Մտավորականներ, որոնք երբեք չեն մերժում իշխանության հրավերը

Դեռ 2020-ի չարաբաստիկ պատերազմից հետո Հայաստանի գրողների միության նախագահ Էդվարդ Միլիտոնյանը գրողների միության անունից հանդես եկավ վարչապետ Նիկոլ Փաշինյանի հրաժարականի պահանջով: Գրողների միությունն ունի 500-ից ավելի անդամ, ուստի 500 գրող չէր կարող քաղաքական նույն դիրքորոշումն ունենալ եւ որոշ իշխանամետ գրողներ այդ ժամանակ ըմբոստացան՝ նշելով, թե Միլիտոնյանն իրավունք չունի հանդես գալ բոլորի անունից: 

Սակայն զարմանալին այսօր այն է, որ Նիկոլ Փաշինյանի հրաժարականի պահանջով հանդես եկող Էդվարդ Միլիտոնյանը, որն, ի դեպ, երբեք աչքի չի ընկել խիզախությամբ ու կամային կեցվածքով, երեկ մի խումբ մշակութային գործիչների հետ այցելել է նախագահական, հանդիպել ՀՀ նախագահի լիազորությունները կատարող Ալեն Սիմոնյանին եւ ինչ-որ «հույժ կարեւոր» հարցեր քննարկել: Հանդիպումն անցել է շատ ջերմ մթնոլորտում: Ասես ոչինչ չէր էլ պատահել: 

Նույն Էդվարդ Միլիտոնյանը 2012 թվականին նախագահ Սերժ Սարգսյանի հրամանագրով արժանացել է ՀՀ մշակույթի վաստակավոր գործչի կոչմանը, թե որ արժանիքի համար, երեւի կոչումը շնորհողին է հայտնի:

Ալեն Սիմոնյանի հետ «պալատական խրախճանքին» մասնակցած Ռուբեն Մաթևոսյանն էլ Մովսես Խորենացու մեդալով է պարգևատրվել 1998 թվականին՝ նախագահ Ռոբերտ Քոչարյանի կողմից, իսկ նախագահ Սերժ Սարգսյանի կողմից պարգևատրվել է Սուրբ Մեսրոպ Մաշտոց շքանշանով՝ 2011 թվականին և Պատվո շքանշանով՝ 2016 թվականին: 

Ներկաներից Ռոբերտ Ամիրխանյանը «Սուրբ Մեսրոպ Մաշտոց» շքանշանով պարգևատրվել է կրկին նախագահ Ռոբերտ Քոչարյանի կողմից 1998 թվականին, իսկ նախագահ Սերժ Սարգսյանի կողմից՝ Պատվո շքանշանով 2017 թվականին: Հանրայինի հնաբնակ, «անմահ հաղորդավարուհի» Նարա Շլեպչյանը, որը նույնպես սիրալիր ժպտում էր ԱԺ նախագահի պաշտոնակատարին, Ռոբերտ Քոչարյանի կողմից պարգևատրվել է Մովսես Խորենացու մեդալով 2001 թվականին, իսկ նախագահ Սերժ Սարգսյանի կողմից 2016 թվականին պարգևատրվել է «Հայրենիքին մատուցած ծառայությունների համար» 1-ին աստիճանի մեդալով։

Հովհաննես Չեքիջյանը, որը եւս ԱԺ նախագահով տարված մասնակցում էր հանդիպմանը, նախագահ Սերժ Սարգսյանի կողմից 2010 թվականի պարգևատրվել է Սուրբ Մեսրոպ Մաշտոցի շքանշանով, իսկ 2017 թվականին պարգևատրվել է «Հայրենիքին մատուցած ծառայությունների համար» 1-ին աստիճանի շքանշան և Հայրենիքի շքանշանով՝ արժանանալով Ազգային Հերոսի կոչման։ 

Ռաֆայել Քոթանջյանին եւս 2003 թվականի Նախագահ Ռոբերտ Քոչարյանը շնորհել է ՀՀ ժողովրդական արտիստի կոչում և պարգևատրել Մովսես Խորենացու մեդալով։ 2017 թվականին Նախագահ Սերժ Սարգսյանը պարգևատրել է «Հայրենիքին մատուցած ծառայությունների համար» 1-ին աստիճանի շքանշանով։ Դերասանուհի Էվելինա Շահիրյանը, որը նույնպես մասնակցում էր հանդիպմանը, Ռոբերտ Քոչարյանի կողմից 2003 թվականին ստացել է ՀՀ վաստակավոր արտիստի կոչում, իսկ 2014 թվականին Սերժ Սարգսյանը պարգևատրել է Մովսես Խորենացու մեդալով։ 
Դե, ինչ արած, նրանք միշտ բոլոր իշխանությունների կողքին են, նրանց նվիրված, երբեք չեն քննադատում իշխանություններին, չեն նկատում մեր հայրենիքի ծանր վիճակը, չեն տառապում Արցախի կորստից, չեն ցավում մեր զոհերի համար․․․կամ գոնե այդ մասին չեն բարձրաձայնում։