ Ձեր անձո՞վ, թե՞ կուսակցությամբ։

- Ընդհանուր առմամբ՝ այս անգամ եղավ խառը՝ ե՛ւ անձի գործոնն աշխատեց, ե՛ւ կուսակցության, մենք անելու ենք հետեւություններ այս ամեն ինչից։ Ես ուրախ եմ եւ վստահ եմ, որ իմ անձն ինչպես ընկալվել է գյումրեցոնց կողմից, նույն ձեւով էլ շարունակում է ընկալվել։

Վահե ՄԱԿԱՐՅԱՆ