11 գնում, որից կարելի է հեշտությամբ խուսափել՝ Ամանորից հետո անփող չմնալու համար
Hraparak
10 Դեկտեմբեր 2022 | 21:30
0
Մոտենում է ձմեռային տոների ժամանակը, որին սպասել ենք ամբողջ տարի։ Իսկ սա նշանակում է, որ անկախ ամեն ինչից, մեզ սպասում են ոչ միայն նվերներ, այլև տպավորիչ ծախսեր։ Ըստ հարցումների՝ մարդկանց մեծամասնությունը կարիք է զգում այս ընթացքում հատկապես ավելի շատ ծախսել, քան կցանկանար, և հարցվածների 2/3-ը նույնիսկ պատրաստ է պարտքերի մեջ մտնել։ Բայց չէ՞ որ, եթե լավ մտածենք՝ շատ ծախսերից կարելի է խուսափել։
Ապրանքներ՝ օֆլայն-խանութներից
Տոներից առաջ խանութ կամ շուկա գնալն արդեն ավանդույթ է, բայց ավանդույթը, անկեղծ ասած, էժան չէ։ Երբ մենք շրջում ենք սուպերմարկետով և տեսնում ենք այս ամբողջ շքեղությունը դարակների վրա, դժվար է դիմադրել և հստակ հետևել գնումների ցուցակին (եթե, իհարկե, չեք մոռացել դա կազմել): Ամանորյա աղմուկը կրակի վրա յուղ է լցնում: Արդյունքում մենք վերցնում ենք ավելին, քան անհրաժեշտ է, այն էլ՝ ուռճացված գներով։
Եթե մենք օգտվում ենք առաքման ծառայություններից, ապա ցուցակին հավատարիմ մնալու հավանականությունը մեծանում է, քանի որ դիմակայել գայթակղությանը, երբ գեղեցիկ ցուցափեղկեր չենք տեսնում, բուրմունքներ չենք զգում, շատ ավելի մեծ է։ Իսկ առցանց գնումներ կատարելիս շատ ավելի հեշտ է տեղեկատվություն գտնել ակցիաների և զեղչերի մասին, գների պիտակները ապակողմնորոշիչ չեն, և կարող եք նաև քեշբեք ստանալ: Որոշ ապրանքներ պետք է պատվիրել նախապես՝ տոնական թանկացումից առաջ՝ պահածոներ, ձավարեղեն, ալյուր, միս, որը նախատեսում եք սառեցնել։
Աղցանների կույտ
Ամանորի գիշերը հաճելի է նստել սեղանի շուրջ, որն ունի տարբեր ուտեստների մեծ տեսականի։ Բայց դա մեծ գումար է պահանջում: Մնացած աղցանների մեծ մասը հետագայում նետում ենք աղբարկղ: Գումար խնայելու համար ավելի լավ է խուսափել սովորական մայոնեզային աղցաններից և խորտիկներից՝ մտածելով, թե իրականում ինչ եք ուտում դուք և ձեր հյուրերը, և ինչին ձեռք չեն տալիս: Դրամապանակի և ստամոքսի համար շատ ավելի նախընտրելի կլինի որևէ թեթև բան մատուցելը, իսկ սովորական կրեմով տորթը փոխարինել կոճապղպեղով և գլազուրով համեմված թխվածքաբլիթներով։
Վերջին պահին գնված նվերներ
Ամենավատ գաղափարը Ամանորի նախաշեմին նվերներ գնելն է: Ամենայն հավանականությամբ, դուք կստանաք մի բան, որն իսկապես անհրաժեշտ չէ, այն էլ՝ ուռճացված գնով։ Ավելի լավ է նախօրոք մտածել նվերների մասին և մտերիմ մարդկանց նվիրել իսկապես յուրահատուկ մի բան՝ գնված կամ պատրաստված հատուկ նրանց համար։
Եթե Ամանորից մի քանի ամիս առաջ մտածեք նվերների մասին, ապա, անշուշտ, ժամանակ կունենաք լավ առցանց խանութ գտնել և խնայել առաքման ծախսերը՝ այդկերպ միանգամից մի քանի ապրանք պատվիրելով տարբեր մարդկանց համար։
Բարդ հանդերձանքներ
Պետք չէ տոնը վերածել դրես-կոդով տոնակատարության, որպեսզի անհրաժեշտ լինի գումար ծախսել երեկոյան զգեստի կամ կոստյումի վրա, որը, ամենայն հավանականությամբ, հետո փոշի կհավաքի պահարանում։ Ընտրեք հարմարավետ հագուստ՝ ջինսեր, շապիկներ, տաբատներ, քանի որ լավ ժամանակ անցկացնելու համար շրջապատում ձեզ անհրաժեշտ են ճիշտ մարդիկ, ոչ թե թանկարժեք հագուստ։
Տոնածառներ՝ երեխաների համար
Շատ ծնողներ վստահ են, որ ինչքան շատ տոնածառ լինի, այնքան լավ, և երեխաներին տանում են ամանորյա բոլոր ներկայացումներին, որտեղ կարող են տոմս ձեռք բերել։ Նման միջոցառումներն ամենևին էլ էժան չեն, և դրանց որակը շատ կասկածելի է։
Երեխաները շատ ավելի լավ կհիշեն, թե ինչպես են բակում ձնեմարդ սարքել, օգնել թխվածքաբլիթներ թխել, ամանորյա զարդարանքներ պատրաստել: Ամանորյա եռուզեռն առավել բազմազան դարձնելու մեկ այլ միջոց է օրացույց կազմելը: Հավատացեք, սրանք այն հիշողություններն են, որոնք կյանքի ընթացքում կմնան երեխաների հետ, և ժամանակի ընթացքում տոնածառները նրանք մտքում կվերածվեն պարզապես աննշան դիպվածների։
Խաղալիքներ, որոնք ոչ մի բանի չեն համապատասխանում
Ինչ վերաբերում է դեկորացիաներին, ապա կարող եք գումար տնտեսել՝ օգտագործելով այն խաղալիքներն ու դեկորները, որոնք ձեռք են բերվել նախորդ տոների ընթացքում և դեռ ներկայանալի տեսք ունեն: Եթե դեռ նոր և անսովոր բան եք ուզում, ապա փորձեք ձեր սեփական ձեռքերով զարդարանք պատրաստել կամ տոնածառի վրա կախել չոր նարնջի կտորներ՝ կապված դարչինով։
Նվերների թուղթ և փաթեթներ
Նվերների փաթեթավորման կամ փաթեթների վրա գումար տնտեսելու ամենահեշտ ձևը՝ դրանք կրկին օգտագործելն է: Դեն մի՛ նետեք ձեր նվերների փաթեթները և զգուշորեն բացեք նվերները՝ թուղթը լավ վիճակում պահելու համար: Կարող եք նաև նորից օգտագործել այլ տեսակի թուղթ, օրինակ՝ տպագիր թերթի կտոր կամ շագանակագույն կրաֆթ թուղթ: Դուք կարող եք գնել սովորական թուղթ և զարդարել այն ժապավենով, մակագրություններով և գունավոր մարկերների միջոցով արված գեղեցիկ ու խորհրդանշական պատկերներով:
Կոմպլեկտներ
Հաճախ որպես նվեր ընտրվում են կոսմետիկ խնամքի պարագաներ՝ մտածելով, որ սա շահավետ գնում է։ Այնուամենայնիվ, դրանք հաճախ ավելի թանկ են, քան նույն ապրանքները, բայց առանձին գնված:
Այստեղ դուք կարող եք գումար խնայել՝ գնումը հետաձգելով հաջորդ տարվա համար։ Տոներից հետո գները կտրուկ կնվազեն, և հնարավորություն կլինի մտածել Մարտի 8-ի նվերի մասին։ Մնում է միայն ապրանքը տուփից դուրս հանել:
Գեղեցիկ փաթեթավորմամբ ապրանքներ
Սեղանի տեքսն ու պարունակությունը ցանկացած տոնի անբաժանելի մասն են և հաճախ բավականին մեծ ծախսեր են պահանջում։ Շատերը ձգտում են օգտագործել ամենալավ և որակյալ ապրանքները, որոնք սովորական ժամանակ չեն գնվում: Նրանք գեղեցիկ տեսք ունեն և սուպերմարկետների դարակներից «աչքով են անում», բայց հաճախ սա պարզապես մարքեթինգային հնարք է: Փաթեթավորումը կարող է շքեղ թվալ, բայց եթե ուշադրություն դարձնեք բաղադրիչների ցանկին, ապա պարունակությունը կարող է տհաճորեն զարմացնել։
Հրավառություններ
Հրավառությունը թանկ (և, ի դեպ, ոչ անվտանգ) հաճույք է։ Ամեն տարի հազարավոր մարդիկ գնում են հրավառ տեխնիկա, իսկ Ամանորի գիշերը վերածվում է թնդանոթային աղմուկի։ Օգտվե՛ք այլ տարբերակից. փող ծախսելու փոխարեն դիտե՛ք ձեր հարևանների կազմակերպած հրավառությունը, գնացե՛ք քաղաքի գլխավոր Տոնածառի մոտ, վստահաբար նման տեսարանի պակաս չի լինի:
Հուշանվերներ տարվա խորհրդանիշներով
Մենք բոլորս սիրում ենք գնել գալիք տարվա խորհրդանիշով արձանիկներ և այլ հուշանվերներ, սակայն նման զարդարանքները ոչ պրակտիկ են և, ամենայն հավանականությամբ, կդառնան ձեր դարակներում փոշի հավաքող ևս մեկ առարկա, քանի որ երկար ժամանակ կրկին կիրառելի չեն լինի։ Խուսափեք նման հուշանվերներից, եթե ցանկանում եք ամեն տարի խուսափել մեծ գումարներ ծախսելուց և իրերն օգտագործել ապագա տոնակատարությունների համար:
Մենք ոչ մի կերպ խորհուրդ չենք տալիս տոներին միացնել «ժլատության ռեժիմը», պարզապես ուզում ենք զերծ պահել հիասթափությունից և ավելորդ ծախսերից։ Անշուշտ, դուք ունեք գումար խնայելու ձեր սեփական միջոցները, և մենք ուրախ կլինենք, եթե դրանք կիսվեք մեզ և այլ ընթերցողների հետ:
Կարծիքներ