Հո ինքնաձիգը չե՞նք վերցնելու գնդակոծենք, որ ընդդիմություն կոչվենք

Հարցազրույց ԲՀԿ-ական պատգամավոր Գեւորգ Պետրոսյանի հետ

- Պարոն Պետրոսյան, ԲՀԿ-ի դիրքորոշման մեջ վերջերս նկատելի է շրջադարձային փոփոխություն իշխանությունների նկատմամբ։ Արմատական ընդդիմությո՞ւն եք կարծես հավակնում դառնալ։ Դա նկատել են նաեւ իշխանականները, Անվտանգության խորհրդի վերաբերյալ հայտնի նախագծի քննարկման ժամանակ, ասում են, նախապես դրական ելույթներ ունեցաք, բայց մեկ օր հետո կողմ չքվեարկեցիք։

- Մենք միշտ էլ առանձին պատգամավորներով առանձին հարցերի վերաբերյալ ունենում ենք առանձին կարծիք, բայց խնդիրը եթե վերջնական քննարկված չէ խմբակցությունում, չի կարելի առանձին կարծիքը հիմք ընդունել որպես խմբակցության դիրքորոշում։ Կարող է այնպես լինել, որ խմբակցության մեկ-երկու պատգամավորի քվեարկությունը լինի բոլորովին այլ, բայց հետո խմբակցությունում հարցը քննարկվի եւ այլ որոշում կայացվի։ Սա ներկուսակցական դեմոկրատիայի վառ դրսեւորում է։ Այնպես որ՝ իշխանության նկատմամբ մենք բացարձակապես արհեստական սրում չենք ստեղծում, դա իրենց գնահատականն է, մենք որեւէ նախագծի կողմ կամ դեմ քվեարկելիս չափանիշ չենք ընդունում իշխանության հետ լավ ու վատ լինելու, սրվելու-չսրվելու հանգամանքը։ Մենք ելնում ենք մի չափանիշից՝ նախագծի ընդունում կամ չընդունումն ինչքանով է բխում ՀՀ ժողովրդի շահերից։ Մենք եթե բան ունենք, չենք ասում մեջքից, այլ ասում ենք ուղիղ։ 

- Բյուջե 2020-ի նախագծի քննարկման հենց սկզբում հայտարարեցիք, որ դեմ եք քվեարկելու, ասացիք, որ ձեր ակնկալիքները չի արդարացնում, իսկ մարդիկ հիշում են, որ շատ ավելի վատ բյուջեների նկատմամբ եք մեղմ եղել։

- Ովքեր այդպիսի կարծիք են հայտնում, խորհուրդ եմ տալիս լարել իրենց հիշողությունը եւ տեսնել, որ ԲՀԿ-ն վերջին երեք տարիներին ոչ մի բյուջեի էլ կողմ չի քվեարկել։ Ավելին, նույնիսկ բյուջեի կատարողականներին կողմ չի քվեարկել։ Այնպես որ՝ մերկապարանոց հայտարարություններ պետք չէ անել։

- Որո՞նք են գլխավոր պատճառները, որոնք թույլ չեն տալիս անգամ ձեռնպահ լինել։

- Երբ ասում են՝ հեղափոխական բյուջե, մենք հասկանում ենք, որ նման բյուջեով իշխանափոխություն արած ժողովրդի կյանքում պատկերացնում ենք կտրուկ փոփոխություններ։ Մենք գտնում ենք, որ այս բյուջեն ի վիճակի չէ ապահովել այդ կտրուկ փոփոխությունները, դրա համար էլ գտնում ենք, որ հեղափոխական բյուջե չէ, ինչպիսին իշխանությունն է ներկայացնում, դրա համար էլ դեմ պետք է քվեարկենք։

- Պարոն Պետրոսյան, վերջին շրջանում տեղեկություններ ենք ստանում, որ ԲՀԿ-ի վրա Ռուսաստանն է ներգործում, այսպես ասած՝ «դուխ տալիս», որ արմատական ընդդիմություն դառնաք։ Վերջին օրերին էլ ԲՀԿ ղեկավարն ու պատգամավորներ են այցելել Մոսկվա, եւ նրանց նույնպես այնտեղ գոտեպնդել են։

- Ես ուզում եմ Ձեզ հարց տալ․ օրինակ՝ անձամբ իմ եւ մի քանի պատգամավորների գործողություններում ի՞նչը չի եղել էլի համոզիչ, որ մենք իսկապես ընդդիմություն ենք, ասենք՝ ի՞նչ է պետք դրանից ավել։

