ԱՄՆ-ը պետք է զսպի ադրբեջանա-թուրքական ագրեսիան. ՀՀ դեսպանը դիմել է Բայդենին
Ամերիկայի Միացյալ Նահանգներում արտակարգ և լիազոր դեսպան Վարուժան Ներսեսյանն ամերիկյան «ՆՅՈՒԶՎԻԿ» թերթում «Ամերիկան պետք է զսպի ադրբեջանա-թուրքական ագրեսիան» ("America Must Contain Azeri-Turkish Aggression") վերտառությամբ հոդված է հրապարակել 24.02.2021), որով ընդգծել է Միացյալ Նահանգների դերակատարության կարևորությանը Լեռնային Ղարաբաղի հակամարտության կարգավորման հարցում, տարածաշրջանում կայունության և անվտանգության պահպանման, թուրք-ադրբեջանական նկրտումները զսպելու հարցում։
«Որպես առաջնորդ մարդու իրավունքների և ժողովրդավարության առաջխաղացման մեջ՝ Ամերիկան հարգված է ամբողջ աշխարհում իր դիվանագիտական ու տնտեսական ազդեցությունն արդյունավետորեն տեղակայելու շնորհիվ՝ համաշխարհային խնդիրները լուծելու և տարածաշրջանային հակամարտություններին խաղաղ լուծում գտնելու համար:
Բայդենի վարչակազմի կողմից ավելի մեծ դիվանագիտական ներգրավվածության, ժողովրդավարության պաշտպանության ու մարդու իրավունքների գերակայության երաշխավորությամբ՝ մենք հուսով ենք, որ ավելի շատ ուշադրություն կտրվի Լեռնային Ղարաբաղում փխրուն իրավիճակին:
Սեպտեմբերի վերջին՝ համաշխարհային համաճարակի և թեժ մրցակցային ընտրությունների [ԱՄՆ նախագահական ընտրությունների] ֆոնին, Թուրքիան և Ադրբեջանը պատերազմ սկսեցին Լեռնային Ղարաբաղում՝ հայտնի նաև որպես Արցախ, և տեղահանեցին ևս տասնյակ հազարավոր մարդկանց:
Որպես երեք համանախագահներից մեկը ԵԱՀԿ Մինսկի խմբի՝ ստեղծված 1992-ին տարածաշրջանում հակամարտությունների լուծմանը օգնելու համար, Միացյալ Նահանգները վերջերս «բանակցային, համապարփակ ու կայուն կարգավորման» կոչ արեց Արցախի համար: Մենք ողջունում ենք այս կոչը, բայց, առանց նրանց ագրեսիայի համար հետևանքների՝ Թուրքիան և Ադրբեջանը սխալ դասեր կսովորեն այս հակամարտությունից:
Ադրբեջանը՝ Թուրքիայի աջակցությամբ, անտեսեց ԱՄՆ-ի՝ որպես խաղաղարարի դերը՝ ցույց տալով իր արհամարհանքը նույնիսկ ամենահիմնարար միջազգային նորմերի նկատմամբ: Օգտագործելով Ադրբեջանը որպես պատերազմ վարելու հաճախորդ պետություն՝ Թուրքիան բացահայտ խոստովանեց տապալումը գործուն խաղաղ գործընթացի, որը համանախագահում են ՆԱՏՕ-ի իր դաշնակիցները՝ ԱՄՆ-ն ու Ֆրանսիան:
Թուրքիան օգտագործում էր ՆԱՏՕ-ի AWACS համակարգը [Օդային նախազգուշացման ու վերահսկման համակարգը], ինչպես նաև ամերիկյան Ֆ-16 ինքնաթիռներ` ի աջակցություն Ադրբեջանին, որը բացահայտ խախտում է այդ ինքնաթիռների տեղակայումից զերծ մնալու իր համաձայնությունը: Թուրքիան հավաստիորեն մեղադրվում էր երկուստեք արևմտյան կառավարությունների ու հարգված լրատվամիջոցների կողմից սիրիացի ջիհադիստ մարտիկներին հավաքագրելու և տարածաշրջան տեղափոխելու մեջ:
Միևնույն ժամանակ, Ադրբեջանը բազմիցս գնդակոծեց առաջնագծից հեռու տեղակայված ծննդատներ, շուկաներ ու տաճարներ և օգտագործեց միջազգայնորեն արգելված կասետային զինամթերք բնակելի վայրերում ու սպիտակ ֆոսֆորային ռումբերի նման հրկիզիչ զենքեր:
Էթնիկական զտումների նպատակով՝ օկուպացված տարածքներում տեղի է ունեցել հայկական մշակութային ու քրիստոնեական կրոնական ժառանգության լայնատարած պղծում: Վերջին հրադադարից ի վեր ադրբեջանցի զինվորները սոցիալական ցանցերում տեղադրել են հայ ռազմագերիների խոշտանգումները: Առցանց տեղադրված սարսափելի տեսանյութերը ներկայացնում էին ադրբեջանական ուժերի կողմից ԻԼԻՊ-ի ոճով տարեց քաղաքացիականների գլխատումը:
