Մնջոյանի անվան ինստիտուտի աշխատակիցները մտադիր են խոչընդոտել բազմաբնակարային շենքի կառուցմանը
Դեռևս 2007 թվականին ապօրինաբար օտարված ջրավազանի տեղում, հիշեցնենք, որ ծրագրում են կառուցել բազմաֆունկցիոնալ բնակելի համալիր` 18 հարկանի շենք: Ինստիտուտի Օրգանական և դեղագործական կենտրոնի գիտության գծով փոխտնօրեն Ռոբերտ Հակոբյանն ասում է. «Խոսքն այն մասին է, որ Ազատության պող․ 26 հասցեում գտնվող ջրավազանը 2006 թվականին ապօրինաբար օտարվել է: Ավելին, 2017 թվականին քրեական գործ է հարուցվել, ապացուցվել է, որ քաղաքապետարանի տարբեր կառույցների աշխատակիցներ տարբեր տեսակի խախտումներ են արել՝ այդ վաճառքն ապահովելու համար։ Եվ հանձնարարվել է քաղաքապետարանին հետ գնել, ինչը չի արվել՝ մի բան էլ 2019 թվականին թույլ են տվել, որ նորից վերավաճառվի, ու այսօրվա գնորդը, որ իր տեսանկյունից բարեխիղճ է, և այդ գնորդին մի բան էլ շինթույլտվություն են տվել»։
Գնորդը «Գրին Փրոփերթի Դիվելոփմենթ»-ն է, որը 2019-ին է ձեռք բերել ու երևի 7-րդ կամ 8-րդ ձեռքբերողն է, որը օրենքի տեսանկյունից հիմա արդեն բարեխիղճ գնորդ է համարվում՝ նկատում է վերջինս։
Ինստիտուտի աշխատակիցները պատրաստվում են պայքարել, քայլերը բազմազան են լինելու՝ իրավականից մինչև սոցիալական պայքար, որովհետև գործնականում վերջիններս խանգարում են ինստիտուտի աշխատակիցներին աշխատել։
«Տրամաբանությունից ելնելով մենք էլ իրենց չենք թողնի աշխատել և միևնույն ժամանակ պահանջում ենք Երևանի պատկան մարմինների, ինչպես նաև մեր ոլորտի պատասխանատուների այցը եւ խնդրին լուծում տալ, ոչ թե, այսպես ասած՝ երկու շաբաթում կպատասխանենք, բայց երեք ամիս է` պատասխան չկա, ու այդ տրամաբանությամբ մարդիկ շարունակեն առաջ գնալ»,-եզրափակեց Հակոբյանը։
Այսօր ինստիտուտի շենքում՝ Ազատություն 26 հասցեում աշխատակիցներն ակցիա արեցին եւ հայտարարեցին իրենց վճռականության մասին` շարունակելու պայքարը։
Կարծիքներ