- Ձեր դեպքում գուցե եղել է, բայց մենք ուրիշների կողմից «ջան-ջիգյար» ենք տեսել։

- Օրինակ՝ ո՞ւմ կողմից չի եղել նման վերաբերմունք՝ նույն Նաիրա Զոհրաբյանի, Միքայել Մելքումյանի, Տիգրան Ուրիխանյանի, Վահե Էնֆիաջյանի։ Ուրիշ ի՞նչ պետք է անեինք, պիտի դանակն առնեի ընկնեի Միրզոյան Արարատի հետեւից, խփեի կամ մեկ այլ իմքայլականի, որ համարվե՞նք ընդդիմություն։

- Ընդհանրապես, պատմությունն է վկայում, որ ԲՀԿ-ից ընդդիմություն այդպես էլ դուրս չի գալիս։ Օրինակ՝ կար ժամանակ, երբ որպես այլընտրանք էիք հանդես գալիս։

- Դա եղել է նախկինում՝ 2012-ին, ես դրա համար չեմ կարող պատասխան տալ, այդ ժամանակ պատգամավոր էլ չէի։ Եկեք թողնենք անցյալը։ Հիմա մենք օրենքի շրջանակներում ամեն ինչ անում ենք որպես ընդդիմադիր։ Խոսում ենք, ասում են՝ ատելության քարոզ եք անում, նպաստում եք համերաշխության մթնոլորտի չկայացմանը։ Դրանից ավել ես լավ չեմ պատկերացնում, թե ինչ պետք է անենք, հո ինքնաձիգը չե՞նք վերցնելու՝ գանք գնդակոծենք, որ համոզենք՝ ընդդիմություն ենք։ Եվ վերջապես՝ եթե մենք չենք արմատական ընդդիմությունը, բա ո՞վ է։ Դուք ցույց տվեք մի նախագիծ, որտեղ մենք իշխանության հետ գնացել ենք կուլիսային համաձայնության եւ համագործակցության։ Հակառակը՝ մենք միշտ ասում ենք, որ մեր ներկայացրած նախագծերը մերժում են կառավարությունում։ 

- Պարոն Պետրոսյան, ձեր շարքերում «խոցելի» մարդիկ կան, ասում են՝ դա է պատճառը, որ սրացման չեք գնացել։ Հիմա էլ՝ մի քիչ «ավելորդ» ակտիվություն, եւ, օրինակ, հարցաքննության կանչեցին Ծառուկյանի իտալացի գործընկերոջը, կամ՝ Արարատ Միրզոյանը եւ մյուսները հայտարարեցին, որ Վարդան Ղուկասյանը թալանել է Գյումրին։ Կարծես թե քրգործ է հարուցվել։ Չե՞ք մտահոգվում, որ քրեական գործերի տարափ կլինի ձեր կուսակիցների նկատմամբ։

- Վարդան Ղուկասյանի նկատմամբ որոշեցին գործ հարուցել այն ժամանակ, երբ վերջինս մի նախագծի կապակցությամբ դեմ արտահայտվեց։ Այդպիսի բան պատահում է երկրում քաղաքական հետապնդման մթնոլորտի առկայության պարագայում։ Բա եթե Վարդան Ղուկասյանն իրականում հանցագործ է, ինչո՞ւ իշխանությունն այսքան ժամանակ դրա մասին չէր հիշում։ Խայտառակություն է պարզապես քաղաքական այլախոհությունը նման տարբերակով ճնշելը, նման բան որեւէ իշխանության օրոք չի եղել։ Մենք, այդուհանդերձ, որեւէ մտահոգության ու մտավախության տեղիք չունենք։ Մենք գործել եւ գործում ենք «ԱԺ կանոնակարգ» օրենքի ու ՀՀ սահմանադրության համաձայն։ 

Ինչ վերաբերում է այդ հայտարարություններին, իրավապահները պետք է, դիցուք, Արարատ Միրզոյանին հրավիրեն հարցաքննության իր իսկ տված ցուցմունքների համար։ Եթե իրավապահները կունենան այդքան քաջություն եւ Միրզոյանին կհրավիրեն որպես վկա հարցաքննության, որպեսզի պատմի, թե ինչ է արել Ղուկասյանը, ինչպես է արել։ Եթե Վարդան Ղուկասյանը հանցագործություն է արել, թող պատասխանատվության ենթարկեն, եթե ոչ, ուրեմն Միրզոյան Արարատին թող պատասխանատվության ենթարկեն ակնհայտ սուտ ցուցմունքների ու հայտարարության համար։