Տևական խաղաղություն հնարավոր չէ, եթե Ադրբեջանն ու Թուրքիան անպատիժ մնան: Նրանք կշարունակեն իրենց ագրեսիան հայերի նկատմամբ և հետո:
Վերջերս Ադրբեջանի նախագահ Իլհամ Ալիևը պնդեց, որ Հայաստանի Հանրապետության ներսում գտնվող տարածքները, ներառյալ՝ մայրաքաղաք Երևանը, բոլորը պատկանում են Ադրբեջանին: Առանց միջազգային խիստ դատապարտման՝ նման հայտարարությունները կարող են հանգեցնել նոր բռնությունների: Հաշվի առնելով տարածաշրջանում պատմությունը, ներառյալ՝ մեկ դար առաջ տեղի ունեցած Հայոց ցեղասպանությունը, որը Թուրքիան շարունակում է ժխտել՝ այդ պնդումները չեն կարող աննկատ մնալ:
Թշնամանքի վերջին ցուցադրության ժամանակ Թուրքիան և Ադրբեջանը զորավարժություններ են անցկացրել Լեռնային Ղարաբաղից հեռու՝ Հայաստանի հետ Թուրքիայի սահմանի երկայնքով:
Միացյալ Նահանգներում և ամբողջ աշխարհում հայերը հույս ունեն, որ Միացյալ Նահանգները սկզբունքային դիրքորոշում կդրսեւորեն` աջակցելով հակամարտության համապարփակ քաղաքական կարգավորմանը: Դա չի կարող տեղի ունենալ, քանի դեռ հակամարտության բուն պատճառը՝ կարգավիճակի հարցը, չի լուծվել։
Որպես ելակետ՝ Ամերիկան պետք է միանա մեզ՝ պահանջելով, որ Ադրբեջանն անվերապահորեն վերադարձնի մոտ 200 հայ ռազմագերիներին: Այս հիմնական մարդասիրական ժեստի բացակայությամբ, երկխոսությունն ու բանակցությունները չեն կարող հաջողել:
Երկրորդ, Բայդենի վարչակազմը կարող է դադարեցնել արտաքին օգնությունն Ադրբեջանի զինված ուժերին: 2018 և 2019 ֆիսկալ տարիներին Թրամփի վարչակազմը ավելի քան 100 միլիոն ԱՄՆ դոլարի ռազմական և անվտանգային օգնություն է տրամադրել Ադրբեջանին՝ ռեսուրսներ, որոնք, ամենայն հավանականությամբ, օգտագործվել են հայ քաղաքացիականների և զինվորների դեմ:
Բացի այդ, դեպի Թուրքիա և Ադրբեջան զենքի արտահանման բոլոր լիցենզիաները պետք է մերժվեն: Էրդողանի և Ալիևի կառավարությունների նկատմամբ անհրաժեշտ է կիրառել համաշխարհային տնտեսական ու քաղաքական պատժամիջոցներ:
ԱՄՆ Կոնգրեսը պետք է հետևի Ֆրանսիայի երկուստեք պալատների [խորհրդարանների] և մի շարք այլ եվրոպական խորհրդարանների սկզբունքային օրինակին, որոնք կողմ են քվեարկել Արցախի Հանրապետության ինքնորոշմանը:
Որպես ԵԱՀԿ Մինսկի խմբի համանախագահության իր բաժնի՝ մենք ԱՄՆ-ին կոչ ենք անում աջակցել Ադրբեջանի կողմից Լեռնային Ղարաբաղի տարածքների դեօկուպացիային: Սա ներառում է Արցախի վերջերս տեղահանված բնակչության անվտանգ և արժանապատիվ վերադարձը իրենց տներ:
Ի վերջո, ԱՄՆ-ը պետք է դեմ լինի Թուրքիայի ցանկացած դերակատարությանը թե՛ խաղաղապահ, թե՛ խաղաղ գործընթացին Արցախում: Միջազգային հանրությունը չի կարող պարգևատրել Անկարային բացահայտ ագրեսիայի համար, որը խաթարում է համաշխարհայնորեն տիտղոսավորված խաղաղության գործընթացը:
Եթե Ադրբեջանին ու Թուրքիային թույլ տրվի առևանգել ԵԱՀԿ Մինսկի խմբի խաղաղ կարգավորման գործընթացը (որն Ամերիկան համանախագահում է)՝ ուժ գործադրելով տարածաշրջանային անվտանգության ճարտարապետությունն իրենց ծավալապաշտական նկրտումների ուղղությամբ շրջելու համար, նրանք կանգ չեն առնի:
Ինչպես այժմ տեսնում ենք, Սիրիայում, Լիբիայում, Կիպրոսում, Էգեյան ծովում և Արցախում Թուրքիան դառնում է տարածաշրջանային սպառնալիք՝ օգտագործելով ջիհադիստների և Ադրբեջանի նման պետությունների վարձկան բանակները՝ իր ազդեցությունը նախագծելու և ընդլայնելու համար:
Թուրքիայի և Ադրբեջանի նման իր հաճախորդների կողմից ռազմատենչ վարքագիծը զսպելու համար Միացյալ Նահանգները պետք է տնտեսական ու դիվանագիտական ճանապարհներով միջազգային նորմերը կիրառի: Այլընտրանքը բոլորի համար ավելի վտանգավոր աշխարհն է»։
Կարծիքներ