Ո՛չ գալիս են, ո՛չ էլ ուշադրություն դարձնում. բնակիչները դժգոհում, իսկ կոյուղաջրերը հոսում են փողոցով
Արդեն 10 օր է, ինչ Հրազդան քաղաքի Ջրառատ թաղամասի կոյուղին խցանվել է, իսկ կոյուղաջրերը հոսում են փողոցով: Ըստ բնակիչների՝ խնդրի մասին տեղյակ է ե՛ւ թաղապետը, ե՛ւ քաղաքապետարանը ե՛ւ ջրմուղկոյուղին, սակայն որեւէ քայլ չեն ձեռնարկում խնդրի լուծման համար. «Սկզբից թաղամաս մտնող հատվածն էր խցանվել, կոյուղաջրերը լցվում էին մեր հողամասերը, տան բակերը, անցուդարձ չէր լինում: Եկան, էս հատվածի կոյուղին բացեցին, հիմա էլ՝ մի քիչ ներքեւ է խցանվել:
Առաջինը զանգեցինք թաղապետին, նա ասաց, որ տեղյակ է պահել քաղաքապետարանին եւ ջրմուղկոյուղուն: Մեր զանգից 10 օր է անցել, բայց ոչ մի կառույց խնդրին լուծում չի տալիս: Չենք կարողանում բակ դուրս գալ, երեխաներն անգամ փողոց դուրս չեն գալիս: Տան բակում անգամ չենք կարողանում նստել, ահավոր հոտ ա գալիս, խեղդվում ենք: Էս անելու բանա, թող գան իրենք բակում նստեն, տեսնեն ինչ ա կատարվում: Ընդանուր կոյուղին է խցանվել, ոչ մեկ չի մտածում, իսկ ընտրությունների ժամանակ գալիս էին խնդրում, որ սրան ընտրեք, նրան ընտրեք: Ընտրեցինք՝ որ էսօր մեր հարցին լուծում չտան»,-բողոքում են բնակիչները:
Խնդրի հետ կապված հարց ուղղեցինք Ջրառատ թաղամասի թաղապետ Ստեփան Կոտանյանին: Թաղապետը մեր հարցը լսելուց հետո ասաց. «Դուք հլա բնակիչներին հարցրեք, խի ա կոյուղին դուրս տալիս: Գոմերը միացրել են կոյուղուն, ինչքան գոմաղբ կա լցվում է կոյուղատարը: Մենք տեղյակ ենք, քաղաքապետարանի բնակֆոնդի բաժնին տեղյակ եմ պահել, նրանք էլ՝ ջրմուղին են ասել: Ջրմուղից ասել են՝ կգան, կմաքրեն: Մի քանի անգամ եկել են, չեն կարողացել մաքրել: Ոնց ջրի հաշվիչները դրեցին, քիչ ջուր են բաց թողնում, կոյուղին խցանվում է»: Մեր այն հարցին, ինչո՞ւ են թույլ տվել անասնագոմից դեպի ընդանուր կոյուղատար կոյուղագիծ անցկացնեն, որ նման խնդրի առաջ չկանգնեն, եւ ո՞վ պետք է այս ամենը վերահսկի. «Ես ինչ կարամ անեմ, թող ջրմուղը վերահսկի: Ես գնամ, ինձ չեն ասի, դու ո՞վ ես, որ եկել ես»,-ասաց թաղապետը:
Բնակիչներից ոմանք ասում են, որ այս հարցը պետք է կարգավորի ջրմուղկոյուղին, քաղաքապետարանը այստեղ ոչ մի գործառույթ չունի, ոմանք էլ՝ հակառակն էին պնդում, որ ե՛ւ ջրմուղկոյուղին, ե՛ւ քաղաքապետարանը պարտավոր են խնդրին լուծում տալ: Մինչ բնակիչները միմյանց հետ վիճում էին, թե ով է մեղավոր, բնակիչներից մեկն ասաց. «Սաղ լավ, հաշտվեք ու ապրեք, ոչ մեկն էլ չի գա, ոչ մի բան էլ չեն անի»:
Կարծիքներ