Ի հավերժացում զոհված հայորդիների
Ազգովի սգում ու դեռ երկար ժամանակ սգալու ենք մեր նահատակների համար. ոմանք անարցյունք ու լուռ` իրենց հոգիների խորքերում, ոմանք՝ բացահայտ, արցունքներն աչքերին, առանց իրենց հոգիներին պատած անմորմոք վիշտը թաքցնելու: Այս սուգն էլ կանցնի, վերքերն էլ կսպիանան, ինչպես եղավ արցախյան առաջին և երկրորդ պատերազմների ժամանակ:
Ասվում են հիշատակի խոսքեր, որոնք, գուցե, կարևոր են, ձեռնարկվում են նախաձեռնություններ՝ զոհվածների ընտանիքներին սատարելու, գոտեպնդելու համար: Այս ամենը բնական է: Թվում է կարևոր, որ երեք պատերազմներից պետք է դասեր քաղել, որոնցից գլխավորը մարդկային անդառնալի կորուստներն ինչ որ կերպ վերականգնելն է:
Հայրենական մեծ պատերազմի ավարտից հետո, խորհրդային մյուս հանրապետությունների շարքում, Հայաստանը, նրա բնակչությունը ոչ միայն սգացել է 300 հազար հայորդիների համար, այլև համապատասխան վարքագիծ է դրսևորել՝ ընտանիքի պլանավորման հարցում, գուցե բնազդով: Պատերազմից վերադարձածները, թիկունքում հերոսական աշխատանքով հաղթանակի օրը մոտեցնողները զգացել են պատերազմում գրեթե 30 մլն խորհրդային մարդկանց կորստի ամբողջ ողբերգականությունը, իրենց հոգիների ողջ խորությամբ գիտակցել են, որ իրենք պետք է ապրեն նաև զոհվածների փոխարեն: Այս առումով, ԽՍՀՄ եվրոպական մասի քայքայված ու վերացված տնտեսության, մարդկային կորուստների վերականգնումը դարձան երկրի առաջնահերթություններ: Տնտեսությունը, ավերված քաղաքներն արագ վերականգնվեցին: Իսկ մարդկային կորուստները հնարավոր չէր վերականգնել կառավարության կամ կենտկոմի որոշումներով, գործեց մարդկային բնազդը և, անշուշտ, հատկապես պատերազմից վերադարձածների ենթագիտակցությունը. նրանցից շատերն իրենց երեխաներին անվանակոչում էին իրենց զոհված ընկերների անուններով: Նրանք ապրում էին իրենց և կորցրած մարտական ընկերների փոխարեն, սատարում զոհվածների ընտանիքներին:
Այլ է իրավիճակը մեր ժամանակներում: 20-րդ դարի երկրորդ կեսից գուցե ժողովրդագրության վրա ազդել են այլևայլ գործոններ. կարիերա, եկամուտներ, գործազրկության աճ ու նման բաներ: Բայց, 1950-ականներին խորհրդային մարդկանց կենսամակարդակն ավելի բարձր չէր, քան ներկայում: Մինչդեռ Հայրենական պատերազմի ավարտից հետո՝ 1950-1958 թվականների միջին ծնելիության գործակիցը կազմել է 37.8 (ծնվածների թվաքանակը 1000 բնակչի հաշվով):
Հայաստանի անկախության հռչակման տարվանից՝ 1991 թվականից ծնելիության գործակիցը ՀՀ-ում կայուն նվազման միտում է դրսևորել: Այդ միտման վրա չի ազդել նույնիսկ արցախյան առաջին պատերազմը, որի ժամանակ նահատակվեցին հազարավոր հայորդիներ, այսինքն՝ չի գործել նույնիսկ մարդկային սովորական բնազդը: Համեմատության համար՝ 1999-2008 թվականների միջին ծնելիության գործակիցը կազմել է 11.8, այսինքն՝ 20-ով պակաս, քան եղել 1941-45 թթ. պատերազմին հաջորդող ժամանակաշրջանում: Ավելին, նույնիսկ Արցախի բնակչությունն էապես չի ավելացել, մինչդեռ այն պետք է կրկնապատկվեր, եռապատկվեր:
ՀՀ-ում բնակչության բնական աճը խիստ բացասական միտումներ ունի. 2015 թ. ՝ 13.9 (1000 բնակչի հաշվով), 2016 թ.՝ 12.4, 2017 թ.՝ 10.6, 2018 թ.՝ 10.8, 2019 թ.՝ 9.8: Հավանաբար, 2020 թվականինը կկազմի 5-6 հազար, նկատի ունենալով, թե հիմնականում որ տարիքային կազմից են եղել զոհվածները (20-29 տարեկան): Նրանցից շատերն ամուսնացած էլ չեն եղել, իսկ ոմանք ունեցել են մեկ զավակ կամ սպասելիս են եղել առաջնեկին: Զոհվածների գոյություն ունեցող կամ պոտենցիալ կանայք, ենթադրաբար, պատկանել են 20-24 կամ 25-29 տարեկան կանանց խմբերին, որոնց ծնելիության միջին գործակիցը 2015-2019 թթ. եղել է համապատասխանաբար՝ 112.7 և 100 (համեմատության համար՝ 20-ից ցածրինը՝ 21.1, 30-35-ը՝ 57.4):
2015-2019 թվականներին տարիքային այդ 2 խմբերում նույնիսկ 2019 թվականի մակարդակի պահպանման դեպքում, կարելի է ասել, որ պատերազմի գլխավոր դասը չենք յուրացրել: Հետևաբար, ծնելիության գործակցի առնվազն կրկնակի բարձրացումը կենսական անհրաժեշտություն է մեր երկրի ապագայի համար:
Ընդ որում, խոսքը վերաբերում է ոչ այնքան բանակին անհրաժեշտ համալրում ապահովելուն, ինչն ինքնստիքյան հասկանալի է, այլ նրան, որ բնակչության թվաքանակի բացարձակ աճը նպաստում է երկրի տնտեսական զարգացմանը. դարեր շարունակ բնակչության թվաքանակում օժտվածների բաժնեմասը մնացել է անփոփոխ: Այսինքն, որքան մեծ է բնակչության թվաքանակը, այնքան մեծ է նրանում օժտված մարդկանց բացարձակ թիվը, ինչը, առաջին հերթին, տեխնոլոգիական զարգացման գրավականն է:
Կարծիքներ