Ծառայությունից խուսափածների մասին օրենքն այլևս չի երկարաձգվելու

Գործադիրն այսօր որոշեց սահմանված կարգի խախտմամբ պարտադիր զինվորական ծառայություն չանցած քաղաքացիների մասին օրենքի գործողության ժամկետը երկարաձգել մինչև այս տարվա դեկտեմբերի 31-ը ու դրանից հետո այլևս չերկարացնել։ Այսինքն՝ այս օրենքը կգործի մինչև այս տարվա վերջը։ Պաշտպանության  նախարար Դավիթ Տոնոյանն ասաց, որ նախագծի ներկայացումը հիմնավորվում է նրանով, որ այն հնարավորություն կտա պարտադիր զինվորական ծառայությունից խուսափած և համապատասխան տարիքը լրացած քաղաքացիներին՝ վճարել օրենքով սահմանված գումարը և վերադառնալով հայրենիք՝  ազատվել քրեական հետապնդումից։

«Մենք, ըստ էության, ինչ ենք ասում, ասում ենք, որ այս երկար անունով օրենքի երկարացում այլևս չի լինելու, բայց այդ օրենքը շարունակում է ուժի մեջ մնալ մինչև սույն թվականի դեկտեմբերի 31-ը ներառյալ։ Ընդ որում, այս օրենքը վերաբերում է շատ մեծ թվով մարդկանց»,- օրենքի վերաբերյալ արտահայտվեց վարչապետը։

Դավիթ Տոնոյանն էլ հավելեց, որ մոտ 22 հազարի չափ քաղաքացիներ կան, որ խուսափել են ծառայությունից, և տեղեկացրեց, որ դիմումների քանակը մեծացել է։

Ուստի վարչապետը հայտարարեց, որ լավ չէ, որ այս օրենքն այլևս չի երկարաձգվելու, նրանք հնարավորություն ունեն հենց այսօր ինքնաթիռի տոմս առնել, մինչև դեկտեմբերի 31-ը գալ Հայաստան, անցնել բոլոր պրոցեդուրաներն ու Նոր տարին էլ նշել Հայաստանում։

«Այնպես որ՝ արձանագրենք, որ այս օրենքն այլևս չի երկարաձգվելու, այլևս չի լինելու և այս օրենքը գոյություն ունի մինչև 2019 թ․ դեկտեմբերի 31-ը ներառյալ։ Հունվարի 1-ին, 12:00-ից հետո այս օրենքն այլևս գոյություն չի ունենալու»,- ասաց վարչապետը։