Սոցիալական խնդիրներն էսօր էլ են գլուխ բարձրացրել․ Նիկոլ Փաշինյան

Վարչապետ Նիկոլ Փաշինյանից այսօր լրագրողները հետաքրքրվեցին, թե ինչո՞ւ որոշեց դեկտեմբերին անցկացնել արտահերթ ընտրությունները, ինչո՞ւ որոշեց արագացնել պրոցեսը։ Միայն այդ ԱԺ-ում ընդունված աղմկահարույց օրե՞նքն էր պատճառը։



«Ոչ միայն։ Քաղաքական գործըթնացներ եղան, ընտրություններ եղան, որտեղ ժողովրդի առաջ հարց դրվեց, և ժողովրդի պատասխանը ստացվեց։ Հիմա, եթե նրանք, ովքեր ասում են, որ վայ, Երևանի քաղաքապետի ընտրություններն էդ հարցի պատասխանը չէ, այսինքն՝ իրենք ի՞նչ, առաջարկում են, որ մենք ժողովրդին նո՞ր խնդրանքով դիմենք և ժողովուրդն արձագանքի՞ մեր խնդրանքին»,-նորից ժողովրդին ոտքի հանելու մասին ակնարկեց Նիկոլ Փաշինյանը։



**-Պարոն Փաշինյան, ասում են՝ մտավախություն ունեք, որ Ձեր վարկանիշը կիջնի, ժողովրդի մոտ ձմռանը դժգոհություն կառաջանա․․․**



-Հիմա կարող եմ Ձեզ խորհուրդ տալ հետևյալը, որ անցեք և կարդաք մայիսին վերլուծաբանների բազմաթիվ վերլուծությւոններ, ովքեր ասում էին, որ անխուսափելիորեն հինգ ամսից իմ վարկանիշը անկում է ապրելու, գահավիժելու է և այլն, և այլն։ Փաստորեն, մի քանի օր առաջ տեղի է ունեցել հարցում, և պարզվել է, որ ժողովրդի վստահությունը՝ պետության ղեկավարի նկատմամբ, Հայաստանի երրորդ հանրապետության պատմության համար աննախադեպ բարձր է։



**-Առջևում ձմեռ է, գազի, էլեկտրաէներգիայի գները չեն իջնելու, սոցիալական խնդիրները կարող են գլուխ բարձրացնել։**



-Այո, սոցիալական խնդիրներն էսօր էլ են գլուխ բարձրացրել, և ես ասում եմ, որ քանի դեռ էս բարիկադային վիճակից դուրս չենք եկել, սոցիալական խնդիրների լուծման ճանապարհին շատ լուրջ բարդություններ են առաջանալու։



**Վահե ՄԱԿԱՐՅԱՆ**