Վրաստանի պատմական տարին

2013-ը Վրաստանի համար պատմական տարի է լինելու` կարծում է Վրաստանի նախագահը: Միխայիլ Սահակաշվիլին նշել է, որ դա պայմանավորված է լինելու ոչ թե իր նախագահության ժամկետի ավարտով, այլ նրանով, որ կարվի այն ամենը, ինչ մինչ այդ չի արվել: Սահակաշվիլին ասել է, թե 2013-ին Վրաստանը կընդունի երկրի բնակչության թիվը գերազանցող ավելի քան 5 միլիոն զբոսաշրջիկների, գործազրկությունը 16 տոկոսից կկրճատվի 10-ի, վրացական երկաթուղիները կմիացվեն եվրոպականին, կավարտվեն կրթական ոլորտի բարեփոխումները, կլուծվեն ջրամատակարարման եւ ճանապարհային բոլոր խնդիրները:



«13-ն անհաջող թիվ է, բայց այն երջանիկ կլինի Վրաստանի համար, եթե այս ամենը ստացվի»,- ասել է Վրաստանի նախագահը: Նրա խոստումները, սակայն, ոչ թե պաշտոնը լքել պատրաստվող նախագահի, այլ նախընտրական քարոզարշավին մասնակցող թեկնածուի ճառ են հիշեցնում:  Նա նաեւ խոստացել է, թե հաջորդ տարի երկիրը երկնիշ տնտեսական աճ կարձանագրի:



«Մեր գլխավոր խնդիրն այն է, որ հաջորդ տարի եւ 2013 թվականին իրականացնենք պատմական նախագիծ. ամենուր պետք է լինեն ջուր, ճանապարհներ, երկաթուղիներ»,- եզրափակել է Վրաստանի նախագահը: