Եթե քաղաքական ուժերը հավանություն տան սահմանադրական բարեփոխումների հայեցակարգին, սահմանադրության այլ տարբերակ չի քննարկվի. Հովհաննես Սահակյան

Ազգային ժողովի պետաիրավական հարցերի մշտական հանձնաժողովի նախագահ Հովհաննես Սահակյանը, Tert.am-ի հետ զրույցում խոսելով սահմանադրական բարեփոխումների հայեցակարգի մասին, ասել է, որայսօր, ըստ էության, հավանության է արժանացել մեկ նախագիծ, որը սահմանադրական բարեփոխումների ներկայիս հայեցակարգի նախագիծն է: Նա միևնույն ժամանակ նշել է, որ չեն բացառում նաև երկրորդ տարբերակը:

«Ըստ ժամանակացույցի և հրամանագրի՝ աշխատում են այդ հայեցակարգի դրույթների վրա: Քաղաքական ուժերի հետ քննարկումների արդյունքում կտեսնենք, թե որ տարբերակն է ավելի ընկալելի: Երբ քննարկումների արդյունքում նախագիծը պատրաստ կլինի, և պարզ կլինեն հիմնական շեշտադրումները, այն ժամանակ էլ մեր կուսակցության ներսում նախագիծը կքննարկվի, և կտանք այդ քննարկումների ամբողջական պատկերը»,- ասել է ՀՀԿ-ական պատգամավորը:

Հովհաննես Սահակյանը նաև ասել է, որ ներկայացված նախագծին գրեթե բոլոր քաղաքական ուժերն էլ մեծ հաշվով համամիտ են, և հավելյալ այլ նախագծեր քննարկելու անհրաժեշտություն չի առաջանա: Ըստ նրա՝ եթե նախագիծը նախընտրելի լինի բոլոր քաղաքական ուժերի համար, այդ դեպքում այլընտրանքային նախագծի կարիք չի առաջանա, իսկ եթե լինեն խնդիրներ, ապա տրամաբանական է, որ կքննարկվի նաև երկրորդ տարբերակը: